Dialuna, Fundacion Respaldo a publica un comunicado den cual a duna un splicacion breve tocante nan servicio di crisis. E comunicado aki ta sigui e caso lamentable unda un tiramento di polis a resulta den e morto di un pashent bao nan cuido.

Dia 27 di januari a cuminsa como un dia normal pa F.M. Henriquez y su famia, unda e tabata planea pa pasa su dia na cas hunto cu su mama y sobrina despues di ser descarga for di Respaldo. Sinembargo, locual mester tabata un dia di pasa hunto den famia a bira un dia cu a cambia e bida di famia Henriquez ora FACT Team di Respaldo diripiente a yega na su cas exigiendo cu e mester bay back, debi na un fout administrativo di nan banda.

Ora cu Cuerpo Policial a ser yama pa yuda calma y transporta e victima back na e institucion, e situacion a escala rapidamente y a resulta den un tiramento den cual Henriquez lamentablemente a perde su bida.

Aruba a keda paralisa un bes mas ora e noticia di e tiramento a surgi den noticia, unda F.M.H. di 35 aña a perde su bida. E caso aki a causa hopi disgusto y a recorda pueblo di un otro caso lamentable di A.C. Lanoy cu a sucede casi un aña pasa caba, unda Cuerpo Policial tambe a recuri na los tiro riba un hoben durante persiguimento. E caso di Henriquez a empeora e frustracion cu pueblo tabata reserva caba pa Cuerpo Policial, y a stimula aun mas e discusion tocante maneho policial den ultimo tempo.

Como contesta riba e incidente y e reaccion publico cu esaki a genera, Comisario di Polis Ramon Arnhem a emiti un declaracion publico expresando condolencia y a urgi pa trankilidad mientras cu e investigacion ta sigui.

“Ayera a tuma lugar un incidente lamentabel. Mi coleganan tabata involucra den un incidente di tiramento na unda un persona lamentablemente a fayece na Pos Abou. Un situacion dificil cu ambos partido a wordo afecta negativamente. Pa un mayor y famia perde un yiu den un forma repentino ta inexplicabel y ta haci hopi dolor,” el a remarca.

El a sigura cu e investigacion a keda den man di Landsrecherche pa motibo cu un funcionario policial ta envolvi.

Di nan banda, Fundacion Respaldo tambe a expresa nan condolencia na famia y a enfatisa cu e incidente tabata uno sumamente lamentable: “Ningun hende no ta desea un resultado asina,” manera a bisa den nan declaracion.

E institucion di cuido specialisa tambe a duna un clarificacion general tocante con e servicio di Crisisdienst ta organisa y ta funciona. Manera e declaracion ta splica, desde october 2024, Respaldo ta dispone di un servicio di crisis 24/7 pa personanan cu problema psikiatrico serio den situacionnan di crisis.

E servicio aki ta forma un parti integral di e FACT-team di Respaldo, unda profesionalnan di cuido specialisa ta ehecuta e servicio. E institucion a subraya cu e servicio aki ta enfoca riba evaluacion, stabilisacion y tratamento di crisis psikiatrico, preferiblemente den un fase mas trempan posible.

Tambe a splica cu e servicio di crisis ta funciona den un cadena di colaboracion cu diferente partner, incluyendo KPA ora ta necesario. Esaki ta pa garantisa seguridad publico y servicio di transporte pa traslada e cliente, manera a sigura.

Banda di esaki, no a duna mas detaye tocante e caso pa motibo di privacidad di e famia involucra. Fundacion Respaldo a sigura cu nan ta dunando espacio pa e investigacion cana su caminda.

Comunidad ta critica maneho di Respaldo

Na momento cu e noticia aki a surgi riba red social, hopi usuario a lansa pregunta tocante e maneho di no solamente Cuerpo Policial sino tambe e FACT-team di Respaldo. Aunke Respaldo a splica cu colaboracion cu KPA ta protocol pa situacionnan posiblemente peligroso, hopi a cuestiona pakico e equipo mester a yama pa polis mes, specialmente mientras tabata conoci cu e homber tabatin miedo di polis. Manera un usuario a comenta: “Dicon Respaldo a manda polis knowing cu e mucha homber ki tin angst di polis? e acto aki mas sigur a ocasiona un trigger inmenso cu e mucha homber no por a controla…”

Segun familiarnan, personal di Respaldo despues a bay cas di Henriquez na Pos Abou compaña pa polisnan pa bay cune Respaldo back. E miembro di famia a declara cu Henriquez tabatin miedo di polis pa hopi tempo, un hecho cu e ta bisa tabata conoci pa tanto e famia como e team di Respaldo. Mas aleu nan ta alega cu den situacionnan anterior, Henriquez a ser transporta cu ambulance y remedi pa yuda calm’e, loke nan ta bisa no a sucede na e ocasion aki.

Cu esaki, varios a lansa critica riba e institucion, expresando nan disgusto cu con e profesionalnan a maneho a situacion.

“pa prome biaha respaldo ta fout den esaki si bo tin den boso kwido un persona i boso sa ku e tin miedu di polis i riba dje si ta fout jama e mama laga nan mes bin kune back na respaldo.”

“E caso aki ta papia hopi di profesionalismo di zowel Respaldo als KPA.”

“[…]día pa día Respaldo ta mustra cu nan no ta capacita pa deal cu persona nan cu ta sufri di salud mental grave […]”

Banda di esaki, hopi den comentario ta exigiendo husticia pa e victima, cu algun haciendo yamado pa trece cambio den maneho di polis: “Gobierno Hasi algo paso koki ta innaceptable,” segun un usuario ta bisa.

Den su declaracion, Respaldo no a divulga mucho tocante e investigacion mes, incluyendo si e equipo involucra tambe tabata bao di investigacion, declarando cu “no ta considera apropia pa adelanta riba e resultadonan ni pa haci declaracion di contenido riba esaki.”

E suceso aki a keda marca atrobe pa loke hopi den comunidad a acusa di ta mal maneho di tur dos institucion profesional involucra. Cu tempo lo mira e resultadonan di e investigacion riba e tiramento, pero den bista publico, institucionnan gubernamental ya ta perdiendo mas confianza cu cada caso cu surgi.