(AFP)—Mundial no ta solamente tocante futbol: FIFA ta recuri na superstrea di musica pa eleva e competencia na nivel di un evento cultural mundial, ampliando su alcance mas leu di fanaticonan di deporte.
For di artistanan mundialmente famoso actuando durante ceremonia di apertura te cu un show di halftime sin precedente estilo Super Bowl durante e final, aki ta kico a sucede durante apertura di Copa Mundial na Mexico.
Un apertura musical
E festividadnan a cuminsa diaranson, un dia prome cu e torneo, cu conciertonan na Ciudad di Mexico, Toronto y Los Angeles cu a combina superstrea internacional y figuranan regional importante.
Entre e nombernan grandi tabatin cantante pop Mericano Katy Perry, artista Canades Alanis Morissette, rapero Mericano Future, figura di pop urbano Brasilero Anitta, icono di K-pop Tailandes Lisa y superstrea Nigeriano di afrobeats Rema.
Nan a presenta hunto cu artistanan cu hopi siguimento den nan propio pais, manera e grupo Mexicano Los Angeles Azules, cantante di Bollywood Nora Fatehi y rapero Frances Vegedream.
“Tin un esfuerso coordina rond di Mundial FIFA y su equipo di marketing pa usa musica como un forma di conecta cu diferente audiencia for di tur parti di mundo,” Clayton Durant, empresario den industria musical y profesor na Universidad di New York, a bisa.
E iniciativa aki no ta nobo: na 2021, FIFA a lansa su programa FIFA Sound, describiendo e como “un strategia pa conecta cu audiencia mundial via e pasion comparti pa futbol y musica.”
Un gran final
E evento mas impactante lo ta e halftime di e final, programa pa dia 19 di juli na stadion MetLife na New Jersey.
Pa prome biaha, e show lo inclui un concierto cu tres superstrea mundial: cantante Mericano Madonna, superstrea Colombiano Shakira y grupo Sur Coreano BTS.
E seleccion di e artistanan ey a ser crea den e “spirito di purba uni henter mundo,” Hugh Evans, director di NGO Global Citizen, cual ta produciendo e show, a bisa.
Imagina pa Chris Martin, cantante principal di Coldplay, e actuacion di halftime ta diseña pa resalta “lo mihor di humanidad” y “tur loke ta uni nos,” Evans a bisa AFP.
El a bisa cu e suma gasta pa produci e evento ta comparable cu e show di halftime di Super Bowl — e final di campeonato di futbol Mericano. Segun fuentenan, esey ta entre 10 y 20 miyon dollar.
E artistanan mes lo presenta gratis.
E show ta destina pa sostene un fondo educativo cu FIFA — regularmente critica pa pone ganashi financiero prome — a establece hunto cu Global Citizen.
Un hit nobo?
Pa e cancion oficial di Mundial, FIFA a bay cu un opcion sigur: Shakira. E tabata tras di “Waka Waka”, e himno di Mundial 2010 cu a bira un sensacion mundial.
Su cancion nobo “Dai Dai”, interpreta hunto cu cantante Nigeriano Burna Boy, ta combina pop Latino cu afrobeats.
E ta aparece riba un album oficial cu 18 cancion cu tambe ta inclui e grupo electronico Major Lazer, artista di reggaeton Daddy Yankee y e grupo Rolling Stones — atrobe mesclando generonan musical ampliamente.
Exposicion pa artistanan
E artistanan cu ta participa den e conciertonan transmiti mundialmente tin hopi di gana na nivel di visibilidad.
Durant a bisa cu esnan cu ta presentando lo haya “fanaticonan cu posiblemente nunca no a tende di nan, y lo cuminsa gana hopi atencion nobo, fanaticada nobo y mas consumo di nan musica y propiedad intelectual.”
Mundial tambe ta crea oportunidadnan pa musiconan cu mas experiencia manera Madonna, kende na 67 aña no tabatin un exito grandi desde “Confessions on a Dance Floor” na 2005.
E concierto di 19 di juli ta representa un oportunidad pa cende e chispa atrobe durante promocion di su album nobo “Confessions II”, programa pa ser lansa dia 3 di juli.
