E pesadiya Venezolano… Por termina bon…?

Nos region ta sigui den noticia internacional, cu varios suceso tur relaciona cu e situacion na Venezuela. Un salida spectacular riba un lancha di ganadora di Premio Nobel di Paz for di su pais pa yega na Corsou a resulta den su yegada un dia despues di e ceremonia, añadiendo mas drama na e asunto. Tin un propuesta di paz di banda Colombiano, y tin un pausa den e ataquenan Mericano riba lancha cu ta transporta droga. Señal di negociacion cu ta involucra varios pais?

Maria Corina Machado a termina su estadia clandestino na su propio pais, y despues di e ceremonianan na Noruega e pregunta ta con e mester bolbe na su pais. Un posible contesta ta cu Noruega (y Suecia) lo pone presion riba e regimen di Maduro pa yega na un solucion pacifico. No mester lubida cu na varios ocasion Noruega den ultimo añanan tabata intermediario entre e regimen y oposicion, loke no a resulta pero e pais di e premio Nobel mester por tin algo di credito na Palacio Miraflores. Ademas, si ta berdad cu Nicolas Maduro a trata di negocia directamente cu gobierno di Trump, un posible envolvimento di Noruega lo por tin efecto positivo. Pero tin mas elemento pa tuma na cuenta den e situacion actual; manera e apoyo, o falta di esaki, pa e regimen di Nicolas Maduro, pa cuminza den e propio region y continente. E gobiernonan na banda izquierdista ta mustrando un division clave, entre esunnan mas radical y otro mas modera. Entre e ultimonan aki tin Brasil, unda gobierno di Lula da Silvaa expresa su rechazo di un invasion Mericano, pero tampoco ta apoya Maduro abiertamente ysin haci un yamado na Maduro pa renuncia. Despues di un apoyo mas fuerte te 2023 pa Maduro, na 2024 despues di e eleccion presidencial na Venezuela, Lula da Silva a tuma un posicion mas cuidadoso encuanto e situacion na e pais bisiña. Despues di algun encuentro cu presidente Trump el a tuma un posicion mas modera. Otro pais importante ta Colombia, unda presidente Petro a caba di ripiti su propuesta pa un solucion pacifico na Venezuela, haci aña pasa na augustus caba: retorno na democracia cu aministia general pa tur esnan envolvi. Petro recientemente ta bao ataque directo di parti di gobierno Mericano, entre otro presidente Trump ta menaza di corta ayudo cu Colombia ta ricibiendo ainda, alegando cu gobierno di Petro no ta haciendo algo pa para produccion y exportacion di cocaina na Colombia. Ademas Petro mester cana cu cuidao ya cu simpatiza de vez en cuando cu Maduro ta algo otro cu sugeri cu Colombia mester bay den e mesun proyecto politico fatal cu e pais bisiña ta experimentando pa mas di 25 aña.

Por bisa cu tin un separacion entre e forzanan izquierdista di e continente, unda solamente gobierno di Nicaragua y Cuba ta apoya Maduro completamente, mientras esunnan mas modera,Colombia y Brasil, ta ademas bisiña di Venezuela y tin interes directo pa e situacion na Venezuela no empeora. Principalmente Colombia mester a ricibi mayoria di miyones di refugiado, sea cu a keda o cu a sigui pa otro pais, y si un conflicto militar prolonga na e pais bisiña explota cu Merca, e repiticion di e tragedia ey no ta algo cu Colombia ta desea.

Mientras tanto ta importante observa e gran ironia cu e regimen Venezolano ta ser ataca pagobierno di Trump, cu den hopi sentido ta tratando di hiba epropio pais, despues di 250 aña di democracia, den direccion di e regimen cu mas Trump ta admira, esun di Putin na Rusia, cu a para modelo pa regimen di Maduro tambe. E similaridadnan ey actualmente no a bin dilanti asina fuerte ainda; tin otro cu ta capta mas atencion manera e recursonan natural di nos bisiña pa cual gobierno di Trump tin demasiado interes. Mas y mas e enfasis awor lo kita di e persecucion di lancha cu droga, y lo hustifica presencia di tanto poder militar cu e cambio di regimen cu gobierno Mericano ta propaga. Esey lo tin un bentaha pa Merca tambe, pasobra Trump ta topando cu mas oposicion interno contra e manera di maneha e accionnan den Caribe y Pacifico di intercepta lancha cu supuestamente ta transportando droga, specificamente e matanza di hende sin ningun clase di proceso di huicio, loke a lanta interogante tocante legalidad y posible responsabilidad di mandatario y militar pa asesinato/crimen di guera. No ta pornada cu den ultimo simannan no tabatin noticia di mas lancha intercepta y elimina.

Loke por spera awor ta un accion di e principal gobiernonan Latinoamericano, incluyendo Brasil y Colombia, pa bin cu un proposicion cu ta aceptable pa tur esnan envolvi. Aki exito no ta garantiza. Presidente Colombiano Petro a sugeri un amnistia general, loke supuestamente mester inclui tambe amnistia pa e crimennan cometi pa e forzanan militar y policial. Mientras tanto tin caso dilanti Corte Penal Internacional na Den Haag contra Maduro y otro figura di su regimen; un di e tanto clabonan cu lo bin dilanti den negociacion. Ta imposible pa keda sin reforma e cuerponan uniforma, cu tin mas di dos decada bao di mando politico Chavista y cu interes economico grandi di e top cu a enriquece nan mes enormemente durante e mas di 25 aña di dictadura. Manera nos a indica na varios ocasion caba, e asunto no ta solamente e eventual salida di Nicolas Maduro, loke por ta e impresion cu publico ta haya di mayoria di noticia internacional. Un cambio di regimen ta encera un proceso largo y dificil.