(AP) — Colombia a bisa dialuna cu a manda 26 miembro di e secta Hudiu ultra-ortodox Lev Tahor na Merca despues di determina cu e derechonan di algun di e muchanan den e grupo tabata den riesgo.

Autoridadnan a detene e grupo di 17 mucha y nuebe adulto dia 22 di november despues di un inval na nan hotel na Yarumal, un ciudad den nort occidente di Colombia.

Oficialnan di inmigracion a bisa cu mientras tur e muchanan den e grupo tabata compaña pa al menos un mayor, tabatin cinco mucha cu paspoort Mericano y Guatemalteco pa ken a emiti aviso geel di Interpol. E aviso ta un alerta global emiti pa hende cu a keda reporta como desaparecido of cu ta considera victima di secuestro parental of criminal.

Agencia nacional di inmigracion Colombiano a bisa cu e grupo a pasa e ultimo siman den un edificio di e agencia na Medellin, unda e muchanan a ricibi sosten di Instituto Nacional pa Famia y Bienestar di Colombia.

Despues e grupo na bula bay New York, segun e agencia. Eynan, oficialnan Mericano a ricibi nan, y ta bay check si tin algun investigacion pendiente contra e adultonan mientras cu e muchanan ta bay ta den cuido di Servicio di Proteccion di Mucha.

Lev Tahor a haya problema legal na varios pais, cu su miembronan acusa di secuestra muchanan y forsa nan den matrimonio cu adulto.

Aña pasa, polis na Guatemala a haci un inval na un compleho di Lev Tahor den e pais Centro Americano, despues di reportahenan di abuso sexual, tumando den custodia al menos 160 menor y 40 muhe.

Na 2022, autoridadnan Mexicano a aresta un lider di e secta cerca di frontera Guatemalteco y a retira un cantidad di mucha y muhe for di e compleho. Na 2021, dos lider di e grupo a keda condena di secuestro y explotacion sexual di mucha na New York.

E secta a keda funda den añanan 1980 y ta conoci pa tin miembro na Canada, Merca, Mexico, Guatemala y Israel.

Gloria Eperanza Arriero, director di agencia nacional di inmigracion di Colombia, a bisa siman pasa cu oficialnan a dicidi di interoga miembronan di Lev Tahor despues di haya un tip di localnan tocante nan presencia den pueblo di Yarumal. Arriero a bisa cu e miembronan di e secta a yega Colombia na october y tabata buscando un propiedad rural unda nan por set up un compleho.

“Loke ta positivo den tur esaki ta cu nos a haya e muchanan prome cu nan a haya un compleho,” Arriero a bisa. “Pasobra den e caso ey, nos lo a rekeri un ordo di hues pa haci e buskeda.”

Potret di AFP.