Cu su presupuesto adopta pa 2026, Aruba ta cumpli cu e normanan financiero poni den e Ordenansa Nacional di Supervision Financiero di Aruba (LAft). Esaki ta e conclusion di Colegio di Supervision Financiero di Aruba (CAft) den un carta di conseho pa Minister di Finanzas, Asunto Economico y Sector Primario, Geoffrey Wever. Segun CAft, Aruba a presupuesta un surplus di financiamento di mas o menos 2.6% di e producto interno bruto (GDP) pa sector publico na 2026, cumpliendo asina cu e norma minimo di 1%.

CAft ta bisa cu e saldo di financiamento den e presupuesto di mas aña tambe ta keda riba e standard. Na mesun momento, e Colegio di Supervision ta tuma nota cu e margen presupuestario disponibel ta ser usa principalmente pa intensificacion di politica structural y reduccion di debe, y casi no pa inversionnan. Segun CAft, e nivel di inversion den e presupuesto ta keda abao, parcialmente debi na e capacidad di implementacion limita den seno di gobierno.

Den su carta di conseho, fecha 21 di januari 2026, CAft ta pidi pa gobierno considera varios punto clave den e prome amienda di presupuesto di 2026.

Un di e puntonan mas importante ta e peticion pa substancia miho e desaroyo di gastonan pa e añanan 2027 te cu 2030. Segun CAft, ainda falta un splicacion cla di e crecemento di gastonan den e pronostico multianual, loke ta pone realismo di e presupuesto na peliger. Tambe e Colegio ta pidi mas aclaracion riba posibel medidanan, incluyendo esnan relaciona cu gastonan di personal.

Mas aleu CAft ta urgi Aruba pa mas pronto posibel formalisa acuerdonan pa loke ta trata uso di surplusnan di Algemene Gezondheidsverzekering (AZV) y Banco di Seguro Social (SVB) pa reduccion di debe. E presupuesto ta supone cu e surplusnan aki lo ser usa pa baha debe, pero segun CAft, e acuerdonan aki no a ser formalisa oficialmente ainda. Segun e Colegio, esaki ta trece riesgo pa implementacion di e trayecto di reduccion di debe.

LAft ta stipula cu henter e surplus di e sector colectivo mester ser usa pa reduccion di debe. CAft ta enfatisa cu e falta di acuerdonan formal lo por stroba e ehecucion aki.

Banda di esaki e Colegio di Supervision ta pidi pa Aruba formalmente establece e fondo di desaroyo y inversion planea, incluyendo un presupuesto acompañante, pa mas tarda e prome kwartaal di 2026. E fondo aki mester garantisa continuidad di inversionnan door di por reserva recursonan pa varios aña. Segun CAft ainda no a finalisa e legislacion pa cu e fondo aki. E Colegio ta considera importante pa Aruba desaroya un agenda di inversion di varios aña cla y realisticamente factibel, y cu ta duna un bista transparente den e alocacionnan y e uso di recursonan.

Den su rapport di conseho tambe CAft ta expresa duda riba e efectividad di un fondo sin un agenda concreto di inversion. E Colegio ta señala cu plannan di inversion den añanan anterior solamente a ser implementa den un grado limita. E Colegio di Supervision ta enfatisa cu Aruba mester inverti den fortifica su capacidad di ehecucion y mehora e preparacion di proyectonan di inversion.

Un otro punto di atencion ta concerni e demarcacion di e sector colectivo. CAft ta bisa cu mester defini e sector aki definitivamente mas pronto posibel pa asina e desaroyo di debe di henter e sector colectivo por ser evalua di forma amplio y definitivo. Tanten cu esaki ta cla, CAft no por evalua full e ratio di debe. E Colegio ta enfatisa cu mester haci esaki den coordinacion cu entre otro CBS Aruba, CBS Hulanda, y ministerio di Interior y Relacionnan den Reino.

Di acuerdo cu e presupuesto, e debe di sector colectivo ta suma AWG 4.596 miyon na fin di 2026, ekivalente na 56% di GDP. A base di suposicionnan actual, e debe aki lo baha te na AWG 4.204 miyon na 2028, treciendo e relacion di debe na 47% di GDP. CAft ta señala cu e caida aki ta mas lihe cu e trayecto di reduccion di debe den LAft, cu ta asumi un ratio di debe maximo di 50% na 2040.

E cifranan ta mustra cu e entradanan total na 2026 lo suma na AWG 1.945 miyon, un aumento di AWG 63 miyon compara cu e concepto di presupuesto. E aumento aki ta debi principalmente na entradanan di impuesto mas halto. Belasting indirecto, por ehempel, ta ser calcula na AWG 908 miyon, un aumento di AWG 38 miyon. E presupuesto ta asumi un aumento di 3.5% den belasting indirecto.

CAft ta señala cu e calculacion aki ta mas halto cu e pronostico macroeconomico mas recien di Directie Economische Zaken, Handel en Industrie di november 2025, cu ta spera un crecemento di GDP di 2.6%. Segun e conseho, ta importante pa sigui considera incertidumbre geopolitico na momento di evalua entradanan di impuesto.

Riba e parti di gasto, e peso lo subi cu AWG 47 miyon. E aumento aki ta ser causa principalmente pa gastonan mas halto pa producto y servicio, subsidio y transferencia. Transferencianan en particular ta aumentando, parcialmente debi na e aumento di e reparatietoeslag pa pensionadonan. Entrante 1 di januari 2026, esaki a ser aumenta cu AWG 150 pa luna. Segun CAft, e impacto structural di e aumentonan anterior y e aumento nobo ta suma por lo menos AWG 140 miyon pa aña. E efecto aki lo aumenta mas ainda den e proximo añanan debi na e poblacion cu ta birando bieu.

Tambe CAft ta trece dilanti cu ley ta stipula cu mester aplica un test di entrada na e reparatietoeslag. Segun e conseho, e ausencia di e evaluacion aki ta aumenta e impacto presupuestario y ta mina e efectividad di e medida.

Pa loke ta e gastonan di personal, CAft ta remarca cu entrante 2027 en adelante, gastonan total di personal mester keda bao di 10% di GDP. E pronostico di varios aña ta mustra cu Aruba ta cumpli cu e standard aki, pero esaki ta basa riba e suposicion cu e gastonan di personal lo keda nominalmente mescos entrante 2027 en adelante. Sinembargo, segun CAft, e medidanan di maneho cu ta destina pa logra esaki no ta ser splica, lagando no cla con control structural di gastonan di personal lo ser garantisa.

E recomendacion di CAft ta subraya cu Aruba lo ta riba bon caminda financieramente na 2026 segun e normanan statutario, pero cu gobierno simultaneamente mester tuma pasonan significativo pa haci e presupuesto di varios aña mas realistico, organisa politica di inversion mas concreto, y consagra formalmente acuerdonan di reduccion di debe.