Corte den Prome Instancia di Aruba a habri e tratamento di e caso penal conoci como Caso Caret y a cer’e di biaha tambe. Cu esaki, e investigacion cu e hues a haci den e caso den su contenido a keda oficialmente completa. Durante e sesion di ayera, e hues a anuncia cu sentencia den e caso lo ser dicta riba 2 di april 2026.
Caso Caret ta relaciona cu e tiramento fatal cu a tuma lugar dia 9 di februari 2025, den cual e hoben Ayden C’Jay Lanoy di 19 aña a perde su bida despues di ser impacta pa un bala despues di un persecucion policial. E incidente a causa gran conmocion den comunidad y a lanta un debate amplio riba uso di arma pa parti di polis y necesidad di transparencia den investigacionnan di incidente cu ta involucra autoridadnan.
Segun informacion presenta durante tratamento di e caso den corte, e persecucion a cuminsa ora polis a purba para e vehiculo cu Lanoy tabata core pa motibo cu e auto tabata falta un luz patras. Despues cu e hoben no a para mesora, un persecucion a sigui. E situacion a escala ora e vehiculo a para den un area residencial na Madiki, unda dos agente policial.
Investigacionnan a revela cu e polisnan a los 20 tiro y resultado di e investigacion penal a conduci na acusacion di e agentenan policial R. Dirksz y M. Violenes, cu ta enfrenta acusacion di complicidad den homicidio en conexion cu e morto di Lanoy.
Desde e momento di e incidente, e caso a capta gran interes di publico. Den e dianan despues di e tiroteo fatal, ciudadanonan a reuni den diferente manifestacionnan pa pidi transparencia, responsabilidad y husticia.
Durante tratamento di e caso, sala di corte tabata yen di publico, media y representantenan di famia di e victima. Autoridadnan hudicial tambe a tuma medidanan di seguridad adicional pa mantene orden y respet durante e audiencia, reconociendo e impacto emocional cu e caso tin pa tanto famia como comunidad.
Hues a enfatisa ripitidamente cu meta principal di e corte ta conduci un proceso husto, transparente y basa riba pruebanan solido.
Un parti importante di e proceso hudicial a draai rond di material visual capta durante e incidente. Durante audiencia preliminar y tratamento di e caso, tanto Ministerio Publico (OM) como defensa a discuti extensivamente riba e grabacionnan di camara y e interpretacion di e evidencia visual.
Durante tratamento di e caso, Ministerio Publico a presenta su posicion riba e responsabilidad penal di e dos agente policial. Fiscal a analisa e hechonan di e incidente, testimonio di testigonan y evidencia forensico, argumentando cu accionnan di e acusadonan tabatin consecuencianan fatal cu a resulta den morto di e hoben Lanoy.
Ministerio Publico a conclui cu e dos agente policial por ser tene responsabel pa complicidad den homicidio despues di e tiramento fatal di Ayden Lanoy. Segun OM, aunke e agente nan no tabatin intencion directo pa mata, nan a tuma conscientemente e riesgo cu tirando varios biaha den direccion di e auto di Lanoy por a resulta den un consecuencia fatal. OM a basa su conclusion riba evidencia, incluyendo grabacionnan di video, indicando cu e situacion no tabata hustifica defensa propio y cu e cantidad di tiro no tabata proporcional cu e menasa di e momento.
Pa e motibo aki, OM a pidi pa ambos sospechoso ricibi e mesun castigo: 12 luna di prison condicional cu un periodo di prueba di dos aña y 180 ora di servicio comunitario. Den su argumentacion, OM a considera tanto e impacto serio di e incidente riba e famia di Lanoy y riba comunidad di Aruba, como tambe e circunstancia cu e sospechosonan ta agente policial cu tabata den servicio. Segun OM, e caso a crea hopi preocupacion den sociedad y ta mustra e importancia di responsabilisa oficialnan ora uso di forsa no ta dentro di e limite legal.
Defensa, pa su parti, a contesta interpretacion di fiscal y a presenta su propio analisis di e evidencia, enfatisando circunstancianan durante e persecucion y confrontacion cu, segun nan, mester ser considera den evaluacion final di responsabilidad penal.
Segun defensa, e polisnan a actua segun nan percepcion di un menasa inmediato durante e incidente. Nan a indica cu e polisnan a kere cu e vehiculo tabata bini na nan direccion y cu nan bida por a tabata den peliger, loke a hiba nan pa tuma un decision rapido pa usa nan arma pa para e auto. Defensa ta sostene cu e accionnan a ser tuma den un momento di gran tension, cu e intencion principal pa proteha nan mes.
Despues di reanuda formalmente e sesion, hues a cera e tratamento di e caso y a informa cu e lo usa e proximo simannan pa termina di evalua profundamente tur informacion presenta durante e proceso.
E siguiente paso den e procedemento ta e uitspraak, cu hues a indica e lo dicta riba 2 di april 2026.
