Un tema cu lo mester haya su debido atencion bao pueblo y den arena politico ta con nos como sociedad por zorg pa tur e rikesa cu Inteligencia Artificial (IA) lo crea por beneficia henter sociedad. Tambe pa preveni scenarionan distopico, unda un grupito ultra-chikito y poderoso ta keda cu tur e rikesa.

Den e columna di siman pasa nos a toca e tema cu segun modelonan di Prof. Dr. Anton Korinek, e balor di capital relativo na labor humano lo crece cu un factor 1000. Na prome instancia esaki lo parce un peliger inmenso pa sociedad, pero na otro banda, e crecemento di capital & rikesa ta crea un oportunidad fundamental pa comunidad: Esta con nos por reparti tur e rikesa cu IA lo crea den un manera husto, cu lo eleva calidad di bida di un y tur?

Entrada Universal

Un hecho cu mi a haya hopi remarcabel durante mi charla di 2 siman pasa pa grupo di sindicato ta con e tema di entrada universal a crea un division entre participantenan. E tabata hopi duidelijk cu mas o menos mita di e sala tabata na fabor di un entrada universal, mencionando data di un estudio di Canada unda entrada universal a hisa calidad di bida di esnan sin cas/entrada significantemente. Na otro banda, e otro mita di sala, tabatin argumentonan cu entrada universal lo haci pueblo floho, y cu e balor di un hende ta den su trabao diario.

Den e debate aki, siguramente mi por clasifica mi persona como na fabor di entrada universal. Tin varios estudio cu en berdad ta mustra cu e tin efectonan positivo pa esnan cu ta ricibi esaki. Na otro banda, tambe nos mester realisa cu mas -mas automatisacion lo kiermen cu tin menos cupo di trabao pa ser humano. Esaki lo nifica cu te hasta pa esnan cu echt kier traha, cu simplemente no lo tin suficiente trabao. Den e contexto aki di desempleo door di automatisacion mester bin cu buffers pa zorg pa tur parti di comunidad tin un futuro digno.

IA Capital

Loke cu ta hopi importante ta cu e nivel di e entrada universal mester tin un relacion directo cu e capital cu IA lo crea. Esaki kiermen cu mester bin cu directe vermogenbelastingen y tax riba IA, y cu esaki mester bay directamente na e fondo di entrada universal. Dus mas automatisacion tuma lugar y na mesun momento mas grandi e cantidad di IA Capital bira, mas halto e entrada universal lo ta. Cu tempo y innovacion, unda casi tur trabao wordo automatisa, e entrada universal por bira un cifra bastante halto. Segun calculacion di un ex-ehecutivo di OpenAI, e compania cu a lansa ChatGPT, e lo por ta posibel pa tin un entrada universal di $10.000,- pa luna te hasta, den un scenario di automatisacion completo.

Universal Open-Source IA

Loke tambe ta sumamente importante ta cu pais/pueblo di Aruba mester zorg pa e fundeshi di IA riba nos isla, ta basa riba modelonan open-source, esta e modelonan gratis, cu no ta patenta of cu tin doño. Esaki lo salvaguardia cu un grupo chikito lo tin tur e IA Capital of ta doño di e fundeshi fundamental tecnologico di nos futuro sociedad. Nos tin cu nota cu modelonan open-source segun analisis di JP Morgan ta casi mesun bon cu e modelonan patenta. Si e base di futuro IA riba nos isla ta open-source, e lo crea oportunidadnan igual pa tur esnan cu kier ta parti di esaki.

En conclusion, e proximo 20 aña lo bin cu cambionan radical pa sociedad. E crecemento di capital relativo na labor humano lo ta un desafio cardinal. Pero na mesun momento cu politica bon pensa, e mesun crecemento di capital lo crea oportunidadnan inmenso pa eleva full nos pueblo di Aruba, cu entrada universal directamente gekoppeld cu e crecemento di IA Capital.