Ex politico di partido RED Democratico, Ricardo Croes, a duna un declaracion publico amplio tocante su detencion reciente y acusacion di “opruiing” (instigacion) despues di varios publicacion riba rednan social. Den su declaracion, Croes ta expresa su preocupacion profundo tocante locual e ta considera desaroyonan preocupante den funcionamento di Ministerio Publico (OM) y Corte na Aruba, specialmente den caso relaciona cu morto di Ayden Lanoy y otro procesonan penal reciente.

Segun Croes, no ta un secreto cu na Aruba tin situacionnan cu ta causa indignacion den pueblo. El a referi na diferente caso criminal cu, segun su opinion, no a ser maneha di un forma cu ta satisface sentido di husticia den sociedad. El a menciona cu Ministerio Publico ta un organo importante cu tin responsabilidad di percura igualdad y orden den pais, y cu Corte tambe tin un responsabilidad grandi cual mester ser respeta y aprecia.

Croes a enfatisa cu e institucionnan aki mester sirbi interes general di bienestar comun. Segun e, ora un persona comete un delito, e mester ser castiga sin considera ken e ta. Na mesun momento, si no tin delito, persona mester keda den libertad. El a declara cu e principio di igualdad dilanti ley ta fundamental pa mantene confiansa di pueblo den sistema di husticia.

Indignacion di Croes a intensifica despues di scucha cu Ministerio Publico a pidi un castigo condicional pa dos agente policial den caso di tiramento di Ayden Lanoy, un hoben cu a perde su bida na februari aña pasa. Croes a describi e morto como un acto cu, den su opinion y segun hopi persona cu a sigui e caso, no tabata hustifica. El a señala cu Lanoy tabata un hoben den flor di su bida, unico yiu di su mayornan y cu a caba di bira tata.

Croes a splica cu Ministerio Publico a tuma un aña prome cu presenta e caso den corte, y finalmente a pidi solamente un castigo condicional. El a expresa su preocupacion cu esey lo resulta cu e agentenan por sigui traha como polis y mantene arma, algo cu segun el a indica, ta causa indignacion den pueblo.

El a remarca cu su reaccion no tabata unico. Segun e, diferente partido politico y un cantidad grandi di ciudadano a expresa nan malcontento riba rednan social. Croes mes a reconoce cu el a publica comentario riba Facebook tocante e caso di Lanoy y tambe tocante otro procesonan penal.

Den su declaracion, Croes a pidi disculpa pa palabranan cu e mes a cualifica como insolente. El a bisa cu e manera di expresa su mes no tabata apropia, pero cu su reaccion tabata alimenta pa su experiencia personal. El a referi na caso di su propio yiu homber, cu a ser condena na tres aña di prison pa un delito cu Croes a reconoce mester a ricibi castigo, pero cu segun e, no tabata uno proporcional.

“Mi ta djis un hende, mi ta sufriendo basta hopi caba pa locual ami ta considera un decision desproporcional di hues pa castiga mi yiu homber, un peticion desproporcional di fiscal pa castiga mi yiu homber, pa un crimen cu el a comete y mi ta di acuerdo cu e mester a ricibi su castigo, pero un castigo husto,” el a enfatisa.

Croes a splica cu den e veredicto, hues a reconoce cu tabata prome biaha cu su yiu tabatin problema cu husticia, cu tabata bin di un bon famia y stabiel. No obstante, segun Croes, e circunstancianan no a pisa na su fabor, y e sentencia a keda tres aña, mescos cu fiscal a pidi.

El a compara e situacion cu otro caso unda un persona cu a agredi un referee cu un boter di awa, incidente cu a resulta den perdida di wowo di e referee. Segun Croes, den e caso ey fiscal a exigi seis aña di castigo.

Tambe el a menciona un caso di violacion cu, segun su declaracion, a resulta den mesun castigo di tres aña manera su yiu.

Croes a expresa cu e comparacionnan aki a contribui na su rabia y frustracion, cual finalmente a resulta den e tres publicacionnan riba Facebook. Den un di e publicacionnan el a critica Ministerio Publico y Corte den termino fuerte, y den otro el a bisa cu pueblo mester “tuma husticia den su man”, frase cu posteriormente a ser interpreta manera instigacion.

Autoridadnan a detene Croes y acus’e di “opruiing” (instigacion), delito cu por carga un castigo maximo di cinco aña di prison. Opruiing, segun ley, ta implica instigacion di pueblo pa comete violencia contra autoridad of institucionnan manera Corte of Ministerio Publico.

