Sucesonan reciente ta causando preocupacion pa cu seguridad na beach di Aruba

Den lunanan reciente, nos ta mirando cada biaha mas incidente unda nos turistanan ta perde nan bida of encontra nan mes den situacionnan di emergencia cu ta menasa nan bida na nos beachnan. Esaki ta algo cu a genera alarma entre comunidad y bishitantenan, compartiendo diferente reaccion y comentario tocante e situacion cu e isla ta mirando.

E incidentenan aki ta trata di turista cu ta perde nan bida pa situacionnan di emergencia cu ta presenta na nos beachnan, y a pesar di esfuerso pa brinda auxilio y di presencia di ambulance na su momento, lamentablemente nan ta perde nan bida.

Parti di loke ta haci beachnan manera Mangel Halto special tambe ta loke ta haci nan vulnerable. A diferencia di Palm Beach – cu ta yen di empleado di hotel, operador di tour y empleado di compania di deporte acuatico – beachnan manera Mangel Halto ta hopi mas keto y natural. No tin bendedor, empleado ni di huur stoel, ni tampoco lifeguard cu ta monitor e awa. E sitio unda nan ta, den e caso aki Mangel Halto, ta logisticamente isola y por causa cu por tuma mas tempo pa trahadornan di emergencia por acudi, a comparacion di beachnan mas central.

Algun comentario riba rednan social ta trece dilanti e posibilidad cu e turistanan no tin e condicion fisico adecuado, cu un comentario contando cu “2 siman pasa mi a wak un Mericano halto y grandi. Su edad tambe tabata halto pero el a hera hoga. E no tabata por mas. Tambe na Mangel Halto. Nunca subestima lama,” y e punto aki tin logica su tras. E beachnan cu cual nos turistanan ta custuma na cas, hopi biaha no ta mescos y ta mas keto cu e beachnan cu nan ta bishita na Aruba, cual ta haci cu tin un falta di preparacion, habilidad y condicion ora di drenta nos beach.

Di otro banda, algun ta haci yamado na autoridadnan concerni pa considera pone borchi pa bishitantenan di e beach no asumi cu pasobra “e awanan no ta mustra hundo, nan ta safe. Nan mester borchi di advertencia poni tur caminda pa landa bao bo propio riesgo. Tambe e awa ta traicionero. E ta cambia di nivel tur caminda.” Esaki ta otro punto valido, pa motibo cu ora ta trata di nos beachnan mas remoto y aparta, tin un falta di borchi, advertencia y educacion facilmente y frecuentemente visible pa esnan cu bishita e beachnan.

Tur esaki ta trece dilanti e pregunta cu autoridadnan local y lidernan di turismo mester confronta: e seguridad di infrastructura na beachnan manera Mangel Halto ta suficiente pa e volumen y perfil di bishitantenan cu nan ta atrae? E realidad ta cu un solucion pa e situacion aki ta birando cada biaha mas necesario, pa motibo cu nos beachnan, den e caso aki Mangel Halto, ta hayando un mancha cu posiblemente por evita via cierto accion cu por tuma pa tin un miho seguridad tanto pa local como turista.

Tumando Australia como ehempel, un di e beachnan mas bishita na Australia, Bondi Beach, tin su propio ekipo di emergencia, cual ta consisti di ambos ‘lifeguard’ y ‘lifesaver’. Nan tarea principal ta di mantene tur esun cu bishita e lama, tanto local como turista, safe di e posible peliger of situacion di emergencia cu nan por encontra.

Entre e tareanan diario cu nan ta ehecuta, tin patruya tanto e beach como e condicionnan di lama henter dia, pendiente pa peligronan manera coriente di awa y ola grandi. Nan ta rescata esnan cu ta den problema den awa y ta provee prome auxilio si ta necesario. Tambe nan ta constantemente poniendo bandera cora y geel pa marca e areanan mas safe pa landa, ademas di educa esnan cu bay e beach tocante reglanan di seguridad y posible riesgonan.

