Varios ciudadano riba nos isla a cuminsa reporta cu a mira e Giant African Snail, cual ta causando alarma memey di comunidad. Pa motibo di esaki, Santa Rosa a comparti un comunicado unda a brinda mas informacion tocante e especie aki y a aclaria cu durante temporada di yobida tin mas probabilidad di mira e Giant African Snail den cierto parti di nos isla.

Giant African Snail (GAS) ta e nomber comun pa varios especie di slak Africano grandi y nan ta popular den e mercado di mascota. E especie aki ta un menasa pa tanto bestia como ser humano, pa motibo cu e por transmiti parasitonan y diferente otro malesa.

Gobierno di Aruba ta al tanto cu e Giant African Snail (GAS) ta presente riba e isla for di aña 2011. Via un e-mail, Departamento di Agricultura, Cria y Pesca (DLVV) a ricibi confirmacion di Dr. Robinson, malacologist, ken awendia ta retira di United States Department of Agriculture (USDA), via e tres conchanan cu DLVV a manda pa su persona.

Ariba un boletin publica riba red social, DLVV a tuma nota di e mencion di presencia di GAS den e temponan aki unda e isla ta mirando hopi yobida. Segun DLVV a informa, slaknan por lo general “pa sobrevivi secura ta estiva, esta bay den dormancia anto ora cu humedad aumenta, manera awor, ta bolbe bira activo.”

Via e boletin aki, DLVV a trece conscientisacion pa esnan cu mira GAS pa awor “piki nan cu un man cubri cu un saco di plastic sin buraco anto herbe nan mata. E resto, cu ta comestibel, despues por composta of cria cacho of pushi cune.” Algo importante ta pa tene cuenta cu e caracteristicanan di e slak GAS, pa motibo cu si no tuma esaki na cuenta por mata slak indigena, mirando cu aki na Aruba nos ta conta cu 18 sorto. DLVV a splica cu un GAS por bira “hopi grandi, te 1kg, su carni por varia di color di crema te bruin scur.”

Dr. Roda di USDA den un webinar cu DLVV a atende na 2022 a mustra e diferente “color morph” cu e GAS por tin. “Esun cu e estado di Florida a combati na añanan 60 tabata hopi scur den su cuero y concha. Esun na 2022 haya tin un cuero hopi cla y su concha tambe ta hopi cla strepia bruin. E GAS por pone di 100 pa 500 webo den un solo biaha y su webonan ta rond pa oval, ongeveer 5mm den largura, di color crema te geel.”

E concha ta conico, pues e tin mas cu 7 draai y por midi te cu 30cm aunke normalmente esaki ta 5 pa 13cm. A diferencia di esaki, “e slaknan di Aruba por lo general sa ta mas chikito cu 5cm” y pa motibo aki ora e “GAS ta recien naci, e por ta dificil di distingui di e esun di Aruba. Por lo general GAS ta esun cu hende lo haya den areanan urbano debi cu e construccion lo a elimina esun di Aruba.”

Recomendacion

Den su recomendacion tocante kico pa haci cu e GAS, DLVV ta conseha pa herbe of vries nan mata. Pa vries ta recomenda cera nan den dobel saco di plastic y laga esaki un dia largo pa ta sigur. No ta consehabel pa dal nan mata, pa motibo cu esaki por spart nan webo rond cu e consecuencia cu mester keda vigila e area pa ora e webonan broei despues di dos pa tres siman.

Ademas, aplicacion di kimico pa deshaci di GAS tampoco no ta recomenda pa varios factor, entre nan ta cu nan ta pone webo prome cu nan muri, e hecho cu mester vigila unda nan ta pa tira e kimico y despues keda pendiente cu cacho of mucha no mishi cu e kimico y den caso cu awa yobe, mester bolbe tira e kimico.

E uso di salo tampoco ta recomendabel pa deshaci di GAS, pa motibo cu tin e problema cu e cantidad di salo necesario lo depende riba e peso di e GAS. Acerca ta bin cu e salo ta bira un probabel contaminacion pa e suela den cual lo deshaci di e GAS morto.

Ta importante pa tene cuenta cu mester evita transporta tera di unda e GAS a ser haya, esaki ta pa motibo cu e por contene webo di GAS y ta un manera cu por infecta otro areanan. DLVV a trece dilanti e ehempel cu “a pidi un cliente pa hiba su matanan back pasobra e pochinan tabata contamina cu GAS. Principalmente awor cu hopi ta haci cura limpi pa ricibi bishita di Pasco, mester mira bon cu e resto no ta contene slak.”

Caribe

E hecho cu tur e maneranan aki no ta recomendabel pa mata slak, ta haci esaki dificil pa elimina. Na 2020 Florida a declara su mes liber di slak despues di 9 aña, sinembargo na 2022 nan a bolbe. Rosimar Morales di USDA-Animal and Plant Health International Service Plant Pest Quarantine Puerto Rico a elabora ariba con nan a sondea pa e GAS en bista cu otro nacionnan den Caribe cerca di Puerto Rico a reporta su presencia.

Segun DLVV, nan a haci inspeccion na 330 luga di cual 321 no tabatin incidente. Esnan cu a haya nan “a tene un 200m di radius di centro cu nan a inspecciona intensivamente y 400m di radius di buffer cu nan a inspecciona riba bista solamente. Ora nan a haya e slak, nan a combati esaki te saca vegetacion cu suela y kima esakinan.”

Jason Stanley di Florida Department of Agriculture and Customer Services a papia tocante e teamnan di cacho cu tabata sali pa detecta si por tin GAS y teamnan cu tabata traha anochi ora cu GAS tabata sali. DLVV ta conta cu pa deshaci di tera y vegetacion contamina nan tabata colecta esaki den dobel saco di sushi y deshaci na dumpnan asigna.

E departamento a sigui comparti cu “aki na Aruba nos ta conta cu un solo dump, y ta un solo incinerator e tin. Bret Taylor, ken ta Senior Agriculturalist Officer na Ministry of Agriculture Food & Nutritional Security di Barbados a participa cu su ministerio a ofrece lokaas y metaldehyde por nada na habitantenan pa combati e GAS. Nan a conduci bioassays pa evalua e kimico cu mihor ta caba cu e slaknan y bao di cua tempo e ta mas efectivo. Asina Barbados di 2009-2013 a ofrece bounty pa cada slak morto y a destrui 392 ton.”

Den un slide di e presentacion, DLVV por a mira “con hende a coba un pit 30cm hundo anto cubri hopi slak cu hopi palet pa kima nan.” Ora awa a yobe e pit a yena cu awa y net esey ta e periodo unda e slak ta bira activo. Te ainda e GAS ta persisti na Barbados. Dr. Janil-Gore Francis di Antigua and Barbuda na 2008 a reporta e presencia di GAS na IPPC pasobra e ta un “notifiable pest”. “Te awe ainda GAS no a pasa pa Barbuda. Dr. Francis a mustra ariba e corelacion di GAS cu e tempo,” DLVV a declara.

“Asina na Antigua durante secura ta colecta 160 slak pa ora mientras den temporada di yobida e ta 500. Nan a conduci un Impact Assessment survey di November 2021 pa Juni 2020 cu a mustra cu e averahe di e gasto pa luna ta 140 US$. Curaçao a menciona cu di 2016 tin e. Banda di e GAS Dr. Roda tambe a menciona otro 3 slaknan famia di Achatina cua, Dr. Albert Mead segun Dr. Roda, ta predeci cu e Limicolaria aurora lo bira un peste mas grandi. Ya tin lugarnan unda el a reemplasa e GAS,” DLVV a informa.