(AFP) – Un miembro Democrata di Congreso Mericano ta enfrenta posible expulsion despues cu su comite di etica a declara cu e ta culpable diabierna di hinca fondonan publico den su cartera pa campaña.
Sheila Cherfilus-McCormick di Florida, ken ta rechasa e acusacionnan, a presenta dialuna na un audiencia publico dilanti e comite.
Despues di e sesion, miembronan Republicano y Democrata a vota durante anochi pa declara cu 25 di e 27 cargonan contra Cherfilus-McCormick “a keda comproba pa evidencia cla y convincente,” segun un declaracion di e comite.
Un hurado federal a acusa e politico di 47 aña, su ruman homber y otronan den november di cargonan cu nan a horta $5 miyon den fondo di emergencia federal pa Covid-19, cual despues a laba y gasta den su campaña.
Cherfilus-McCormick a yama e cargonan “inhusto, sin base y un acusacion fraude” y a insisti cu “mi ta inocente.”
Su huicio dilanti e hudiciario federal lo cuminsa den april y e ta enfrenta te hasta 53 aña den prison.
Den un declaracion manda pa AFP despues di e reunion cu e comite di eita, Cherfilus-McCormick a bisa: “Mi ta anticipa comproba mi inocencia.”
E comite di etica a bisa cu e lo reuni atrobe den april “pa determina cua, si por, sancion lo ta apropia pa e Comite recomenda.”
E congresista por enfrenta eora un voto dilanti henter Congreso prome cu su expulsion y varios miembro Democrata por uni e mayoria Republicano den sosten na esaki.
“Pa motibo cu a declara cu e ta culpable, e mester renuncia of keda expulsa,” Representante Democrata Marie Gluesenkamp Perez a publica riba X.
Den december di 2023, e Cas di Representante a vota pa expulsa George Santos, un Republicano di New York declara culpable di crimennan financiero.
Despues cu Santos a pasa algun luna den prison den 2025, Presidente Donald Trump a anula su sentencia, bisando cu Santos ta victima di “maltrato horible.”
