Un publicacion recien riba rednan social di e cantante Arubiano Jeon a lanta combersacion tocante e reconocemento mundial di roadmarch como un genero musical. Den su publicacion, Jeon a declara cu e aña aki roadmarch lo keda registra mundialmente como un genero musical. E publicacion a ser ricibi positivamente cu hopi ciudadano entusiasma pa trece roadmarch back den carnaval.
Jeon su mensahe ta bay mas leu cu e pretension inicial y ta trece un splicacion mas amplio di con generonan nobo ta surgi. El a enfatisa cu generonan musical no ta ser crea door di institucionnan di un dia pa otro, pero mas bien ta desaroya organicamente den transcurso di tempo a traves di uso consistente door di artistanan y aceptacion di publico.
Segun el a sigui splica, un di e pasonan mas importante pa establece un genero nobo ta scoge un nomber y us’e consistentemente riba plataformanan manera servicio di streaming, rednan social, materialnan di prensa y entrevistanan. Ora e nomber ey ser adopta y ripiti pa otronan, eventualmente e por haya reconocemento manera un genero musical.
E publicacion a lanta discusion tocante generonan di musica y a renoba atencion riba soca, un genero di musica Caribense bon estableci cu su nomber ta bini di e frase “Soul of Calypso.” Soca a origina na Trinidad y Tobago na comienso di añanan 1970 y for di e tempo ey a bira un zonido definitivo di celebracionnan di carnaval den henter Caribe y su diaspora. E genero ta conoci pa su temponan rapido, ritmonan di energia halto, y uso pisa di instrumentonan sintetisa, diseña pa encurasha baile. Mientras cu soca ta mas estrechamente asocia cu temporada di carnaval, e ta ser toca tambe henter aña na radio, den clubnan y na festivalnan.
Den contraste, roadmarch no ta un genero como tal, ainda, sino un titulo di competencia dentro di cultura di carnaval y como un parti esencial di carnaval, Jeon a tuma iniciativa pa formalisa registra roadmarch oficialmente como un genero musical pa e sigui biba den carnaval pa futuro generacionnan.
El a declara cu e no ta bay sigui debati riba e tema y a dicidi firmemente pa registra e zonido y estilo di musica di carnaval mas brasa na Aruba como “roadmarch.” El a argumenta cu generonan musical semper a evoluciona for di otro, señalando cu soca a desaroya directamente for di calypso, cu riba su mes a origina for di generonan anterior. For di su perspectiva, e progresion natural aki ta hustifica e creacion di un nomber di genero nobo, y e ta sostene cu niun hende no por strob’e di registra y usa roadmarch como un genero musical nobo, expresando confiansa den su posicion a pesar di puntonan di bista opuesto.
