Tratamento di e caso penal contra Chania Fernandes Pedra a bolbe ser posponi ayera 18 di november 2026, despues cu e acusado a presenta un di dos “wrakingsverzoek” pa cambia e hues encarga cu su caso. E peticion a ser rechasa door di e wrakingskamer, cu a determina cu Chania ta haci mal uzo di su derecho. Sinembargo, e caso no por a continua, ya cu abogado Jairon Odor finalmente a asumi su defensa y a pidi tempo pa studia e dossier. Hues a fiha 28 di november como e siguiente fecha pa continua cu e caso.
E audiencia a cuminsa cu e hues repasando e desaroyonan di e ultimo sesion, incluyendo e prome wrakingsverzoek presenta door di Chania. E peticion anterior a ser trata dia 6 di november y rechasa, despues cu e wrakingskamer a determina cu e argumentonan presenta no tabata suficiente pa cuestiona imparcialidad di e hues.
Durante e audiencia di ayera, hues a dedica atencion na un carta di 14 pagina cu Chania a presenta na Corte. Den e documento, e acusado a pidi formalmente pa pospone tratamento di su caso, argumentando cu e no tin asistencia hudicial adecuado y cu ainda tin informacion importante cu e mester ricibi pa prepara su defensa.
E carta ta contene diferente peticion relaciona cu su derecho di defensa, acceso na e dossier penal, nombramento di abogado, traduccion di documentonan y investigacion di e manera cu su asistencia hudicial a ser organisa durante e proceso.
Un di e peticionnan principal tabata pa Corte no continua cu tratamento di e caso mientras Chania no tin un abogado cu por representa su interesnan debidamente. E acusado a argumenta den e carta cu, durante diferente fase di e proceso, abogado a ser asigna of menciona como su representante sin cu e mes a duna su aprobacion.
Chania a pidi tambe pa Corte investiga e circunstancianan rond di participacion di abogadonan Zahedi y Jansen. Den su carta, el a cuestiona e manera cu nan a ser involucra den e proceso y a presenta acusacionnan tocante posible iregularidadnan. Ora hues a pidi Chania pa aclaria exactamente ki rol e ta atribui na e hues mes den e iregularidadnan menciona, el a nenga di contesta.
Otro punto importante tabata e dossier penal. Chania a confirma cu el a ricibi documentonan di su caso, pero a mantene cu e dossier ainda no ta completo, particularmente pasobra e no a ricibi e videonan cu ta forma parti di e material di investigacion.
Fiscal di Ministerio Publico (OM) a aclaria cu Chania a ricibi tur e documentonan fisico cu ta forma parti di e dossier, mientras cu e videonan no tabata inclui den e entrega ey pa motibo cu e filenan ta demasiado grandi y no tabatin manera pa e revisa nan den KIA.
Ademas, e acusado a pidi pa algun documento ser traduci, pa revisa e compensacion financiero destina pa asistencia hudicial y pa haya claridad tocante comunicacion entre Corte, Ministerio Publico y e abogadonan involucra. El a menciona tambe cu, durante un audiencia anterior, el a sinti cu hues a dirigi su mes na dje di manera critico.
Di su banda, OM a rechasa e peticionnan principal. Fiscal a indica cu aumento di compensacion pa abogado no ta cay bao di competencia di OM, mientras cu e peticion pa traduccion di documentonan a ser presenta demasiado laat.
Den su carta, Chania a pidi specificamente pa ricibi un e-mail cu Fiscal a manda dia 19 di augustus 2026, hunto cu tur corespondencia relevante entre OM, Deken di Aruba y Corsou y e abogadonan involucra. E comunicacionnan aki ta relaciona cu e manera cu asistencia hudicial y nombramento di abogado pa su defensa a ser organisa durante e proceso. E e-mail a ser entrega na Chania durante e audiencia.
Despues di delibera, hues a anuncia cu e peticionnan tabata rechasa y cu tratamento di e caso lo continua. E decision aki a provoca cu Chania a presenta su di dos wrakingsverzoek, obligando Corte pa suspende e audiencia. E wrakingskamer tabata disponibel pa trata e peticion mas laat e mesun dia.
Durante e pauze pa warda e tratamento di e wrakingsverzoek, tension entre famianan di e victimanan y famia di Chania a aumenta den edificio di Corte. Un enfrentamento verbal a cuminsa, cu gritonan y pushamento. Personal di seguridad di CEA mester a interveni pa separa e personanan involucra.
Finalmente e huesnan di e wrakingskamer, cu tabata e mesun tres huesnan cu a trata e peticion anterior, a reuni pa evalua e di dos peticion.
