E cifranan mas reciente di Centrale Bank van Aruba (CBA), publica dia 9 di februari 2026, ta mustra un cuadro mixto di mercado financiero di Aruba den e di cuater kwartaal di 2025. Tin mehoracion pa algun grupo, manera spaardonan, mientras cu otro area, manera costo di fiansa pa gobierno, ta keda relativamente halto. Tambe tabatin movemento continuo den tasanan di cambio internacional.
Un di e desaroyonan mas notabel durante 2025 tabata e aumento di interes riba depositonan di tempo. Den e di cuater kwartaal, e interes promedio pa depositonan di 12 luna of menos a subi te na 3,2%, compara cu 2,0% den e di tres kwartaal. Pa depositonan cu un termino mas largo cu 12 luna, e interes promedio a yega na 4,1%, mas halto cu e 3,6% registra anteriormente. Esaki ta un desaroyo positivo pa spaardonan cu ta dispone pa laga nan placa inverti pa un periodo fiho, pasobra nan a haya un rindimento mas atractivo.
Na otro banda, interes riba depositonan di spaar regular a keda casi mescos. E promedio a keda na 1,6% den e di cuater kwartaal, mesun nivel cu den e di dos kwartaal y un tiki bou di e 1,7% registra den e di tres kwartaal. Esaki ta mustra cu banconan a concentra principalmente riba aumenta interes di depositonan di tempo, mientras cu cuenta di spaar tradicional a keda cu condicionnan relativamente stabiel.
Riba e parti di fiansa, tasanan di interes a sigui baha gradualmente. E interes promedio riba tur tipo di fiansa a baha for di 6,5% den e di tres kwartaal te na 5,9% den e di cuater kwartaal. Credito di consumidor a baha di 7,5% te na 7,1%, mientras cu interes riba hipoteca pa vivienda a keda stabiel na 5,1%. Otro tipo di fiansa a registra un promedio di 6,0%. E movemento aki ta forma parti di un tendencia cu a cuminsa for di 2024 y ta indica cu, poco poco, costo di fiansa pa famia y empresanan ta bira mas modera.
Un otro indicador importante ta e margen di interes, es decir, e diferencia entre loke banconan ta cobra riba prestamo y loke nan ta paga riba deposito. Den e di cuater kwartaal di 2025, e margen aki a baha te na 2,6%, compara cu 3,7% den e di tres kwartaal. E promedio anual pa 2025 tabata 3,2%. Un margen mas chikito ta nifica cu e diferencia entre interes di prestamo y deposito a bira mas estrecho. Esaki por indica mas competencia entre banconan of cambio den condicionnan di mercado cu ta presiona rentabilidad.
Den cuadro di politica monetario, e tasanan di facilidad di prestamo di CBA a keda relativamente halto. Desde augustus 2024, e Facilidad di Prestamo Primario tabata 5,91% y e Facilidad di Prestamo Secundario 6,41%. E Facilidad di Prestamo Tercero ta determina caso pa caso. E tasanan aki ta influencia e costo di likides pa banconan comercial y ta refleha e ambiente internacional unda interes tabata relativamente halto.
CBA tambe ta paga interes riba depositonan cu banconan comercial ta tene na e banco central. Pa 2025, e promedio anual pa deposito di 7 dia tabata 0.8% y pa 30 dia 1,0%. Den e di cuater kwartaal, esakinan a baha levemente te na 0,7% y 0.9% respectivamente. Esaki ta indica un reduccion leve den e rindimento riba exceso di likides cu banconan ta pone na e banco central.
Riba mercado di titulonan di gobierno, papelnan di Tesoro di tres luna a sigui ser emiti regularmente. Rindimento durante 2024 a move rond di 3%, despues di a yega 3,60% na fin di 2023. Certificadonan di cash di seis luna, aunke menos frecuente, a mustra rindimento di 2,00% na september 2023 y 3,00% na maart 2024.
Riba termino mas largo, gobierno di Aruba a sigui haci uso di emision di fiansa. Na juni 2025, un fiansa di 14 aña den florin di Aruba, cu un balor di Afl. 100 miyon, a registra un rindimento di 5,190%. Den e mesun luna, un fiansa di 8 aña di Afl. 65 miyon a registra 4,510%. E cifranan aki ta mustra cu costo di fiansa pa gobierno ta keda relativamente halto compara cu e periodo despues di pandemia, reflehando e tendencia mundial di interes mas halto.
Riba termino di tasa di cambio, Aruba ta mantene su tasa fiho na e dollar Mericano, pero otro monedanan ta fluctua segun mercado internacional. Durante 2025, e dollar Canades a registra un promedio di 1,291, compara cu 1,317 na 2024. E libra Britanico a subi te na un promedio di 2,391, mas halto cu e 2,319 di 2024. E franko Suiso tambe a mustra un aumento, y e yen Hapones a registra un promedio ligeramente mas halto cu aña anterior. E euro a mustra fortalesa, cu un promedio di 203,484 na 2025 compara cu 194,711 na 2024. Na fin di 2025, hopi di e monedanan aki a cera mas halto cu nan nivel di fin di 2024, reflehando movemento internacional contra e dollar Mericano.
Segun CBA, e tarifanan oficial publica ta tarifanan minimo di benta, fiha diariamente basa riba mercado medio contra e dollar. Pa transaccionnan grandi, tarifa por ser negocia directamente cu banconan.
Den resumen, e di cuater kwartaal di 2025 ta mustra cu spaardonan cu depositonan di tempo a beneficia di interes mas halto, mientras cu prestamista a mira un bahada gradual den tasanan di fiansa. E margen di interes mas chikito ta indica un cambio den e relacion entre deposito y prestamo. Na mesun momento, costo di fiansa pa gobierno a keda relativamente halto y tasanan di cambio a sigui refleha e dinamica di mercado internacional.
