SEPB, EPI y OABA ta oficialisa cooperacion pa fortalece educacion profesional

Gobierno di Aruba a marca un momento decisivo den e historia di educacion profesional riba e isla cu e oficialisacion di un acuerdo di cooperacion entre tres instituto fundamental: Stichting SEPB, EPI y OABA. E firma di e acuerdo, cual a tuma luga den presencia di minister di Enseñansa Gerlien Croes, ta simbolisa no solamente un acto formal, pero tambe e inicio di un etapa nobo den consolidacion di MBO na Aruba.

Segun minister Croes, esaki ta un momento hopi importante cu mester ser considera den e contexto amplio di desaroyo educacional di e pais. El a recorda cu den añanan 90, Aruba tabata den un fase di structuracion y fortalecemento di su sistema di enseñansa. Gobierno, hunto cu diferente stakeholder, a asumi e responsabilidad pa traha riba un vision y mision cu lo garantisa acceso na educacion y formacion profesional pa hobennan. Durante e periodo ey, a institui scolnan cu a permiti hobennan continua nan estudio profesional localmente, sin mester depende exclusivamente di oportunidadnan afo di pais. EPI y EPB, manera nan ta conoci awendia, ta resultado directo di e esfuerso structural cu a ser haci den e epoca ey.

El a splica cu den transcurso di añanan, sistema di enseñansa profesional na Aruba a sigui evoluciona. Diferente reforma y iniciativa a contribui na amplia acceso y adapta oferta educativo segun necesidadnan cambiante di sociedad. Den ultimo cinco aña particularmente, a pone enfasis riba flexibilisacion di e oferta pa asina por sirbi un grupo mas amplio di studiante. Cu creacion di OABA, a crea posibilidad pa hobennan y adulto cu no por sigui un programa regular durante dia, logra un diploma profesional riba un orario alternativo. Esaki a representa un paso importante pa inclusividad y equidad den sistema educativo.

Sinembargo, minister Croes a enfatisa cu e paso cu ta tumando ta bay mas leu cu solamente adaptacion operacional. E oficialisacion di cooperacion entre SEPB, EPI y OABA tin como meta principal crea un coordinacion mas estrecho y un structura mas cla entre e tres institutonan. Den un sistema unda diferente entidadnan ta ofrece MBO, coherencia y comunicacion ta esencial pa evita fragmentacion y pa garantisa cu tur studiante tin acceso na informacion y trayecto educativo transparente.

El a remarca cu desaroyonan economico riba nivel global ta move rapidamente, specialmente den sectornan relevante pa Aruba manera hospitalidad, turismo, logistica y servicio. Aruba, como un economia chikito pero dinamico, mester responde activamente na e cambionan aki. E mercado laboral ta exigi competencianan nobo, actualisacion constante di conocemento y un nivel di calidad cu ta competitivo internacionalmente. Pa esaki, sistema di educacion profesional mester bay hunto cu e desaroyonan rond di mundo y mantene un conexion directo cu sector productivo.

E acuerdo firma entre e tres instituto ta enfoca precisamente riba e aspecto di alineacion. Cu un coordinacion structural, lo por revisa y actualisa contenido curicular di manera mas eficiente, comparti conocemento entre docente, y traha riba innovacion educativo den un marco comun. E intencion ta pa crea un sistema unda trayectonan educativo ta conecta entre nan, permitiendo transicion mas facil pa studiantenan cu ta move di un nivel pa otro.

Minister Croes a expresa su gratitud cu finalmente a yega na un etapa unda tur tres instituto cu ta ofrece educacion profesional por formalisa nan colaboracion. El a indica cu e proceso no tabata simpel, ni rapido, pues el a rekeri discusion, dialogo y comprendemento mutuo entre directiva di SEPB, EPI y OABA, hunto cu ministerio. Cada institucion tin su propio identidad, historia y manera di traha, pero tur a reconoce cu ta importante pa laga cierto di esaki los pa por yega na otro. “Esaki ta e bunita caminda cu nos ta wak un union awe cu ta demostra cu nos por logra hopi pa pais Aruba,” el a enfatisa.

