Recientemente, Oficina Central di Estadistica a comparti e Indice di Prijs di Consumo pa luna di december 2025. Den esaki a inclui informacion tocante e periodo di december 2024 pa 2025, resaltando cu 7 di 12 sector a registra aumento di prijs den ultimo 12 luna.
Indice di Prijs di Consumo
Den e ultimo diesdos (12) luna, e CPI a subi cu 0.4%, unda shete (7) di e diesdos (12) sector a registra aumento di prijs.
E aumentonan cu tabatin e mayor efecto riba e CPI a ser registra pa e sector di “Vivienda” (1.6%), “Restaurant y hotel” (6.3%) y “Restante bienes y servicio” (1.8%), causando un efecto di respectivamente, 0.42, 0.31 y 0.22 ppt.
E aumentonan den e sector restante a contribui cu un efecto di 0.33 ppt riba e CPI di December 2024 te cu December 2025.
E aumentonan aki a ser contraresta parcialmente door di caidanan den e indicenan di e sector di “Mobilario” (-3.9%), “Recreacion y cultura” (-3.3%) y “Paña y sapato” (-6.6%), cu a contribui cu un efecto di respectivamente, -0.35, -0.29 y -0.15 ppt.
E caidanan den e sector restante a contribui cu un efecto di -0.12 ppt riba e CPI di December 2024 te cu December 2025.
E aumento den e sector di “Vivienda” a ser causa principalmente door di un aumento di 2.6% den e categoria “Mantencion y reparacion di vivienda”, causando un efecto di 0.15 ppt.
E aumento den e sector di “Restaurant y hotel” a ser causa principalmente door di un aumento den e categoria “Cuminda pafo di cas” (3.7%), causando un efecto di 0.18 ppt.
E aumento den e sector di “Restante bienes y servicio” a ser causa principalmente door di un aumento di 9.6% den e categoria “Otro articulonan personal”, causando un efecto di 0.12 ppt.
E caida den e sector di “Mobilario” a ser causa principalmente door di un caida den e categoria “Aparato pa uso domestico” (-6.8%), causando un efecto di -0.15 ppt.
E caida den e sector di “Recreacion y cultura” a ser causa principalmente door di un caida di 16.5% den e categoria “Vacacion”, causando un efecto di -0.39 ppt.
E caida den e sector di “Paña y sapato” a ser causa principalmente door di un caida den e categoria “Paña” (-7.3%), causando un efecto di -0.13 ppt.
Canasta di consumo
Den e ultimo aña cu a pasa 49.5% di productonan den e canasta di consumo di e CPI a conoce un aumento di prijs causando un efecto di 2.43 ppt, mientras cu 41.2% ta mustra un caida di prijs, cu a contribui cu un efecto di -2.06 ppt y pa e restante 9.3% no tabatin cambio den prijs.
E indice di “Bienes” (-0.3%) a registra un caida y a causa un efecto di -0.16, mientras cu e indice di “Servicionan” a registra un aumento di 1.2% y a contribui cu efecto di 0.52 ppt riba e CPI.
Bestaansminimum
Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-14) a registra un aumento di Afl. 26, di Afl. 5,511 na December 2024 pa Afl. 5,537 na December 2025.
E aumento aki a ser causa principalmente door di aumentonan den e sector di “Vivienda” (Afl. 27) y “Cuminda y bebida no-alcoholico” (Afl. 17).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un caida di US$ 11.92 (-17.0%) di US$ 69.94 na December 2024 pa US$ 58.02 na December 2025.
E indice di Energia a baha cu 1.5% den e ultimo aña y a causa un efecto di -0.24 ppt.
E indicenan di “Gasolin” (-5.3%) y “Diesel” (-0.7%) a registra caidanan, causando un efecto di respectivamente, -0.24 y -0.00 ppt riba e CPI.
E indicenan di “Electricidad” y “Awa” no a registra cambio, mientras cu e restante 404 bienes y servicio hunto, a conoce un aumento di 0.7% y tabatin hunto un efecto di 0.60 ppt.
Cambio di prijs di Cuminda y servicio di catering
Den e ultimo diesdos (12) luna e indice di “Cuminda & servicio di catering” a subi cu 1.6%.
E indice di “Cuminda na cas” a conoce un aumento di 0.8%, unda shete (7) di e diesun (11) indicenan di e gruponan di “Cuminda na cas” a subi durante e periodo aki.
E indice di “Sucu, jam y otro tipo di cos dushi” a conoce un aumento di 5.0%, e aumento mas grandi entre e gruponan di “Cuminda na cas”.
Ademas, otro aumentonan significante a ser registra den e indicenan di “Bebida no-alcoholico” (4.3%), “Azeta y otro productonan traha di vet” (3.7%) y “Fruta” (3.3%).
E caida mas grandi durante e periodo aki a ser registra den e indice di “Pisca y otro cuminda di lama” (-5.4%).
E indice di “Cuminda pafo di cas” a registra un aumento di 3.7% den e ultimo diesdos (12) luna. Den e ultimo diesdos (12) luna, “Cuminda na cas” y “Cuminda pafo di cas” como grupo, tabatin un aumento di prijs di 1.6% y hunto tabatin un influencia di 0.27 ppt riba e CPI, mientras cu e restante bienes y servicio hunto a experencia un aumento di prijs di 0.1% y tabatin un efecto di 0.10 ppt riba e CPI.
