Resultado di un auditoria interno reciente di Utilites Aruba N.V. y su subsidiario, Aruba Wastewater Sustainable Solutions (AWSS) a keda comparti cu Colegio di Supervision Financiero (CAft), pero gobierno no a haci e resultadonan aki publico.

E presentacion, cu a tuma lugar dia 26 di februari ultimo, ta marca un prome stap den reconoce problemanan structural na dos di e companianan di utilidad mas critico di e isla – maske ta lanta mesun hopi pregunta cu loke ta contesta.

Director di Utilities, Joseph Everon a presenta hallazgo di e auditoria na miembronan di CAft, den presencia di minister di Husticia, Integracion, Transporte Publico y Energia, Arthur Dowers (AVP). Segun un comunicado di gobierno, Everon tambe a delinea plan desaroya a base di recomendacionnan di e doorlichting. E obhetivo, gobierno a bisa, ta pa atende e fayonan identifica y pa pone un fundeshi structural pa futuro di tanto AWSS como Utilities Aruba.

Kico exactamente e fayonan ta, y con serio nan ta den termino financiero, ta keda desconoci. Cifra, timeline pa accion corectivo of fecha pa publicacion di e rapport completo no a keda publica.

Supervision cu memoria largo

CAft, cu ta supervisa finanzas publico di Aruba den nomber di Reino Hulandes, a expresa su ponencia den su propio comunicado di prensa e siguiente dia. Den un declaracion cu fecha 27 di februari, CAft a pone un linea directo entre e situacion actual y un patronchi di mal maneho den companianan propiedad di estado na Aruba – varios di nan hereda for di e gabinete anterior.

“Companianan den cual gobierno tin participacion, ta importante pa e pais, pero nan ta trece riesgonan financiero tambe,” CAft a skirbi, citando un cantidad di ehempel concreto. Na AWSS, a desaroya plan pa saca prestamo innecesariamente caro den mercado habri. Na Utilities, a usa dividendo sin aprobacion di e accionista – den e caso aki, gobierno mes. Y na Refineria di Aruba (RdA), financiamento y procuramento pa varios proyecto grandi a procede riba terminonan no faborable.

Den caso di e prestamonan di AWSS, CAft a nota cu intervencion si a tuma lugar na tempo – parcialmente riba conseho di CAft mes – preveniendo loke lo a bira un peso financiero mayor riba finanzas publico.

Origen di AWSS: Un structura caro for di comienso

Pa compronde e situacion actual na AWSS, ta importante pa bay back na su creacion. E compania a keda estableci bao e gabinete anterior di prome minister Evelyn Wever-Croes (MEP) tempo cu e infrastructura di tratamento di awa – anteriormente maneha pa departamento di obra publico di gobierno, DOW – a keda transferi na un corporacion gubernamental recien crea, AWSS, como un subsidiario di Utilities Aruba N.V.

CAft a expresa preocupacion serio tocante e structura aki for di comienso. Den audiencia parlamentario, presidente di CAft e tempo aya, Lidewijde Ongering a adverti cu pone AWSS na un distancia for di gobierno lo fors’e pa busca financiamento den mercado habri na un interes hopi mas halto cu loke gobierno por haya directamente. CAft a calcula cu e escogencia structural aki lo por termina costando pagador di belasting di Aruba cerca di 200 miyon florin den cobransa financiero internacional durante e duracion di e prestamo.

“Presupuestonan di gobierno no ta suficiente,” Ongering a declara e tempo aya, cuestionando pakico AWSS lo busca un prestamo den mercado cu un costo hopi mas halto – y cuestionando si un areglo asina tabata eficiente.

Awo ta parce cu a atende e advertencia aki apenas parcialmente. Mientras e plan specifico di prestamo pa AWSS eventualmente a stop cu intervencion di CAft, e structura di maneho mes – cual e colegio a identifica como raiz di e problema – a keda na lugar.

