Diasabra anochi comunidad di Aruba a bini hunto atrobe pa e prome parada di e temporada di Carnaval 72: Parada Flambeu of miho conoci como “Fakkel.”
E anochi tabata uno caluroso, y a marca un bon comienso di aña pa hopi fanatico di Carnaval. manera ta custumber tur aña, varios grupo a participa den e parada, completa cu banda, bar y claro, participantenan cu a baila y disfruta di e ambiente carnavalesco riba un diasabra anochi fresco y briyante.
Ruta di e parada a sigui e mesun di cada aña, cuminsando na Aruba Entertainment Center pa bay Vondellaan y caba na Rotonde di Turbo.
Secuencia di grupo pa e aña aki tabata lo siguiente:
- TOB Carnival Group
- Dushi Carnival Group
- Los Laga Bai
- Royal Carnival Group
- Champagne Carnival Group
- Empire Carnival Group
- Colours Carnival Group
- Hepa DMC Society
E parada a cuminsa 8or di anochi y durante algun banda a encontra un par obstaculo, cual a resulta cu e parada a dura mas cu loke a anticipa. A reporta cu banda NBO a encontra un problema cu nan generator, cual a causa un paralisis den parada pa casi 1 ora largo. Sinembargo, por a logra reemplasa e aparato y asina continua cu e diversion di e anochi.
Banda AVANTI tambe a encontra un problema, unda cu debi na zonido demasiado duro, e banda no por a participa mas den e parada. Segun otro medio di comunicacion a reporta, e banda tabata plania pa clausura e parada cu un ‘last lap’, pero pasobra esaki no tabata mag, nan lo mester a sali banda di e rotonde di Banco di Caribe. Sinembargo, e situacion di NBO a duna nan un oportunidad pa avansa un poco mas, pero debi na un ‘overlap’ di zonido cu NBO, a dicidi pa retira toch banda di Biblioteca Nacional.
A pesar di par encuentro desagradable cu par individuo, Cuerpo Policial a reporta cu en general, e comportamento durante e festividadnan tabata bon, aplaudiendo e cooperacion di publico pa mantene e celebracion divertido y sano.
