(AFP) – Un organisacion di caridad pa bienestar di bestia a revela cu el a rescata mas di 250 cacho for di un solo cas na Reino uni, cu un potret di e escena causando “duda” y acusacionnan falso cu e imagen ta genera pa inteligencia artificial.
Royal Society for the Prevention of Cruelty to Animals (RSPCA) a bisa cu e mas di 250 rasa di poodle mescla a ser haya na e propiedad den un localidad cu no a revela anteriormente e aña aki. E organisacion mundial mas bieu na mundo, RSPCA a tuma 87 di e bestianan rescata, mientras cu e resto a bay otro organisacion, Dogs Trust.
RSPCA a bisa cu e caso “impactante” tabata e ehempel mas recien di su empleadonan descubriendo cantidadnan grandi di mascotanan cu mester di rescate for di nan cas so. El a responde na 4.200 aña pasa rond di Inglatera y Wales cu a involucra por lo menos 10 bestia y e mesun adres – un aumento di 70% desde 2021.
Casonan involucrando decenas y te hasta centenares di bestia tabata “den aumento”, y por conecta esaki na problemanan di salud mental, crisis di costo di bida of criaderonan operando cu mal practicanan, e organisacion a bisa. RSPCA a bisa cu hende a incorectamente sugeri cu e imagen di e cachonan rescata tabata falso, despues cu a publica esaki riba rednan social y causa “duda entre e publico general.”
Den e potret por mira decenas di e cachonan, varios den man condicion fisico, den e sala di e cas riba otro. E organisacion mester a responde na decenas di comentario for di hendenan preocupa.
“E imagen impactante aki ta e realidad di varios caso di animal y e situacion cu nos oficialnan ta confronta cada biaha mas y mas,” Superintendente Jo Hirst a bisa diaranson ora cu e potret a bira viral.