AWSS y su importancia

AWSS ta reponsable pa modernisa y maneha henter e red di rioolering na Aruba, incluyendo e planta na Bubali, e infrastructura di rioolering na Parkietenbos y Zeewijk, y e sistema di riool na henter e isla. Su mandato ta tanto ambiental como economico: e estado degrada di infrastructura di rioolering na Aruba pa añas a resulta den riesgo di contaminacion, keho di holor malo na e barionan cerca, y retonan legal di negoshinan afecta.

Na 2024, e modelo di financiamento di e compania a ricibi inyeccion significante mediante introduccion di e Sustainability Fee, $20 cobra na cada bishitante no-residente di Aruba na nan yegada na aeropuerto. E suma, colecta mediante e sistema existente di ED Card, ta aloca specificamente pa inversion den operacion y infrastructura di AWSS. Cu Aruba ricibiendo mas di un miyon turista via aeropuerto tur aña, e tarifa ta representa un entrada potencialmente substancial – maske AWSS no a publica cifranan audita di colecta of gasto te awo.

E compania ta describi su mision como modernisando y digitalisando infrastructura di maneho di awa di desperdicio na Aruba, cu partnernan internacional dunando experticio tecnico na un forsa laboral local.

Problema di maneho, bieu y nobo

E publicacion di CAft dia 27 di februari ta bay mas leu cu AWSS y Utilities pa haci un punto mas amplio tocante con Aruba ta maneha tur su empresanan estatal. E colegio a aplaudi e intencion declara pa e gobierno actual pa bira e prome pais den e parti Caribense di Reino pa implementa un marco cla di politica pa maneho di participacion y dividendo di gobierno – notando cu un marco asina, combina cu un codigo nobo di corporate governance, lo por yuda identifica riesgo financiero na companianan estatal na un etapa mas trempan.

Pero CAft tabata igualmente claro den bisa cu bon intencion mester sigui cu implementacion: “Considerando experencianan anterior, den e marco aki CAft ta enfatisa e necesidad pa efectivamente implementa e politica aki, y aplica esaki den practica.”

CAft a haci un yamado pa un separacion cla di funcion: minister di Finanzas mester actua como representante di gobierno como propietario, otro minister ta duna directiva, y e companianan mes ta ehecuta e directivanan aki. Sin claridad asina, responsabilidad ta faya – un les cu ta parce di a siña cu dificultad na tanto AWSS y Utilities.

E colegio tambe a bolbe na un concepto cu a trece dilanti ripitiamente: e situacion na Hospital Dr. Horacio Oduber (HOH). Gobierno ta carga e costo di hospital pero no ta doño formal ni tin posicion como accionista cu lo permitie pa interveni. CAft a urgi gobierno, atrobe, pa traha pa un solucion structural cu hospital y su propietario.

Transparencia priminti, pero ainda no a yega


 E comunicado di prensa di prensa a mustra e presentacion di dia 26 di februari como un demostracion di resposabilisacion. “Transparencia, bon gobernacion y responsabilidad financiero ta fundamental pa garantisa un sector di utilidad fuerte, sostenibel y confiabel,” a declara, agregando cu e doorlichting ta representa “un punto di salida pa fortifica e organisacionnan aki” en bes di e punto final.

E manera aki di presenta e asunto, sinembargo, ta sinta incomodamente banda di e decision pa tene hallazgo di e doorlichting confidencial. E deficiencianan specifico cu a identifica, e datonan financiero cu a impulsa e recomendacionnan, y e timeline pa medida corectivo, tur a keda leu di wowo di pueblo. No a duna fecha ainda pa na ki momento ta bay publica e rapport completo – ni si ta bay hacie.

Pa residentenan cu ta depende riba Utilities pa nan awa y coriente, y pa sector di turismo di e isla cu ta tanto un contribuidor principal pa entrada di AWSS y un stakeholder director den calidad di infrastructura ambiental di Aruba, e falta di detaya ta laga pregunta critico sin respuesta.