(AFP)—Un mucha homber di 13 aña conta diamars con el a landa pa cuatro ora largo den awanan bruto na costa di Australia pa yuda su famia den un logro yama pa rescatistanan como “superhumano.”
E mucha, cu yama Austin Appelbee, a landa cuatro kilometer di ocean pa bati alarma despues cu su mama y dos ruman chikito a ser hala mas pafo di e costa. El a bay kayak y paddle-board riba lama diabierna atardi cu su famia. Pero e olanan a crece, cual a bolter e plankinan y a yena nan kayak cu awa mientras nan a ser pusha mas pafo. “Mi tabatin hopi miedo,” e hoben a conta reporteronan.
“Mi tabata djis pensando den mi cabes, pensando con mi ta yega. Pero tambe mi tabata pensando riba tur mi amigonan na scol, y mi amigonan den les di bijbel,” el a bisa. “Mi a djis bisa: ‘bon, awe no, awe no, awe no. Mi mester djis sigui.”
E hoben a bisa cu el a cuminsa landa bay canto cu apenas su salbabida pero despues a bandona esaki pa landa sin restriccion. “Mi tabata hopi cansa, pero mi no por a sintie.”
E hoben a bisa cu e tabata purbando di pensa riba cosnan feliz, na dado momento cantando e cantica di e show di mucha “Thomas the Tank Engine.”
“Pa e ora aki, e olanan tabata masivo, y mi no tabatin salbabida bisti. Pero mi a keda landa. Mi ta haci breaststroke. Mi ta haci freestyle. Backstroke pa sobrevivencia.”
“Mucha cu curashi”
Ora el a yega canto, e adolescente a bisa cu el a yama servicionan di emergencia y a puntra nan pa desplega boto, helicopter y avion, bisando nan: “Mi famia ta perdi riba lama.”
Rescatista marino Paul Bresland a bisa cu e landamento di e hoben a salba su famia, ken al fin a ser haya wantando na un paddleboard den e ocean habri cerca di ciudad Quindalup.
“El a landa, segun e ta recorda, e prome dos ora cu un salba bida bisti,” Bresland a conta emisora nacional ABC. “Y e mucha cu curashi aki a pensa cu e no ta bay haal e cu un salba bida, pues el a kit’e y el a landa e proximo dos ora sin salbabida.”
“Mi a pensa, esey ta increible,” Bresland ta bisa, describiendo e esfuerso di e mucha como “superhumano.”
Inspector policial James Bradley a bisa cu e accionnan di e mucha “no por haya elogio suficiente.”
“Su determinacion y curashi a salba e bida di su mama y su rumannan,” el a conta ABC. E mama di e mucha, yama Joanne, tambe a haya elogio pa mantene su famia bibo durante oras riba lama cu su otro yiu homber di 12 aña Beau y yiu muher di 8 aña Grace.
“Un di e decisionnan mas dificil cu mi a tuma tabata pa bisa Austin: ‘purba yega canto y busca ayudo, e cos aki por bira serio rapidamente’,” segun e mama a bisa.
“Mientras solo ta baha mi a pensa: ‘Algo a bay hopi robes,’ y mi miedo tabata cu Austin no a logra yega canto,” el a bisa.
