Cu un profundo sentido di respet y gratitud, ta anuncia cu Sra. Jeanette R. (Jane) Semeleer ta bay cu pensioen despues di hopi aña di servicio como President di Banco Central di Aruba (CBA). Minister di Finanzas, Asunto Economico y Sector Primario, Geoffrey Wever ta reconoce e contribucion fundamental cu Sra. Semeleer a haci pa e stabilidad financiero y integridad di nos sector financiero y sistema bancario di Aruba.

Jeanette R. (Jane) Semeleer, graduado di economia na University of Toledo (USA), a inicia su carera den servicio publico como asesora di maneho di Departamento di Asunto Economico y posteriormente den Relacionnan Externo.

Na 1990 Sra. Semeleer a bay forma parti di CBA, cuminsando como Adjunct Head di CBA su Research Department y despues di esey bira Manager di e departamento, y mas despues na 2000 Sra. Semeleer a bira Executive Director di CBA.

Na 2008 Sra. Semeleer a keda nombra President di CBA, asina birando e di 8 President y e prome hende muhe pa ocupa e posicion aki den CBA.

Durante su liderazgo, Sra. Semeleer a logra varios avancenan relevante pa Aruba:

Supervision y implementacion di un renobacion total di “banknotenan” di florin Arubiano — un proceso cu a dura siete aña y cu a resulta den un serie di biyetenan nobo (introduci na 2019) cu ta ilustra flora y fauna nativo di Aruba.

E serie nobo no ta solamente un refleho di nos identidad natural y cultural, pero tambe a gana reconocemento internacional: e biyetenan di 100 florin a bira “Banknote of the Year 2019” segun International Bank Note Society (IBNS).

Den su rol como President, Sra. Semeleer tambe a enfatisa — y guia — e importancia di stabilidad financiero, integridad di sistema bancario, y responsabilidad economico-monetario, inclusivo den un contexto regional cu reto medioambiental y di cambio climatico.

Durante su presidencia, Sra. Semeleer a guia Banco Central di Aruba a traves di crisisnan internacional sucesivo, incluyendo e crisis financiero global di 2008 y pandemia di COVID-19, protegiendo stabilidad financiero di Aruba.

Bou di su liderazgo, independencia institucional, credibilidad y gobernansa di Banco Central di Aruba a wordo fortalece y proteha na un manera activo.

Su liderazgo a contribui tambe na promove inclusion y balansa di genero den sector financiero; CBA ta figura entre e institucionnan cu representacion di hende muhe prominente den liderazgo global.

Minister Geoffrey Wever ta expresa su mas profundo gradicimento pa Sra. Semeleer su dedicacion, su integridad y su vision ekilibra pa nos sistema financiero. Su contribucion cu vision y compromiso cu desaroyo sostenibel, stabilidad y inclusion, lo keda como un herencia duradero pa Aruba.

Gobierno di Aruba lo despedi di Sra. Semeleer den un setting priva unda lo gradici Sra. Semeleer pa tur su añanan di trabou na bienestar di Banco Central di Aruba y Aruba.

Minister Geoffrey Wever ta desea Sra. Semeleer tur clase di exito cu e siguiente pasonan den cu carera profesional, sabiendo cu su legado ta representa un periodo di profesionalismo, y progreso pa nos isla.