Abogado Jairon Odor a bolbe presenta pa asisti Chania den e procedemento specifico aki. El a argumenta cu un acusado tin derecho riba asistencia hudicial adecuado y cu no ta corecto pa continua tratamento di un caso penal sin cu e acusado tin un abogado cu por prepara su defensa.
Huesnan a puntra abogado Odor si e ta representa Chania den e caso penal, na cual el a contesta cu no pasobra e no tin e dossier. OM a señala cu Chania a ricibi su dossier dia 6 di november. Ademas el a aclaria cu Odor no a ricibi e dossier pasobra e no tabata registra oficialmente como abogado di Chania den e caso penal.
E wrakingskamer a splica cu un abogado mester presenta su mes formalmente como representante di e acusado pa haya acceso na e dossier. Despues di esey, e por solicita tempo pa studia e documentonan.
Odor a indica cu e caso ta extenso y cu e no por asumi e responsabilidad sin tempo suficiente pa prepara su mes. El a menciona tambe cu e compensacion pa un caso pro deo ta limita, considerando e cantidad di trabao cu e defensa lo rekeri.
Despues di delibera, e tres huesnan a determina cu e di dos wrakingsverzoek no tabatin fundamento suficiente y a rechas’e. Ademas, e camara a conclui cu Chania tabata haci mal uzo di su derecho di presenta wrakingsverzoek. Consecuentemente, a anuncia cu futuro peticionnan di e mesun tipo contra e hues encarga cu e caso no lo ser trata mas door di e camara.
Ora e audiencia penal a reanuda, Odor a presenta su mes oficialmente como abogado di Chania. Cu e decision aki, el a solicita un posponemento pa por studia e dossier completo y prepara e defensa.
E reaccion di fiscal di OM tabata fuerte. Fiscal a expresa su desaprobacion cu e cantidad di posponementonan y a señala Chania y e ekipo su a uza diferente truco pa keda pospone e tratamento di e caso.
Fiscal a pone enfasis riba e impacto cu e proceso prolonga tin riba famianan di e victimanan, kende a presenta nan mes repetidamente na Corte sin cu tratamento di e caso por a avansa den su contenido.
Odor a aclaria cu anteriormente e no por a presenta su mes como abogado di Chania pasobra ainda e no tabatin aprobacion di su famia. Segun su splicacion, ta despues di e resultado di e di dos wrakingsverzoek el e a ricibi autorisacion pa asumi e defensa.
Finalmente, hues a consulta e agenda di Corte y a fiha 28 di november 2026 como e siguiente fecha pa tratamento di e caso.
Despues di e audiencia, Edwin Willems, yiu di un di e victimanan, a expresa su frustracion cu e manera cu e proceso ta desaroyando. Segun Edwin, cada posponemento ta representa un carga emocional y financiero adicional pa su famia.
El a indica cu nan ta sinti nan mes ofendi door di e diferente peticionnan cu ta provoca cu tratamento di e caso ta ser posponi. E situacion ta afecta nan bida diario, ya cu cada audiencia ta rekeri nan reorganisa nan responsabilidadnan laboral y familiar.
Edwin a menciona cu su ruman muhe, kende recientemente a haya un baby, mester a presenta su mes na Corte a pesar di e recuperacion despues di su parto. El a expresa tambe su desaprobacion cu e manera cu Odor a presenta su mes como abogado di Chania solamente despues cu e di dos wrakingsverzoek a ser rechasa.
El a recorda cu e famia a organisa un peticion publico cu a colecta mas di 8.000 firma den cinco dia, demostrando e preocupacion cu e caso, y otro casonan di hit & run ta genera den comunidad.
Di su banda, Yhoely Willems, ruman muhe di Edwin, a expresa cu e proceso ta causando un dolor emocional profundo pa su famia. El a indica cu pa dies luna nan ta wardando pa e caso avansa, mientras cu cada audiencia ta trece otro peticion of posponemento.
Yhoely, kende ta mama di un baby di apenas un luna y mei, a splica cu un di e aspectonan mas doloroso ta e hecho cu su yiu nunca lo por conoce su wela. El a enfatisa cu su famia no ta buscando confrontacion cu e otro partido, sino simplemente respet y empatia durante e proceso.
El a expresa tambe cu nan no a sinti cu e disculpanan presenta te awor tabata sincero. Tanto Edwin como Yhoely a indica cu nan ta spera cu e siguiente audiencia finalmente lo permiti tratamento di e caso den su contenido.


