Diabierna atardi miembronan di prensa y varios parlamentario a haya un bista mas profundo den loke ta e operacion di e oficina di Ombudsman. Durante un ‘tour’ di e edificio a provee cuater ronda di informacion corto tocante diferente tema cu ta cay bao di e Landsverordening Ombudsman.

Manera ta conoci, Aruba a haya su prome Ombudsman apenas 1 aña pasa. Sra. Jurima Bryson a ser huramenta dia 1 di october como Ombudsman di Aruba. E Ombudsman ta un autoridad independiente y imparcial. E Landsverordening Ombudsman (LvO) ta bisa cu entre otro, e Ombudsman ta encarga pa sigura cu instancianan publico y priva trata personanan hustamente, adecuadamente y cu respet. Tambe e ta provee informacion y guia riba standardnan di bon gobernacion (“behoorlijk bestuur”), ta crea rapportnan pa conseha instancianan ora nan no actua di manera adecua y ta pone atencion special riba derechonan di mucha.

E tour a toca temanan manera e proceso di tuma keho, inventarisacion di instancianan y encuestanan di directivanan escolar, un splicacion corto di e Lansverordening Ombudsman (LvO) y normanan di tratamento y por ultimo e leynan internacional pa cu derecho di mucha cu ta di importancia pa Ombudsman.

Pa loke ta trata e proceso di tuma keho, ciudadanonan por entrega keho cerca oficina di Ombudsman contra instancianan cu ta (parcialmente) subsidia pa gobierno y tambe instancianan priva na Aruba. E kehonan aki ta sigui un trayecto den cual lo clasifica cada keho segun e tema cu e toca. Despues di esaki, Ombudsman lo haci un evaluacion di e situacion, den cual lo por traha un rapport y hasta acerca e instancia concerni. Di e manera aki, Ombudsman por duna su conseho na e instancia. Ta importante pa menciona cu na momento cu hala atencion di e instancianan pa nan mal trato di e kehado, nan ta obliga pa ley pa duna un splicacion di e situacion y si lo sigui e conseho di Ombudsman. A enfatisa cu pa loke ta aplicacion di e conseho, Ombudsman no tin mucho poder, pero si por trece e situacion na un nivel mas halto, sea na minister of otro autoridadnan concerni.

Den e proceso di investigacion, e splica cu a evalua varios instancia cu ta cay bao di e LvO y te awor tin den total 564 instancia cu por ser acerca pa Ombudman den nan investigacion y haya conseho, incluyendo esnan cu ta trata cuido di mucha manera crèchenan y bijles/tra’i merdia. Ademas ta investiga con e inventario di tur instancia relevante y tambe ta conduci encuestanan pa directivanan escolar, pa asina por aborda adecuadamente e necesidadnan di muchanan.

Durante e parti di e tour aki, a splica cu pa haya informacion di e instancianan subsidia tabata mayormente facil den e sentido cu mayoria tabata habri pa provee e tipo di informacion aki. Sinembargo, a menciona cu por encontra problema di cumplimento cu varios instancia manera instancianan cu ta ofrece un sistema di enseñanza digital pasobra hopi biaha nan no ta sigui e conseho di Ombudsman of no ta cumpli cu leerplicht mirando cu ta trata di un sistema inconvencional.

Den e casonan aki Ombudsman por acerca institucionnan gubernamental manera e Departamento di Enseñansa (DEA) pa por aplica e ley riba e instancianan aki.

Un aspecto notable di e autoridad di Ombudsman ta cu e autoridad por atende tambe cu kehonan contra instancianan di Utilidad, manera WEB of ELMAR. Esaki ta algo cu na Corsou, por ehempel, no ta posible. Di e manera aki, e Ombudsman di Aruba—aunke e ta e ultimo den Reino pa ser instala—tin mas alcance den su autorisacion compara cu otro islanan den Reino y pues tin mas posibilidad di brinda su servicio na comunidad di Aruba.

A splica cu ora ta entrega kehonan contra instancianan di utilidad, Ombudsman ta encarga pa haci evaluacion y haci un rapport den cual lo duna su conseho na e instancia concerni.

Pa loke ta parti di proteccion di derechonan di hende y mucha, a splica cu Ombudsman ta traha den cuadra cu leynan Europeo riba e topiconan aki. A enfatisa cu ta importante pa e autoridad duna atencion specialmente riba kico e muchanan mes ta sinti nan mester, en bes di solamente atende cu loke mayornan of scolnan ta considera miho pa nan. A splica cu pa por aborda e situacionnan aki, a mira con otro Ombudsmannan den Reino ta maneha e tema. A presenta varios fuente cu por a haya di, por ehempel, e Ombudsman Hulandes Reinier van Zutphen, incluyendo materialnan cu por splica ambos na mucha y mayornan kico e derechonan di mucha ta encera. Ombudsman Bryson ta enfatisa e importancia pa tur mucha por usa nan voz pa protege nan derecho, bisando cu muchanan tambe por entrega keho na e autoridad, sea acompaña cu mayornan of su so.

Den cuadra di esaki, ta conoci cu Aruba lo pronto haya un Kinderombudsman. Esaki, Sra. Bryson ta enfatisa, ta un logro grandi pa nos ya cu esaki lo ta e prome biaha cu lo introduci un Kinderombudsman den Reino.

E oficina di Ombudsman lo habri dialuna binidero, 1 di december. Aunke Ombudsman Bryson a splica cu esaki ta mas un “soft launch” pa e equipo, mirando cu ainda tin trabao pa haci pa por keda completamente cla pa brinda servicio di bon calidad, nan porta lo habri caba pa comunidad di Aruba.