(Infobae) — Aparicion di inteligencia artificial den fotografia ta transforma concepto di autenticidad na Instagram. Adam Mosseri, hefe di e plataforma, a adverti riba e reto cu e sofisticacion creciente di herment di AI ta representa, pasobra pronto lo ta practicamente imposible pa distingui entre imagen real y esnan genera digitalmente. E situacion aki ta forsa e red social evoluciona pa keda relevante pa su usuarionan y creadornan.

Den su cuenta personal riba e plataforma, Mosseri a adverti cu e riesgo principal pa Instagram ta keda atras mientras tecnologia ta avansa. E director a splica cu inteligencia artificial ta permiti crea imagen nan asina realistico cu e frontera entre autentico y artificial casi a desaparece. E abundancia visual aki ta aumenta duda y ta complica confiansa den e contenido cu ta circula riba e plataforma.

Impacto di AI tambe ta modifica gusto y custumbernan di usuarionan. Mosseri a observa cu, debi na plamamento di imagen nan perfecciona door di inteligencia artificial, cada biaha mas creadornan ta busca diferencia nan mes mustrando contenido bruto, sin edicion, cu imperfeccionnan como prueba di realidad. E hefe di Instagram a declara: “Brutesa ya no ta solamente un preferencia estetico: e ta prueba. E ta defensivo. Un manera di bisa: esaki ta real pasobra e ta imperfecto”.

Percepcion di contenido ta pasa pa un cambio importante. Mosseri a adverti cu confiansa lo no depende solamente di contenido visual, sino lo concentra riba identidad y intencion di e persona cu ta publica.

“Autenticidad ta bira rapidamente un recurso scars”, e director a declara. El a anticipa cu e creadornan cu por mantene transparencia y coherencia lo ta esnan cu logra sobresali den un ambiente satura cu produccionnan digital.

Frente di e reto aki, Instagram ta prepara accionnan pa recupera credibilidad visual. Mosseri a anuncia introduccion di etiketa explicito pa contenido genera door di AI y mehoracion den posicionamento di imagen nan original den algoritmo di e plataforma. Ademas, e compania ta compromete di ofrece creadornan tanto herment tradicional como esnan sosteni door di AI, pa yuda nan competi contra e avalancha di contenido sintetico y resalta autenticidad di nan traha.

Tecnologia lo hunga un rol crucial den verifica autenticidad di imagennan. Mosseri a bisa cu fabricante di camara ta studia solucionnan manera firma criptografico na momento di captura, cu lo crea cadena di custodia cu ta permiti proba origen y sigura cu e material no a ser genera of modifica door di inteligencia artificial.

A pesar di e avance nan aki, e hefe di Instagram a critica e tendencia di algun fabricante pa priorisa mehoracion di imagen y a defende rescata balor di imperfeccion como prueba di realidad.

Emergencia di e scenario digital nobo aki ta implica reto y oportunidad pa creadornan di contenido. Profesionalnan lo mester inverti den construi confiansa y duna señalnan di autenticidad, ya cu demanda pa evidencia credibel lo aumenta conforme AI ta refina su capacidad pa simula creatividad humano.

Frente di e reto nan aki, gerencia di Instagram ta enfrenta necesidad di reimagina e plataforma. E añanan binidero lo exigi transformacionnan rapido y profundo pa protehe autenticidad y confiansa di e comunidad.