Te unda colaboracion… Cu Merca ta yega…?

Manera anticipa, ta resulta dificil, como pais bisiña, di no keda involucra den e conflicto entre Merca y Venezuela, cu ademas ta parce di bira mas violento. E incidente na Corsou diabierna pasa y otro diasabra na Aruba, den ambos caso entre un avion civil y un avion di transmision di combustible di forza aereo Mericano, riba su mes ta algo grave cu no mester sucede mas, pero si no tin medida no tin ningun garantia di seguridad pa aviacion civil en general. Pero e incidente ta yama e pregunta tambe ta te unda colaboracion di Reino Hulandes cu gobierno Mericano ta yega. Esaki tambe pasobra den ultimo simannan e relacion entre paisnan Europeo, mayoria di nan den NATO, y e actual gobierno Mericano a yega na un punto severamente delicado, cu ta indica posiblemente hasta e terminacion di participacion Mericano den e tratado di defensa mutuo aki. E documento di seguridad nacional Mericano publica recientemente a resulta un opcion pa strategicamente colabora mas cu Rusia y de paso demonizando e paisnan Europeo cu ta sostene Ucrania den e guera contra Rusia.

Te awor no tin ningun noticia di gobierno di Hulanda cu lo mester a atende e incidente caba cu gobierno Mericano. Si acaso silenciosamente a duna aprobacion pa usa espacio aereo di e islanan, pa cual e gerencia na Corsou ta responsable, lo mester tabatin algun areglo pa no causa peligro pa aviacion civil. Segun noticia internacional e avion militar tabata bula cu su transponder paga, loke a causa cu e avion di JetBlue no por a detecta su presencia, y ademas no a haya notificacion tampoco di centro di control aereo na Corsou. Mientras cu te awor a keda na un incidente, ta importante tin claridad pa por garantiza seguridad pa cada vuelo cu ta drenta y sali na e islanan.

Pero tin mas aspecto pa tuma na cuenta; ta importante pa nos no haya nos mes gradualmente mas involucra den e conflicto aki, manera ta e caso na Trinidad & Tobago, cu ta e otro nacion asina cerca di Venezuela y cu a opta pa colaboracion completo cu forzanan militar Mericano. Riba internet por a mira e descarga di vehiculo militar di fabricacion Mericano na Aruba, sin cu tabatin un splicacion pa nan yegada. Nan a bin pa fortifica nos defensa, posiblemente contra ataque via costa? Esey por parce un medida corecto pa e tipo di accion ey, pero que hubo di posible ataque aereo, por ehemplo como represalia pa e apoyo cu Merca ta haya na nos teritorio. Den un anterior Editorial nos a mustra caba riba e noticia internacional, unda a indica exactamente e lugarnan den Caribe cu ta colabora cu defensa Mericano, exponiendo pa henter mundo cu Aruba y Corsou tambe ta den e grupo ey. E pregunta ta si nos ta bay haya poco poco mas di e pasonan aki, te cu tin un situacion tal cu no por evita cu nos isla por bira blanco di ataque militar Venezolano, den caso cu e conflicto realmente rementa den un guera completo. Si awor caba tin posibilidad grandi di accidente aereo, cu avion civil cargando centenares di pasahero, y cu un claro negligencia di banda Mericano pa seguridad civil, ta con esaki lo ta si e conflicto cuminza di berdad? E consecuencia principal lo ta e clausura completo di espacio aereo, loke ta laga nos, y e otro dos islanan tambe, sin comunicacion aereo. No tin mester di splica ningun hende ki tipo di consecuencia esaki lo tin pa nos economia. Fuera di e ciere di e espacio pa autoridadnan concerni, e conflicto por desencadena tambe den medida di compania di aviacion, cu ta yega na e conclusion cu no tin circunstancia sigur cu nan mester pa por bula y cu consecuentemente ta cuminza cancela vuelo. Ta mas cu claro cu den e asunto aki no por warda te ora algo grave sucede. Nos tur ta corda loke a pasa na Ucrania na 2014, unda ainda tabata tuma lugar vuelo civil riba nan teritorio y cu a conduci na e avion (MH 17) di Malaysia Airlines cu militarnan Ruso a tumba. Den e situacion actual no mester di un accion militar agresivo mes, un simple accidente, djis pasobra forza Mericano ta haya ta bon pa bula cu transponder paga, por causa un accidente grandi, cu centenares di victima, cu tur e consecuencianan pa nos atende despues, di por ehemplo anulacion di biahe, etc.

En todo caso, na e momentonan manera esun aki nos por ripara con fragil nos pais ta pa influencia exterior, riba cual nos no tin ningun control. Cualkier incidente cu ocasiona un ciere economico pa cierto tempo ta significa daño economico y financiero grandi, mientras nos gobernacion no tin ningun tipo di reserva pa compensa nada. No ta agradable pa recorda cu si algo grave mester pasa, keto bay nos tin un debe nacional di Afl. 5.000 miyon y tur e trabao haci te awor pa reduci debe lo ta en vano; nos lo ta ‘back to square one’. Finalmente,pa clarifica un asunto poco conoci na Aruba: den caso di agresion militar contra Aruba (y e otro islanan) no tin un articulo 5 di NATO pa defende nos; e islanan no ta cay bao di e stipulacionnan di e tratado. Sigur cu e cambio den e relacionnan dentro di e paisnan di e tratado mes, e pregunta pa nos lo surgi kico ta e beneficio di ta un punto di apoyo militar pa Merca, cu miras pa futuro.Pregunta pa gobierno di Hulanda, y di Aruba, pa contesta.