Ayera, Ministerio Publica a informa cu tabatin varios accion di ristramento den cuadro di un investigacion penal tocante labamento di placa, fraude fiscal, fraude di Aduana, falsificacion y empleadonan ilegal.
E investigacion, cu a haya e nomber Saffraan, ta bao di direccion di Ministerio Publico y ta den man di Recherchesamenwerkingsteam (RST), den colaboracion estrecho cu Cuerpo Policial di Aruba, Landsrecherche, FIOT (Fiscale Inlichtingen- en Opsporingsteam), Aduana y UMM (Unit Mensenhandel/Mensensmokkel).
Durante e accion di ayera mainta a ristra den tres tienda, un oficina di administracion y cas di un sospechoso. A confisca varios documento, cargadornan digital pa warda data y administracion financiero. Tambe a confisca propiedadnan y medionan financiero di un sospechoso.
Te na e momento aki a detene un persona.
E investigacion Saffraan a start despues cu varios partner di investigacion financiero a indica cu nan a haya señalnan cu ta mustra posibel actividadnan castigable di e compania y/of di su director. For di e hallazgonan di e investigacion cu a cuminza despues di esaki, a surgi e sospecho cu e compania envolvi ta facilita empleo ilegal di persona y cu pa medio di administracion falso ta ontduik belasting y keda sin paga derechonan di importacion.
E investigacion ta den pleno desaroyo. Pa e motibo ey, lo no duna niun informacion tocante identidad di e persona deteni of di e compania envolvi. Ministerio Publico no ta exclui cu lo por cay mas detencion den futuro den e investigacion aki.
Ministerio Publico ta considera labamento di placa como un di e pilarnan principal di criminalidad cu ta mina sociedad (ondermijnende criminaliteit). Mirando cu reconoce y detecta labamento di placa por ta complica, ta nodo pa informacion wordo comparti na un manera corecto y pa actua na un forma integral contra dje. Ministerio Publico ta traha hunto estrechamente cu partnernan pa combati labamento di placa efectivamente.
