Dia 13 di november ultimo, Colegio di Supervision Financiero (CAft) a ricibi e rapport di implementacion (uitvoeringsrapportage, UR) pa di tres kwartaal di 2025. Den un carta di presidente di CAft, Lidewijde Ongering, CAft a duna su respuesta na e UR.

Den su evaluacion, CAft a nota cu e rapport di implementacion pa di tres kwartaal ta mustra un panorama positivo. Entrada di impuesto ta mas halto di loke a spera, parcialmente pa motibo di continuacion di crecemento economico. Aruba ta mustra un surplus financiero di aproximadamente 6 porciento di Producto Interno Bruto (GDP).

Basa riba e hallazgonan den e di tres UR, Aruba ta na caminda pa cumpli cu tanto e norma di balans financiero como e norma di gasto di personal na 2025. Gasto ta keda dentro di presupuesto, y entrada di impuesto ta prestando fuertemente.

Sinembargo, e implementacion di inversion ta kedando atras, loke ta resulta den fondonan disponible cu ta keda sin usa. CAft ta spera espacio adicional den presupuesto pa motibo di ganashi inespera y e falta di ehecucion di inversion. CAft ta conseha Aruba pa usa e fondonan aki pa paga debe back. Esaki ta contribui na mas reduccion di e ratio di debe y un reduccion den gasto di interes.

Den su carta, CAft ta pidi minister di Finanzas, Geoffrey Wever (Futuro) pa clarifica den e di dos presupuesto aproba pa 2025 [despues di amienda] con ta bay usa e ganashi inespera, di acuerdo cu e ley di supervision financiero di Aruba (LAft), incluyendo con ta bay aloca cualkier ganashi adicional.

Den e sentido aki, CAft ta conseha pa usa e fondonan aki principalmente pa reduccion di debe, mirando e ehecucion structuralmente insuficiente di e presupuesto di inversion.

Ademas, CAft ta pidi e minister pa indica ki medida Aruba ta tumando pa atende e ehecucion structuralmente insuficiente di inversion, incluyendo reforsa capacidad di implementacion, mehora planificacion di proyecto, crea calculacionnan di inversion mas realistico, y establece metanan pa cada kwartaal mustrando e stapnan cu ta bay tuma cada kwartaal den sentido di planificacion, adkisicion y ehecucion.

Tambe CAft ta solicita Aruba pa prepara un agenda di inversion multianual cu prioridadnan di politica y cu ta personalisa pa e capacidad di implementacion di e pais.

Finalmente, CAft ta solicita pa Aruba establece rapidamente e sector colectivo pa 2023 y e añanan siguiente.

Balans financiero
 E di tres UR pa 2025 ta mustra un surplus financiero di Afl. 473 miyon pa sector colectivo (alrededor di 6 porciento di GDP), cu ta hopi mas cu e norma di 1 porciento di GDP. E resultado den e di tres UR ta den linea cu e calculacionnan pa e di dos amienda di presupuesto 2025 (BW), den cual a presupuesta un surplus di 3.6 porciento di GDP pa henter aña.

E ganashi inespera pa e pais den e BW ta alcansa Afl. 49 miyon. Basa riba e di tres UR, sinembargo, CAft ta pronostica ganashi mas halto cu loke a inclui anteriormente, particularmente pa motibo di e desaroyo faborable di entrada di impuesto. Cumpliendo cu LAft, mester usa e ganashi aki pa reduccion di debe y inversion (adicional).

Den e BW, Aruba a dicidi pa aloca e mayoria di e ganashi extra aki, cual ta Afl. 40 miyon, pa pago adicional di debe, y Afl. 9 miyon pa e fondo di inversion. Mirando e ehecucion structuralmente ineficiente di inversion, CAft ta conseha pa usa cualkier otro ganashi extra pa reduccion di debe tambe.

Tasa di debe
 Fin di september 2025, e debe publico total di Aruba tabata Afl. 5.069 biyon (63 porciento di GDP), un reduccion di Afl. 187 miyon compara cu e di tres kwartaal di 2024. Como resultado, e tasa di debe a baha for di 69 porciento na fin di 2024 na 63 porciento na fin di e di tres kwartaal di 2025.

Na 2025, Aruba mester paga back un total di Afl. 534 miyon. Den prome mita di aña, a financia Afl. 165 miyon domesticamente. Den di cuatro kwartaal ta bay refinancia Afl. 255 miyon den mercado exterior, y ta bay paga Afl. 114 back usando fondo propio. Esaki ta mas halto cu e Afl. 74 miyon calcula den e di dos UR.

Gasto di personal
 Fin di e di tres kwartaal, gasto di personal a alcansa Afl. 377 miyon. Esaki ta un aumento di Afl. 24 miyon compara cu e di tres kwartaal di 2024, principalmente pa indexacion di salario.

Gastonan di personal ta representa alrededor di 6 porciento di GDP den di tres kwartaal. Pa henter 2025, ta spera cu e gastonan di personal lo alcansa alrededor di 9 porciento di GDP. Pues Aruba ta cumpli cu e limite di 10 porciento cu ta bay aplica di 2027 bay dilanti. Segun e pronostico multianual, gastonan di personal ta bay keda bao di e limite rekeri te cu 2029.

Inversion

Te cu e di tres kwartaal, apenas a utilisa 21 porciento di e presupuesto di inversion 2025. Esaki ta confirma e riesgo identifica anteriormente, cu no ta bay ehecuta e presupuesto di inversion completamente na 2025. E realisacion abao ta causa pa problemanan di implementacion, capacidad limita, y retraso den procesonan di adkisicion.

E continuacion di insuficiencia den ehecucion ta indica un problema structural. A pesar cu Aruba ta spera di catch up den di cuatro kwartaal, CAft ta considera poco probable cu ta bay realisa henter e presupuesto di inversion.

Sector colectivo

CAft un biaha mas ta enfatisa e importancia di establece pronto e sector colectivo pa 2023 y e añanan subsecuente, den coordinacion cu CBS Aruba, CBS Hulanda y e ministerio di Asuntonan Interno y Relacionnan di Reino. Un delineacion corecto di e sector colectivo ta esencial pa obtene un panorama realistico di e posicion actual di debe, segun e carta di CAft a finalisa.

E sector colectivo ta consisti di e total di institutonan gubernamental (incluyendo companianan cu un tarea gubernamental) cu banda di ehecuta nan deber publico y nan rol den regulacion economico, ta produci principalmente servicionan (of productonan) no-comercial pa uso individual of colectivo y ta redistribui entradanan y bienes. Pa yega na esaki ta tene cuenta cu diferente factornan cu riba plataforma internacional ta ser desaroya, pa cual motibo CBS tin su rol den esaki.

Na april 2025, minister Wever a anuncia cu pa algun tempo CBS Aruba hunto cu CBS Hulanda ta trahando riba e constelacion di e sector colectivo loke mester ser estableci entre Hulanda y Aruba como parti di e ley di supervision financiero (LAft). E LAft ta prescribi cu Aruba mester tin un surplus di 1% di e sector colectivo. Minister Wever, hunto cu CBS y Departamento di Finanzas a reuni riba e conseho cu CBS Aruba a prepara.

Sinembargo, basa riba e conseho di CAft den su ultimo carta, e preparacion di e constelacion aki no ta completo ainda.