Un di e motibonan principal pa e presencia di e ekipo aki ta turista. Autoridad di e pais a reconoce cu Bondi ta un di e lamanan mas famoso na mundo y ta atrae un cantidad grandi di bishitante cu entre nan, algun no tin habilidadnan hopi desaroya den landamento, no ta compronde condicionnan di lama manera coriente y no sa kico e banderanan ta nifica. Pa e motibo aki, hopi di e rescate cu e lifeguards y lifesavers boluntario ta haci, ta pa cu turista.

E ehempel aki ta trece diferente posibilidad pa Aruba. Di manera similar, e beachnan di Aruba tambe ta famoso y reconoci rond di mundo, y ta frecuenta pa local y turista cu ta bishita Aruba, hopi biaha specificamente pa su beachnan. Mirando e sucesonan recientemente tumando luga cu nos turistanan, posiblemente a yega momento di considera posible proteccion cu por implementa na nos beachnan, specialmente esnan mas remoto y aparta. Esaki no ta un beneficio solamente pa nos turistanan, pero tambe pa nos localnan cu hopi biaha tambe ta encontra situacionnan di emergencia na beach.

E diferencia entre lifeguard y lifesaver ta cu lifeguard ta profesionalnan paga cu ta traha henter aña, mientras cu lifesaver ta boluntarionan cu training cu usualmente ta patruya den e temporadanan mas druk. Profesionalnan cu training y un salario ta e miho opcion, pa motibo cu no por nenga cu e responsabilidad lo carga hopi mas peso si esaki ta e unico enfoke y fuente di entrada pa e profesional involucra, ademas di e hecho cu no por nenga, un profesional merece compensacion monetario pa su trabao. Sinembargo, e opcion aki ta uno cu ta tuma hopi mas tempo, planificacion y recurso pa implementa, y posiblemente no ta completamente necesario mirando e grandura di nos isla y e frecuencia cu cual e incidentenan aki ta sucede.

Na mesun momento, mester reconoce e esfuerso cu esnan presente a haci pa brinda prome auxilio den ambos ocasion reciente. No tabata profesional cu training ni personal di seguridad oficial cu a responde prome, sino esnan cu tabata na lama, cu a los nan ekipo di kayak y a dirigi nan mes cu urgencia na un persona den necesidad, personanan cu a zak riba santo y a haci CPR riba un persona cu nunca a yega di conoce. Bishitante y local kende a scoge di actua te hasta den e shock y confusion di e momento, y e balentia aki ta algo di admira y elogia.

Talbes ta un miho opcion pa considera bin cu un circulo di boluntario kendenan, di mesun manera cu lifesavers na Bondi Beach, tin training pa provee rescate, prome auxilio, patruyahe y guia na e bishitantenan di cierto beachnan cu mas ta frecuenta y durante temporadanan druk. Un sistema di indicacion tocante ki areanan ta safe pa landa y ki areanan no tambe lo ta algo util pa implementa na tur beach. Ademas, e presencia di un persona cu training pa atende cualkier situacion cu surgi presente na beach den tur momento – dentro di su oranan di uso normal – ta algo cu semper lo ta util y te hasta necesario.

E dos victima reciente cu a fayece den incidente similar tabatin 56 y 72 aña, un grupo di edad cu ta bon representa entre e base di turista di Aruba, particularmente cu bishitantenan di Merca. Mientras e causanan medico exacto di e fayecimentonan no a keda oficialmente revela, eventonan cardiaco durante actividad fisico den awa di lama cayente no ta algo incomun entre adultonan di edad mas avansa, specialmente pa esnan cu no ta custuma cu e condicionnan menciona.

Defensornan di seguridad den awa tin hopi tempo ta argumenta cu sitionan popular pa buceo y landamento den destinonan frecuente pa turista ta rekeri mas cu e beyesa natural y ta rekeri borchinan visible di seguridad, acceso na ekipo di emergencia y idealmente, personal cu training na e sitio durante e oranan of dianan mas druk.

Tin mester di un solucion pa cu e seguridad di nos bishitante y localnan. Nos ta mirando caba un aumento den sucesonan mortal cu ta lagando un mancha riba e seguridad di nos beachnan, y ta mas miho yega na un solucion trempan cu laat.