Dos tercera parti di adulto hoben a mira pornografia violento, hopi biaha como mucha

(NLTimes)—Mas cu dos tercera parti di adulto hoben, hopi biaha ainda como menor di edad, a ser exponi na imagennan pornografico violento, segun un estudio di Verwey-Jonker Institute, realisa pa e organisacion di derecho di mucha Defence for Children.

E estudio tambe ta mustra cu casi un di cada cuatro di mas cu 1.000 participante a topa cu e tipo di material aki sin kier ora nan tabatin 14 aña of mas jong, mientras un di cada seis a busca esaki activamente. Ademas, casi un cuarto parti di participante di 18 te 27 aña a bisa cu nan a ser exponi na imagennan di abuso sexual di mucha.

Participantenan cu a mira e tipo di contenido aki a reporta cu hopi biaha nan a keda afecta pa su naturaleza violento, describiendo emocionnan manera disgusto, berguensa, miedo y tristesa. Defence for Children ta bisa cu exposicion na violencia sexual por afecta negativamente e desaroyo sexual di muchanan y adulto hoben y por contribui na problema di salud mental.

E investigadornan ta defini violencia como incluyendo incesto, agresion sexual, abuso fisico y verbal, coaccion, venganza y explotacion. Nan tambe ta inclui formanan consensual di actividad sexual bruto of violento, manera BDSM (bondage, disciplina y sadomasoquismo), bao e mesun categoria. Segun e estudio, espectadornan hopi biaha ta hay’e “dificil pa distingui entre BDSM consensual y pornografia violento no consensual.”

Defence for Children ta bisa cu e problema ta bin for di un ambiente digital cu no ta protege usuarionan hoben suficientemente. Segun e organisacion, appnan di chat, plataforma di social media, weganan y websitenan no ta monitoria suficientemente, permitiendo cu hobennan ta ser exponi rapidamente, despues di mira contenido legal, na material sexual violento, dañino y ilegal. P’esey, e organisacion ta pidi supervision mas estricto y aplicacion di ley mas fuerte contra algoritmonan dañino y contenido ilegal.

“Muchanan y hobennan mester por move sigur den e mundo digital, manera nan ta haci den e mundo fisico,” Carrie van der Kroon a bisa. “Responsabilidad pa contenido cu un mucha ta mira no ta cay riba e mucha. E ta cay riba companianan tecnologico cu ta permiti e contenido aki y laga nan plataforma bira contamina.”