Debate parlamentario sin…Debido informacion disponible…?

E siman aki a tuma lugar un reunion den parlamento pa tuma nota di e splicacion ministerial di e situacion regional, a raiz di e sucesonan na Venezuela y specificamente e posible consecuencia riba mercado petrolero. Manera nos a expresa den un Editorial di e siman anterior, nos temor cu e debate lo a carece di informacion, disponible pero no usa, a bira realidad. Principalmente di banda di e parlamentarionan e asunto a termina den un lamento constante di loke industria petrolero a significa pa nos pais den pasado y absolutamente no basa riba informacion actual di e sector petrolero mundial y regional, salvo e ilusion cu e accionnan di gobierno Mericano lo a habri porta pa ‘negoshi’ pa nos tambe. E mandatario yama pa duna splicacion tabatin e dificil tarea di defende decision di gobierno pa desmantela e refineria y usa e area pa otro actividad, desconoci ainda, y di otro banda atende cu cierto diplomacia e speranza cu e sucesonan menciona a lanta den seno politico na Aruba.

Por bisa cu e pensamento casi general tabata cu e accionnan di gobierno Mericano ta brinda oportunidad pa un desaroyo nobo di industria petrolero na Venezuela y cu Aruba di algun manera lo mester por probecha di e situacion aki, pues pakico anto desmantela e refineria? Ban cuminza cu e situacion na Venezuela, kico e ta y kico no. E acuerdo provisional cu aparentemente ta existi ta tocante e parti confisca di crudo, cu ta ser bendi via intermediario internacional, cu e beneficionan riba un cuenta den exterior unda no ta sigur si Tesoro Mericano tin e debido control riba esaki. Ultimo palabra den e asunto aki no ta bisa ainda. Banda di esey lo ta logico cu e parti di produccion di crudo actual Venezolano cu por exporta, por bay pa refinerianan na costa di Golfo Mericano, cu ta diseña pa procesa e tipo di crudo aki y cu ademas den pasado ya tabata ricibi crudo Venezolano. Pa e produccion actual, di poco mas di 1 miyon bari pa dia (bpd), di cual un parti ta pa procesa na Venezuela mes, no tin mester di extra capacidad di refinacion. Pa loke ta inversion pa aumenta produccion di crudo actualmente no tin claridad, ya cu e empresanan grandi di e sector a mustra nan duda pa drenta un pais pa inverti, practicamente bao di e mesun regimen, e mesun legislacion y e mesun sistema legal cu a percura pa nan perde nan propiedadnan, sin recompensa completo. Esaki ta e caso di ConocoPhilips y ExxonMobil. E inversion di sigur US$100 biyon cu Trump ta propone por lo pronto no tin ningun posibilidad di realizacion. E actual productornan na Venezuela, Chevron por ehemplo, por percura pa un aumento modesto di produccion, cu por hiba esaki na 1,5 miyon bari pa dia (bpd) envez di e actual 1,1 miyon bpd. Esaki di ningun manera ta exigi lugar adicional di refinacion den nos region, unda ademas Aruba no lo ta e promer opcion. Tin otro posibilidad mas atractivo den nos region manera Corsou, St Croix (teritorio Mericano) y Trinidad & Tobago. Pa corona obra, gobierno di Corsou a caba di anuncia cu no ta bay habri e refineria mas, lo concentra solamente riba transshipment di petroleo. Pakico Corsou ta descarta reapertura di nan refineria, cu ta den hopi mihor condicion cu e esun di Aruba? Pasobra finalmente ta reconoce, aunke nan no lo bisa esey, cu en realidad no tin espacio mas den nos region pa refineria grandi di exportacion, pues tampoco pa uno na Aruba… Nos a tende nos apreciable parlamentarionan tuma nota di e realidad aki, cu nos tambe como medio ta adquiri via medionan internacional cu ta disponible na nos tur…?

Loke nos por a scucha tambe ta e opcion – ilusorio – di un refineria completamente nobo. Nos ta bisa ilusorio pasobra ni den caso di un demanda mundial creciente no lo tin mester mas capacidad di refinacion, cu no por maneha cu loke tin na refineria existente. Como prueba ‘cerca di cas’ por mustra riba e refinerianan na Venezuela, cu ta pa gran parti daña o sub-utiliza. Rehabilitacion di esakinan, di un capacidad combina di mas di 1,5 bpd, semper lo tin prioridad, di banda Venezolano en todo caso. Pa 2050, International Energy Agency (IEA) ta anticipa un crecemento di demanda petrolero cu 13 miyon bpd, 13% mas cu e 100 miyon bpd di 2024. Y pakico no mas? Pasobra gran parti di mundo ta sigui promove produccion di energia renovable, aunke actual gobierno Mericano ta bayendo den direccion contrario, den nan afan pa no solamente explota tur produccion petrolero na nan propio pais, sino tambe podera di e reservanan petrolero cu ta pertenece na otro nacion di nos continente.

Finalmente, e mandatario a yega mas o menos na un acuerdo cu e sala pa instala un comision cu ta bay sigui e acontecimentonan riba e tereno aki. Esey ta un bon manera pa apacigua e actual preocupacionnan, pero di igual manera lo mester yega un biaha na reconoce e realidad existente, unda e comision por haci bon trabao treciendo e informacion actualiza y detaya, cu obviamente awor no ta den poder di e parlamentarionan. De paso e comision lo por contempla e posibilidadnan mas amplio di e tereno di refineria, entre otro di e uso di e facilidadnan portuario, incluyendo un posible adicion di un puerto di transshipment di container, si e situacion di transporte mundial, cu vista riba canal di Panama, ta faborable pa esaki. En todo caso, obsesion cu un refineria no ta yuda mira nos futuro cu realismo.