Departamento di Agricultura, Cria y Pesca- Santa Rosa, manera semper ta e caso durante e temporada aki, a bin ta premira e situacion di awa di Dam for di algun luna caba pa motibo di e falta di yobida na fin y comienso di aña. Durante e ultimo dianan aki, a tuma nota cu awa di dam ta cabando. Na e mes momento, por confirma cu e demanda pa awa di dam ta sigui halto pa e calor fuerte y e stof di Sahara cu tambe tin un impacto ariba hopi tipo di mata.

Departamento di Agricultura, Cria y Pesca Santa Rosa ta haci un apelacion pa tene na cuenta cu e situacion aki. Tur nos clientela cu ta pidi truck di awa na cantidad halto y paga di adelanta, tene cuenta cu nos lo tuma pago pa entrega di awa cu truck na un cantidad limita. Motibo ta cu nos no por cumpli cu e demanda mientrastanto cu no tin awa.

Santa Rosa tin tur comprension pa e situacion, cu gran parti di nos productornan local ta depende ariba awa di dam, pa nan por minimalisa e uso di awa di WEB Aruba NV y evita gasto halto. Pero como un bon partner di Santa Rosa, nos kier recorda tur nos cunukero y criador nan ariba e opcion di por haci peticion pa e awa subsidia di AWG 5.50 pa cube. Esaki lo sigura cu boso mata/ cosecha no ta bay perdi of cu boso bestia nan no ta keda falta awa fresco pa nan bebe.

Kico ta e rekisitonan pa por haci peticion pa e awa aki?

• E cliente tin un tereno di dominio publico cu un superficie minimo di 400 m², cu ta completamente destina pa uso di agricultura, horticultura y ganaderia, ta eherce un negoshi agrario cu ta registra na registro di comercio di e Kamer van Koophandel en Nijverheid. Pa esnan cu ta registra na Santa Rosa y ta 65 plus.

• Bou di agricultura y horticultura explicitamente NO ta cay cultivo di flor, mata ornamental of cultivo di cannabis.

• E cliente mester usa permanentemente minimo 400 m² di e tereno menciona pa actividadnan di agricultura, horticultura y/of ganaderia. Tambe aki, cultivo di flor, planta ornamental of cannabis no ta inclui.

• E awa cu ta wordo suministra pa medio di e “Meter di Agricultura Comercial” lo wordo entrega pa uso di agricultura horticultura solamente via un sistema di irigacion di goteo, cu linea di distribucion, cranchi di distribucion y slangnan lateral conecta cu slangnan di goteo of transpiracion. E cliente ta responsable pa cumpli cu un bon funcionamento di e sistema aki.

• E cliente ta obliga pa usa e awa proveniente di e meter di agricultura solamente pa su propio tereno y exclusivamente pa actividadnan di agricultura, horticultura y/of ganaderia. No ta permiti en ningun forma pa usa e awa pafor di su propio tereno, ni pa cualkier otro motibo, ni door di e mes persona ni door di tercer partido.

• Den caso di uso di un tanki di buffer, e tanki di almacenahe mester tin un caminda accesibel pa e sistema di suministro di awa via e meter di agricultura, cu e conexionnan necesario pa yena e tanki for di ariba (“top fill”). E sistema mester ta hermeticamente cera sin leakage.

• For di Januari 2021, ta obligatorio pa permiti inspectornan autorisa di Directie LVV&M, Servicio Higienico y/of WEB Aruba N.V. pa subi su tereno pa control di higiene, inspeccion, recoleccion di informacion di produccion of tuma muestra di awa.

• Un cliente mester ta registra na DLVV. Na momento di registracion como agricultor of ganadero, e mester entrega un copia di su documento di huur, erfpacht comercial of declaracion di propiedad, hunto cu ID, y firma un declaracion na DLVV pa confirma cu e lo coopera cu DLVV tocante entrega di informacion y cifra mensual di produccion di su proyecto.

• DLVV lo ricibi cada 15 di luna un “Reporte di produccion” mensual di e cliente.

• Den caso cu un tereno huur wordo kita door di DIP of no ta wordo usa mas pa produccion agricola, e cliente mester notifica DLVV. Despues di esey, e no lo cualifica mas pa e tarifa special pa agricultura of ganaderia. Den caso di cambio di tereno, DLVV mester wordo informa via carta of email na info@santarosa.aw.

• Si un cliente no cumpli cu un of mas di e regla menciona aki ariba, e no lo cualifica mas pa e tarifa special. DLVV lo informa WEB Aruba N.V. inmediatamente tocante terminacion di e derecho.

Na esnan cu ta practica agricultura mas pa hobby, por cuminsa na pensa con pa colecta awa di washmachine pa por muha bo cultivo. No lubida cu ta un cantidad considerabel di awa ta bay perdi na momento di laba paña. Purba na colecta esaki ya cu awendia e detergentenan ta biodegradabel. Ta na momento di laba e paña so e detergente tin efectividad.