Durante un reunion publico reciente cu Minister Mervin Wyatt Ras di Salubridad, riba e situacion actual di nos grandinan na Aruba, Parlamentario Xiomara Maduro a haci pregunta na e mandatario pa haya claridad riba e cuido y sostenibilidad di e sistema social, un topico cu ta preocupa hopi hende den comunidad, specialmente e grupo di pensionadonan.
Parlamentario Maduro a haci un serie di preguntanan critico, cu ta enfoca riba futuro, responsabilidad gubernamental y dignidad di nos grandinan.
Entre e preguntanan presenta, ta inclui:
Con e fondo di SVB y AZV ta para pa e proximo 10 aña? Tin sostenibilidad financiero a largo plazo?
Gobierno tin plan pa saca e surplus for di e fondonan social via schatkistbankieren pa paga debe di estado, y con esaki lo afecta seguridad social?
Ki efecto e legalisacion di ilegalnan segun e maneho di Minister Dowers tin riba e fondonan di AZV y SVB, tanto na termino corto como largo?
Tin un plan concreto pa uza e experiencia y profesionalismo di pensionadonan cu ainda por y kier sigui aporta na solucionnan pa Aruba?
Kico mester wordo prevení awe pa logra cu nos grandinan por keda mas vital y independiente den nan edad avansa?
Ki plan tin pa haya mas personal cualifica pa yuda den e tehuizen?
Ki tipo di incentivo of motivacion gobierno tin pensa introduci pa stimula hende pa traha den e tehuizen?
Con ta para cu e casnan pa nos grandinan, y tin suficiente vivienda digno adapta pa nan necesidadnan?
Segun Parlamentario Maduro, e pensionadonan ta na altura di e retonan cu Aruba ta enfrenta, pero nan kier claridad y accion. Nan deseo principal ta, pa tende kico concretamente ta wordo haci pa garantisa cu nan por sigui biba nan bida di pensionado na un manera digno, cu cuido, respet y seguridad.
“E enfasis no solamente mester ta pa resolve problema di awe, pero mester pensa seriamente riba e futuro di nos grandinan y di e sociedad Arubiano en general,” Parlamentario Xiomara Maduro ta enfatisa.
E reunion a keda posponi te proximo aviso y ta di spera cu Parlamento y Pueblo no mester warda mucho mas pa asina scucha e contestanan concreto di Minister Wyatt Ras.
