Dia Internacional di Hende Muhe: CEDEHM y Rode Kruis ta uni forsa den campaña pa brinda ayudo na hende muhe den necesidad

Dia Internacional di Hende Muhe 2026 ta ser marca mundialmente bou di e tema #GiveToGain, un mensahe cu ta resona fuertemente cu e mision di Centro di Desaroyo di Hende Muher (CEDEHM). Pa Miangela Ras, Hoofd in Dienst, e lema ta capta un berdad esencial tocante comunidad y solidaridad. Duna no ta tocante di spera algo material a cambio. Ta trata di fortalece e lasonan cu ta tene sociedad hunto.

Como reconocemento di e tema di e aña aki, CEDEHM a partner cu Rode Kruis Aruba pa organisa un campaña special di coleccion en conexion cu Dia Internacional di Hende Muhe. E iniciativa ta encurasha comunidad pa haci donacion di paña y comestibel cu lo ser inclui den paketenan pa hende muhe den necesidad. E meta ta simpel pero significante. Door di stimula hende pa duna back, CEDEHM ta busca pa crea conscientisacion y sosten real di comunidad.

Ras a splica cu e tema #GiveToGain no ta trata di duna algo pa ricibi algo personal a cambio, pero ta mas bien pa contribui na un sociedad mas saludabel pa tur hende.

“E meta no ta pa duna algo pa haya algo back, pero mas bien e algo cu ta ser haya back ta un comunidad mas equitativo. P’esey CEDEHM a scoge pa participa cu e slogan aki pa motibo cu dunando nos ta enfoca riba nos hende muhe. Dunando esnan mas vulnerable nos ta haya hopi, no na material, pero na un miho comunidad pa nos y nos yiunan, pa nos tur,” el a enfatisa.

CEDEHM su compromiso cu empoderacion di hende muhe ta extende hopi mas leu cu un solo dia. Durante henter aña, e organisacion ta keda activo cu proyectonan andando, campañanan di conscientisacion y partnershipnan. E asuntonan di hende muhe no ta stop despues di 8 di maart, y tampoco e trabou di CEDEHM.

Den transcurso di añanan, hopi iniciativa a ser desaroya y ehecuta. Midi impacto no ta semper facil, y aunke cambionan no ta sucede semper den manera dramatico, Ras ta subraya cu toch experiencia ta mustra cu nan campaña y proyectonan a yuda, sea door di conscientisa, ofrece guia of duna asistencia directo.

Ras a splica cu den e organisacion mes, varios generacion di hende muhe ta traha banda di otro. E colaboracion intergeneracional aki, el a sigui splica, ta trece un bista valioso riba con perspectivanan ta diferencia entre coleganan mas hoben y mas grandi.

Respet pa hende muhe den cada etapa di bida ta keda un principio central di e mision di CEDEHM. E organisacion ta defende consistentemente pa un conscientisacion mas grandi den comunidad tocante trata hende muhe cu respet y reconoce nan balor inherente. Reconoce balor di hende muhe no ta opcional. E ta fundamental.

E aña aki Dia Internacional di Hende Muhe tambe ta carga un nificacion special pa e organisacion mes. Dia 8 di maart proximo CEDEHM lo cumpli 15 aña remarcabel di crecemento, compromiso y servicio.

Ras a forma parti di e ekipo for di e prome dia di su existencia. El a conta cu e raiznan di e organisacion ta bay 30 aña atras, tempo cu el a keda estableci pa prome biaha como Directie Vrouwenzaken. 15 aña pasa, el a transiciona pa CEDEHM, reflehando un enfoke mas amplio riba genero y desaroyo.

Ras a cuminsa como coordinador di proyecto y despues a bira Hoofd in Dienst. Mirando back, e ta describi CEDEHM como algo realmente special. “CEDEHM ta hopi special y ta algo cu mester celebra. Mi ta hopi contento cu mi a ser permiti door di Dios y bida pa ta parti di e team aki,” el a expresa.

Den transcurso di e decadanan, hopi a cambia den e posicion di hende muhe na Aruba. Hende muhe ta mas conecta, mas visibel y den hopi manera mas empodera cu antes. Participacion den educacion y forsa laboral a aumenta, y combersacionnan tocante igualdad a bira mas habri. Pero a pesar di e progreso aki, retonan ta keda.

Ras a splica cu Aruba ta brasa un modelo economico den cual tanto hende muher como hende homber ta participa activamente den empleo paga. Mientras cu esaki ta positivo, expectativanan tradicional no a disparce. Mayoria hende muhe cu ta traha full-time pafo di cas hopi biaha ta haci malabares cu casi tres rol pareu. Ademas di su trabou paga, e ta maneha responsabilidadnan di cas, cuida yiunan y frecuentemente ta sostene mayornan of otro miembronan di famia. E peso di cuido sin pago ainda ta cay pa gran parti riba hende muhe.

E actividad binidero pa Dia Internacional di Hende Muhe tin como meta pa combina celebracion cu accion. CEDEHN ta extende invitacion pa henter comunidad pa dia 7 di maart pasa na oficina di CEDEHM na Dakota pa participa den e campaña di recaudacion. Miembronan di comunidad ta ser encurasha pa trece paña pa hende muhe y mucha cu nan no ta usa mas, y tambe comestibel. Hunto cu Rode Kruis Aruba, CEDEHM a compila un lista di hende muhe cu lo beneficia di e donacionnan aki, a base di datonan disponibel pa ambos organisacion.

E articulonan recogi lo ser poni den paketenan di cuido y distribui dia 16 di maart. Esnan cu no por asisti dia 7 di maart por laga nan donacion na oficina di CEDEHM prome of despues di e fecha ey.

Dia Internacional di Hende Muhe ta tanto un celebracion como un recordatorio. E ta celebra e logronan y resiliencia di hende muhe, mientras ta recorda sociedad cu igualdad ta rekeri compromiso continuo. Pa medio di e tema #GiveToGain, CEDEHM ta subraya e poder di accion colectivo.

Progreso ta real, pero e trabou ta sigui. Door di para hunto, apoyando hende muhe vulnerabel y reconoce e balor completo di cada hende muhe y mucha muher, Aruba ta yega mas cerca di e futuro equitativo cu Dia Internacional di Hende Muhe ta envisiona.