Dia frontera habri… Con pa atende ‘refugiado’…?

Frontera cu Venezuela por lo pronto ta keda cera, pa trafico aereo. Esey ta pospone tambe e decision con pa anda cu e ‘turista refugiado’ cu lo sigui bin, pasobra situacion den nos region no a cambia tanto. Despues di e captura di presidente Nicolas Maduro, su propio hendenan a keda na poder y ta eherciendo e represion di custumber. Loke si a desaparece for di mapa ta e asaltonan di forzanan naval Mericano riba supuesto cargamento di droga. No ta e acusacionnan di violacion di derecho internacional a percura pa esaki, sino e atencion Mericano cu a muda completamente pa Medio Oriente. E pregunta ta si awor transporte di droga den Caribe por continua atrobe. Esaki principalmente pasobra na e pais bisiña tabata elemento di e gobierno Chavista mes tabata involucra den esaki; e acusacionnan contra Nicolas Maduro mes ta testimonio di esey. Por supone cu no e no tabata e unico envolvi den e negoshi. Motibo en todo caso pa di nos banda mantene vigilancia den nos teritorio.

Interesante ta cu e ‘modelo Venezuela’ a logra haya atencion internacional, a traves di repiticion di e supuesto modelo aki na Iran, unda el a ‘backfire’ spectacularmente. Algun luna despues di e sucesonan na Caracas, a bira visto cu mester tabatin un areglo secreto, cu por lo menos parti di e poder Chavista, pa facilita captura di Maduro, cu e condicion cu por lo demas lo no a mishi cu e structura di poder interno. Obhetivo principal di e maniobra tabata un interes comparti entre e regimen Venezolano y gobierno na Washington: aumenta produccion di crudo Venezolano… E caso di petroleo Venezolano ta uno particular, unda explotacion di e crudo pisa di Orinoco ta solamente posible via importacion di producto manera nafta pa dilui e crudo, cu ta casi asfalt, pa por transporta esaki via tuberia. Ultimo añanan sancion internacional tabata haci acceso na e productonan diluyente bastante dificil, pero cu e eliminacion di sancion Mericano nan a bira disponible atrobe y cu esaki por aumenta produccion di crudo exportable. Esey no ta significa cu automaticamente produccion ta aumenta te nivel considerable. Actualmente exportacion a subi te na un nivel di 800.000 bari pa dia (bpd), e nivel mas halto den ultimo 6 aña. Ainda ta keda e problema di recuperacion di capacidad di refinacion y di ‘upgrading’ di crudo ultrapisa te un producto apto pa mercado. Ambos parti di e sistema di e industria a sufri bastante deterioro den ultimo añanan, pa falta di capital y conocimento specializa, cu principalmente empresanan experto Mericano por brinda. Cu tanto interes comparti por lo pronto lo mira un avance den productividad petrolero, cu mas ingreso pa e pais tambe. E pregunta di semper ta keda con esaki ta traduci den mehoracion di bida di e ciudadano comun y coriente. Aki cierto cautela y reserva ta na nan lugar. Parti di e ‘modelo Venezuela’ ta parce e opcion di atende asunto cu otro regimen autoritario, a traves di imposicion cu poder militar, sacando cierto condicion faborable pero por lo demas lagando e regimen autoritario intacto, di manera cu gobierno Mericano no mester bay ‘kibra cabez’ con pa goberna tal pais. Esaki aparentemente ta funciona na Venezuela, naturalmente cu gran decepcion pa esnan, na e pais y den diaspora, cu a carga speranza cu gobierno di Trump lo a colabora den reinstalacion di democracia parlamentario.E repiticion di e modelo aki na Iran no a funciona, entre otro pasobra e regimen Irani, cu un ideologia religioso poderoso, no a sucumbi y tampoco pueblo a lanta contra e regimen, sigur no despues di e masacre di diezmiles di manifestante na inicio di aña, cu tabata exigi democracia y cu speranza cu Merca lo a yuda.

E fortificacion di e poder Chavista/Madurista, den ausencia di ambos, ta significa cu por lo pronto no lo bin tanto cambio den e represion contra pueblo y tampoco den nan condicion di bida, cu por mehora solamente a base di un berdadero resureccion economico, cu ainda no ta visible. Cu esey e presion interno pa busca refugio den exterior no a desaparece y esaki por tin tin consecuencia pa e paisnan bisiña.

Na e islanan Hulandes esaki ta implica cu frontera cu Venezuela por lo pronto ta keda cera, pa trafico aereo. Esey ta decision cu a tuma na Den Haag, mirando e situacion na e pais y mas en general e situacion den nos region. Lo tin comentario local cu ta puntra pakico e decision ta tuma na Den Haag y e contesta corecto ta cu esey semper ta tuma lugar na Den Haag, pasobra ta Reino Hulandes tin frontera cu e republica bisiña y no e gobiernonan autonomo di e teritorionan isleño. A pesar di continuacion di e ciere nos ta keda cu cierto pregunta, cu tin di haci tambe cu e entrada di persona for di Venezuela via e ruta maritimo o indirectamente, y despues tambe via e ruta aereo, dia e habri.Esey ta e manera con nos autoridadnan, despues di a introduci un amnistia ‘de facto’ pa miles di migrante cu pa varios aña tabata permanece aki sin permanencia legal, ta bay preveni cu atrobe nos ta haya un grupo di migrante cu ta drenta awor, sin cu tin un mecanismo conoci con pa percura pa nan sali, ora nan estadia – legal – como turista vence. Nos no ta tende nada di medida pa instala un grupo di busqueda special pa obliga e ‘turistanan’ aki bandona nos teritorio. Sea gobierno no tin contesta, o sea nan no kier bisa nada; ambos opcion ta incorecto.