Corte den Prome Instancia a condena un señora identifica como S.d.C. na tres aña y ocho luna di prison pa fraude a gran escala, malversacion, y labamento di placa, despues cu el a malversa miyones di florin cu clientenan dun’e pa pago di belasting. A duna e sentencia e siman aki den un caso penal treci pa Ministerio Publico, cu tambe tabata envolvi su dos yiu adulto y su ex-pareha.
S.d.C., kende tabata traha como consehero di belasting, tabata acusa di a abusa sistematicamente di su posicion door di desvia fondonan di cliente destina pa pago di belasting. E ofensanan a sucede durante un periodo prolonga entre 2017 y 2022.
Segun corte, multiple cliente a informa cu nan a transferi placa pa S.d.C. pa e por a atende cu nan obligacionnan di belasting; pero en bes di manda e fondonan pa Departamento di Impuesto, el a usa e placa pa metanan personal. Varios victima a entrega keho na Polis despues di a haya aviso y boet di autoridadnan di impuesto pa belasting no paga, a pesar di a paga S.d.C.
Hues a declara cu S.d.C. a admiti na e acusacionnan y cu e investigacion a establece cu el a haya mas o menos Afl. 3.2 miyon for di su clientenan. Di e total ey, mas di 530 mil florin a ser transferi pa cuentanan bancario cu ta pertenece na su yiunan y su ex-pareha. Corte a tuma nota cu S.d.C. no a duna recibo of documentacion financiero apropia, haciendo imposibel pa determina con a gasta e fondonan finalmente.
Ministerio Publico a pidi un castigo di prison di cuater aña. Corte na prome instante a bay di a acuerdo cu un sentencia asina tabata hustifica, mirando e severidad di e ofensanan. Sinembargo, hues a tene cuenta cu argumentonan di defensa tocante retrasonan di procedura, dictando cu Ministerio Publico a surpasa e tempo rasonabel permiti pa sigui cu e caso. Pa e motibo ey a baha e castigo di 48 luna pa 44 luna.
Corte tambe a atende demandanan civil entrega pa e victimanan cu ta busca compensacion. Algun di e demandanan aki a keda declara inadmisibel pa motibo di falta di splicacion di e sumanan reclama. Hues a confirma cu S.d.C. a firma un documento cu ta reconoce responsabilidad pa daño y perhuicio cu ta suma na Afl. 3 miyon florin, cual e mester paga e victimanan. Si e no cumpli cu e obligacion aki, e ta enfrenta 200 dia adicional di prison. Varios demanda a keda aproba, y tambe a impone medidanan di pago specifico.
Ademas di esey, corte a dicta sentencia riba un peticion di Ministerio Publico pa confisca entrada criminal. A determina cu S.d.C. mester paga 87.819,24 florin, representando fondonan someti na confiscacion despues di a kita sumanan otorga na victimanan for di e suma total malversa.
Corte tambe a haya yiu homber di S.d.C. culpabel di complicidad den labamento di placa. Evidencia a mustra cu su mama a transferi fondonan deriva di actividad criminal den su cuenta bancario durante un periodo cu ta surpasa un aña y seis luna. E yiu homber a saca e placa cash y a entrega esaki na su mama. Aunke el a pretende di no ta na altura di e origen ilegal di e fondonan, hues a dicta cu e transaccionnan ripiti mester a lanta sospecho serio. E yiu homber a keda na seis luna di prison.
Corte a yega na un conclusion diferente pa loke ta trata e yiu muhe di S.d.C., kende tambe a ricibi fondo den su cuenta di banco for di su mama y a saca placa cash na su nomber. Hues a dicta cu no tin suficiente prueba pa proba participacion intencional den labamento di placa. Sinembargo corte a haya cu e yiu muher no a logra monitoria e actividad financiero riba su cuenta corectamente y mester a reconoce cu e transaccionnan tabata iregular. P’esey el a keda condena pa labamento di placa no intencional y sentencia na 54 ora di servicio pa comunidad, cu un castigo suplente di 27 dia di detencion si e sentencia no ser ehecuta.
S.d.C. su ex-pareha a keda absolvi di tur acusacion. Segun corte, e investigacion a mustra cu mas o menos 112 mil florin a pasa via su cuenta di banco y cu el a permiti S.d.C. usa su carchi di banco. Sinembargo, corte no a haya proba cu e tabata na altura di e origen criminal di e fondonan. Como resultado, hues a dicta cu no tabatin suficiente base pa un condena y a declar’e inocente.
