Ayera mediante un comunicado di prensa, Ministerio Publico (OM) a informa cu sospechoso H. Ruiz a presenta den un cita cu fiscal na Ministerio Publico pa responde pa malversacion di fondonan publico di placa di SSA (Stichting Sportsubsidie Aruba) den e caso conoci como Bromelia.
Caso “Bromelia” ta centra riba acusacionnan di malversacion y mal uso di fondonan publico originalmente destina pa sostene programanan atletico y iniciativanan di desaroyo. Siman pasa, Corte den Prome Instancia a condena e sospechoso principal den e caso Bromelia, e homber K. Vrolijk, pa un castigo di prison di 16 luna, di cual 10 ta condicional, y un periodo di prueba di tres aña. Sinembargo, ta improbable cu K.Vrolijk lo sinta su castigo, mirando cu e no tabata presente durante tratamento di su caso, y ultimo informacion tabata indica cu e tabata bibando na Slovakia, na un adres desconoci pa autoridadnan.
Caso “Bromelia” a revela ademas capanan adicional di investigacion cu ta involucra otro individuonan conecta cu e supuesto schema criminal. Informenan ta indica cu varios persona identifica como cu a facilita of di otro manera a participa den transaccionnan financiero cuestionabel mara na fondonan di SSA por enfrenta mas consecuencia legal. Algun di e casonan aki por sigui pa medio di loke ta ser describi como sesionnan di TOM (Transactie Openbaar Ministerie).
Augustus ultimo, actual minister di Deporte, Gerlien Croes (Futuro) a informa cu a suspende presidente di SSA, H.R., pa motibo cu e ta sospechoso den investigacion di caso Bromelia. H. Ruiz a asumi e funcion di director despues di suspension di K.Vrolijk.
“Como minister encarga mi a wordo informa (…) riba un investigacion penal tumando luga den Stichting Sport Subidie Aruba unda cu e Presidente di e Raad actual ta un sospechoso,” minister Gerlien Croes a publica riba Facebook na augustus. “E persona concerni ta alabes un trahador di sector publico di un departamento cu ta resorta bao di mi ministerio, consecuentemente, segun ley ta prescribi mi a emiti por escrito un suspension temporal di e persona aki su trabao, pendiente investigacion.”
Segun reportahenan den prensa local, tabata H. Ruiz mes a entrega e keho formal contra K.Vrolijk, pero despues a resulta di ta sospechoso den e mesun caso.
Den su comunicado ayera, OM a bisa cu durante e investigacion Bromelia a resulta cu e sospechoso Ruiz a haci gastonan priva cu e carchi bancario di SSA pa un montante di mas of menos Afl. 1800. Ademas el a comete falsificacion. Mientras tanto el a paga e suma menciona back na SSA.
Teniendo cuenta cu su funcion como dirigente di Conseho di Supervision di SSA, Ministerio Publico ta considera e hechonan aki specialmente grave.
Ayera Ministerio Publico a ofrec’e un resolucion extrahudicial, cu el a acepta. Ta trata di 100 ora di trabao pa comunidad, un multa di Afl. 1500 y publicacion di e comunicado di prensa aki.
Por recorda cu controversia ocasiona pa caso Bromelia eventualmente a resulta den retiro di Endy Croes como minister di Deporte di Gabinete Wever-Croes II na 2024, despues cu Parlamento a vota pa aproba un mocion di desconfiansa contra e minister, despues di un sesion largo. Parlamentarionan a considera cu e no a maneha e informacion den e caso aki di un manera adecuado y no tabata satisfecho con e situacion a desaroya.