Croes ta nenga cu el a comete tal delito. El ta sostene cu su expresion tabata protegi bou di libertad di expresion y cu nunca el a incita pueblo pa usa violencia. E a nenga tambe cu el a menasa Ministerio Publico, Corte of cualkier agente policial, incluyendo e dos agente involucra den caso Lanoy.

“Mi no ta bou di e impresion niun momento so cu mi a comete e delito di opruiing, mi ta bou di impresion cu mi tabata actua bou di libertad di expresion. Mi ta nenga rotundamente tambe cu mi a menasa Ministerio Publico. Niun momento mi a haci mi mes culpabel di a menasa Ministerio Publico, di a menasa Corte of di a menasa cualkier agente policial, incluyendo e dos agente cu a comete e atrocidad contra famia Lanoy,” el a expresa.

El a subraya cu e ta considera su detencion como un intento di intimidacion y un intento pa silencia no solamente su persona sino tambe di pueblo. “Loke ami ta experiencia ta cu ta purba di intimidam’i, ta purba intimida pueblo, purba silencia mi, ta purba di silencia pueblo pa un crimen cometi pa dos agente policial den cual pueblo mester por pone confiansa cu e agentenan aki ta hiba un preparacion rigoroso caminda cu uso di arma mester ta algo cu ta practicamente como ultimo remedi,” el a enfatisa.

Croes a argumenta cu den caso di Lanoy, imagennan di video a mustra cu no tabatin indicacion di menasa fatal cu mester tabata resulta den uso di violencia letal. El a señala cu mes hues a tuma nota di contenido di e videonan.

Croes a cuestiona tambe concepto di responsabilidad den sistema. El a expresa cu, den su opinion como hurista, no tin suficiente responsabilidad asumi pa parti di polisnan ni Ministerio Publico. Al contrario, el a remarca cu el a percibi puro hustificacion.

Den su declaracion, Croes a critica tambe funcionamento general di Ministerio Publico. El a indica cu, historicamente, Ministerio Publico ta comete eror, y cu esey no ta algo completamente straño, pasobra den cualkier institucion humano por tin eror. Sinembargo, el a cuestiona ki ora e organo ta ser teni responsabel pa erornan, specialmente ora decisionnan tin impacto grandi riba confiansa publico.

Croes a menciona articulo 15 di Codigo di Procedura Penal di Aruba, cual ta permiti persona pidi Hof pa ordena Ministerio Publico pa persigui un caso ora e organo dicidi no haci esey. Sinembargo, el a señala cu finalmente kehonan ta cay cerca e mesun institucionnan hudicial.

El a declara cu Ministerio Publico tin un monopolio pa dicidi ken e ta persigui y ken no, y cu segun su opinion e poder a ser mal usa mas cu un biaha. Croes a propone cu posiblemente ta necesario un restructuracion of mecanismo di control adicional pa garantisa cu poder no ta ser abusa.

No obstante su critica fuerte, Croes a reitera cu e no ta incita violencia contra Ministerio Publico, Corte of polis. El a enfatisa cu manifestacion pacifico y grabacion di evento publico ta medio legitimo pa expresa descontento, pero cu violencia no ta opcion.

Alabes el a reconoce cu gobierno no ta directamente responsabel pa peticionnan di fiscal den corte. Sinembargo, el a señala cu minister di Husticia tin responsabilidad politico pasobra Ministerio Publico ta rindi cuenta na minister. Segun Croes, liderazgo politico mester asumi responsabilidad pa comportamento di departamentonan bou di nan supervision.

Croes a conclui su declaracion cu e situacion actual, den su opinion, no ta refleha interes general sino interes particular. El a reafirma cu rol di Ministerio Publico ta pa persigui tur persona cu viola ley di forma igual y consistente, y cu confiansa publico ta depende di percepcion di imparcialidad y proporcionalidad den decisionnan penal.

“E ta inaceptabel pa mi como hurista y como persona y como tata, como miembro di e pais aki, pa realisa cu e interes cu ta ser cuida no ta interes general, cu e interes cu ta ser cuida ta un interes estrictamente personal y esaki no ta locual Ministerio Publico mester haci. Ministerio Publico su trabou ta pa persigui tur persona cu a kibra ley y pa persigui nan cu forsa di ley,” el a enfatisa.