(Infobae) – Presidente di Merca, Donald Trump, a yega China diaranson pa participa den un cumbre trilateral historico cu su homologo Chines, Xi Jinping, y lider Ruso Vladimir Putin, den un encuentro marca pa guera na Ucrania y Iran, tensionnan geopolitico y disputa riba desaroyo di inteligencia artificial.
Su avion a aterisa atardi na Shenzhen, e centro tecnologico di China cu ta ricibi hefenan di Estado durante cumbre di Asia-Pacific Economic Cooperation (APEC), despues di un vuelo di dos ora for di Filipinas.
Xi, ken rara bes ta bay aeropuerto pa ricibi lidernan stranhero, a spera Trump na pia di trapi di avion y a bras’e, den un gesto cu a debolbe e gesto cu Trump a haci cu ne na Washington na september.
Ora di duna e bonbini, e lider Chines a bisa cu e kier un “relacion constructivo y strategicamente stabiel” entre e dos paisnan, segun agencia estatal Xinhua.
“Mi ta spera pa mantene un intercambio profundo di punto di bista cu bo (…), cu meta di promove un relacion constructivo y strategicamente stabiel entre nos dos nacion, un relacion basa riba fundacionnan di respet mutuo, ekidad y reciprocidad,” Xi a declara.
Putin a yega mas trempan, diabierna anochi. Xi y e lider Ruso a pasa mas cu dos ora hunto e diaranson aki, incluyendo un almuerzo, segun AFP.
Funcionarionan Ruso a bisa cu nan tabata plania pa papia tocante energia y finansas y despues, den un formato mas chikito, tocante politica exterior, cu Ucrania y Corea di Norte entre e temanan.
E reunion trilateral lo tuma luga awe pa 14:30 ora local (06:30 GMT), den marco di APEC, y Trump tambe lo participa den cumbre di e foro.
Ucrania, paisnan Europeo y Taiwan lo sigui e reunion di cerca, pasobra nan ta teme di keda pafo di acuerdonan entre e tres potencianan cu por afecta nan.
Beijing a limita su reaccion na bisa cu e lidernan lo tin “intercambionan profundo tocante proteccion di paz mundial y promocion di stabilidad strategico den relacionnan entre e gran potencianan.”
Trump ya a anticipa un agenda cu lo inclui arsenalnan nuclear y fin di e guera na Ucrania, cu a cuminsa na 2022 cu e invasion Ruso.
Prome cu sali, el a bisa cu morto di dies miles soldad Ruso pa luna tabata habri un oportunidad pa un acuerdo.
“Mi ta kere cu nos ta hopi cerca di logra esaki,” el a bisa diamars.
Su palabranan a contrasta cu esnan di algun conseheronan, cual tabata anticipa cu e guera no lo forma parti di e reunion.
Washington a specifica cu guera na Iran y desarmamento nuclear tambe lo ser discuti, despues cu un tratado bilateral entre Merca y Rusia tocante armanan atomico a caduca na februari.
Trump a laga habri e posibilidad di un reunion priva cu Putin banda di e cumbre, aunke no tin confirmacion oficial.
“Mi no sa, pero mi lo haci esaki. Si e ta disponibel, mi lo hacie,” el a bisa.
E tambe a menciona un posibel encuentro cu lider di Corea di Norte, Kim Jong Un.
Secretario di Estado Marco Rubio a bisa na Manila cu Trump tabata “serio”, pero a aclara: “Mi no ta bisa cu lo tin un reunion mañan.”
Putin ta yega na e evento despues di a keda aisla for di e Occidente pa motibo di su invasion di Ucrania.
Dilanti di empresarionan reuni na APEC, el a pidi “unidad en bes di division y dialogo en bes di ultimatum” y a describi e cumbre trilateral como “hopi util”.
E tambe a bisa cu sancionnan Occidental a faya.
Algun ora despues, Prome Minister di Canada Mark Carney a adverti e mesun audiencia cu medidanan contra Rusia “lo intensifica” si e guera sigui.
Xi, di su banda, a pidi mas cooperacion internacional den inteligencia artificial y comercio liber.
Tensionnan comercial y tecnologico entre Washington y Beijing
E perspectiva cu Trump lo reuni cu lidernan di China y Rusia a crea preocupacion tocante direccion di politica exterior Mericano, memey di tensionnan cu aliadonan historico manera Canada y socionan Europeo di NATO.
Politica di tarifanan di Washington, cu tabatin como meta elimina surplus comercial di China, no a logra stop e fabricante mas grandi di mundo: pa un di dos aña consecutivo, China lo exporta productonan cu un balor di un triyon dollar mas cu loke el a importa.
Diamars, Xi a reuni cu Carney y a yega na acuerdo cu ne tocante mas reduccion di tarifanan.
Inteligencia artificial tambe lo tin un rol central.
Acceso di China na semiconductornan avansa for di Merca ta un di e puntonan principal di friccion.
Jensen Huang, un aliado cercano di Trump den industria tecnologico, a renuncia como CEO di Nvidia despues di admiti cu el a tene un relacion pafo di matrimonio cu un hende muhe cu Merca ta sospecha tin relacion cu inteligencia Chines, algo cu Beijing ta nenga.
E caso a aumenta preocupacion tocante acceso di China na chipnan di Nvidia pa desaroya modelonan di inteligencia artificial cu por competi cu esnan Mericano.
Ora a puntr’e dicon Washington no a tuma medidanan mas duro, Trump a reconoce cu tin diferencia den su administracion: “Nos tin un relacion hopi bon cu China, y bo no kier ofende nan.”
Iran y Taiwan
Guera contra Iran tambe por aparece den e combersacionnan. China y Rusia a duna sosten na Teheran despues cu Trump a lansa un ofensiva militar na februari pa frena desaroyo di armanan nuclear den e pais.
Trump a bisa cu e tin intencion di trata e tema ey y esfuersonan pa reduci arsenalnan nuclear cu Xi y Putin.
Sinembargo, el a descarta cu e mes lo presenta e asunto di Taiwan, aunke el a anticipa cu Xi probablemente lo haci esaki: “Mi ta sigur cu e tema lo surgi. Mi no lo mester pon’e riba mesa.”