Adicionalmente, minister Croes a splica, cu e acuerdo aki ta bay un tiki mas leu. Durante un bishita recien na Hulanda, minister a amplia colaboracion cu ROC Mondriaan, un institucion reconoci den MBO. Como resultado, EPI, SEPB y OABA ta bira partnernan oficial di ROC Mondriaan Hulanda. E partnership aki ta haci posibel cu Aruba por benchmark su programa cu standardnan Hulandes riba nivel di MBO y beneficia di intercambio di experiencia y conocemento pa fortalece calidad local.

Pa EPI, e firma di e acuerdo ta un momento historico. E institucion a señala cu, aunke cooperacion cu SEPB y OABA semper a existi informalmente, e formalisacion ta duna un base mas firme pa futuro. EPI a enfatisa cu Aruba ta gana cu esaki, pero sobre todo e studiantenan cu ta scoge pa sigui un opleiding di MBO. Door di un liña di enseñansa continuo mas structura, un studiante por cuminsa su formacion na EPB y despues sigui naturalmente na EPI of, dependiendo di circunstancia, opta pa OABA.

EPI tambe a subraya importancia di profesionalismo di docente den MBO. Un sistema di calidad ta depende no solamente di curriculum, pero di competencia y dedicacion di maestro. Fortalece formacion continuo di docente y stimula innovacion educativo ta parti integral di cooperacion nobo. Ademas, e institucion a confirma cu cooperacion cu mercado laboral lo sigui intensifica, asina cu programa educativo ta mantene relevancia y responde directamente na demanda di empleadornan.

OABA, cu su enfoke riba enseñansa anochi, a expresa satisfaccion cu e acuerdo finalmente a ser logra despues di añanan di esfuerso. Pa OABA, e mision principal ta brinda oportunidad na esnan cu, pa diferente motibo, no por a completa nan estudio den sistema regular durante dia. Tur ciudadano tin derecho di haya educacion, y OABA ta cumpli cu e rol aki cu un modelo flexible pero cu mesun nivel di exigencia academico. Integracion formal dentro di cooperacion cu SEPB y EPI ta fortalece posicion di OABA y ta confirma cu su alumnonan ta parti integral di sistema general di MBO.

SEPB tambe a reconoce cu e caminda pa yega na acuerdo no tabata facil. No obstante, e institucion a describi esaki como un bon comienso y un paso positivo pa studiantenan. Educacion vocacional ta ser considera crucial pa economia di Aruba. Den e tipo di formacion aki, studiantenan no solamente ta adkiri conocemento teorico, pero tambe habilidadnan practico cu ta prepara nan directamente pa mercado laboral.

Por ultimo, minister Croes a enfatisa cu union ta haci forsa y cu dialogo constructivo ta esencial pa progreso. Diferente pensamento y perspectiva ta natural den cualkier proceso di colaboracion, pero meta comparti semper tabata pa fortalece educacion profesional pa beneficio di pais.

El a subraya cu e acuerdo aki ta demostra cu, aunke entidadnan tin identidad propio, cooperacion ta posible y productivo ora interes comun ta central.

Mirando pa futuro, ministerio di Enseñansa lo sigui traha riba informacion y orientacion pa studiantenan cu ta pensa pa scoge un opleiding di MBO den aña escolar binidero. Lo duna claridad riba e diferente programa cu ta ser ofreci, con trayectonan ta conecta entre EPB y EPI, y ki opcionnan tin pa esnan cu no por sigui un orario di dia. E colaboracion cu ROC Mondriaan lo forma parti di e esfuerso continuo pa mantene calidad y actualisacion.

Cu e oficialisacion di cooperacion, sistema di MBO na Aruba ta drenta den un fase di consolidacion y fortalecemento. E acuerdo entre SEPB, EPI y OABA no ta un punto final, pero e inicio di un trayecto continuo pa sigui formalisa, evalua y mehora educacion y formacion profesional riba e isla. Pa studiante, docente y comunidad en general, esaki ta representa un compromiso renoba cu calidad, coordinacion y oportunidad pa futuro di Aruba.