(AFP) – Autoridad di proteccion di dato di Austria a duna orden na Microsoft pa stop usa cookies den software educativo, segun un grupo di campaña pa privacidad a informa diaranson, marcando e ultimo victoria contra e gigante tecnologico Mericano.
E European Center for Digital Rights, conoci como Noyb (“None of Your Business”), a presenta dos keho contra Microsoft den 2024, alegando cu su software educativo, cual ta ser usa ampliamente na scolnan, ta violando derecho di proteccion di dato di mucha.
Aña pasa, e Autoridad di Proteccion di Dato di Austria (DSB) a determina cu Microsoft tabata “ilegalmente” sigui studiantenan usando su software educativo y cu mester duna nan acceso na su dato.
Den e decision mas reciente, fecha 21 di januari y comparti pa Noyb, DSB a conclui cu Microsoft no tin un “base legal” pa procesa “dato personal” y cu, p’esey, mester stop “di usa cookie cu no ta tecnicamente necesario dentro di cuatro siman”.
Segun Noyb, e cookie — cu ta analisa comportamento di usuario pa proposito di publicidad y otro uso — a ser instala riba dispositivo di studiantenan sin consentimento.
“Rastreamento di menor di edad claramente no ta amigabel cu privacidad”, Felix Mikolasch a bisa, abogado di proteccion di dato na Noyb, den un declaracion.
Un vocero di Microsoft a bisa AFP cu e compania ta revisando e decision. Segun e, Microsoft 365 for Education ta cumpli cu tur standard rekeri di proteccion di dato y institucionnan den sector educativo por sigui usa e software den conformidad cu regulacion Europeo di proteccion di dato.
Noyb a lansa centenares di caso legal contra companianan tecnologico grandi, cu frecuentemente ta provoca accion di autoridad regulador.
