(Infobae) – E avance di awanan profundo cayente bao di plataformanan di ijs por activa un aumento global den oceanonan, experto nan di Universidad di Cambridge a adverti den un estudio.

E avance di awanan cayente profundo pa Antartica ta menasa di smelt masanan enorme di ijs y por activa transformacionnan ireversible den dinamica climatico di planeta, segun un estudio guia pa Universidad di Cambridge y publica den revista Communications Earth & Environment.

Investigadornan a documenta cu e fenomeno aki ta representa un riesgo directo pa e plataformanan di ijs Antartico y e subida di nivel di lama na escala global.

Aunke e menasa cu awanan cayente ta representa pa stabilidad di ijs Antartico tabata un hipotesis sosteni pa modelonan climatico anterior, e estudio awo ta confirma cu observacionnan directo cu e proceso ta den marcha y cu subida di nivel di lama por ta inminente si condicionnan actual continua.

E estudio guia pa investigadornan di Cambridge den colaboracion cu Universidad di California (UCLA), ta adverti cu e yegada di awanan mas cayente riba plataforma continental Antartico por smelt ijs for di abao, debilitando nan structura y permitiendo glaciar nan y capanan interior avansa pa ocean.

E proceso aki ta subi nivel global di lama, pasobra Antartica ta warda enorme reserva di awa dushi.

Durante cuarenta aña, un team internacional di cientificonan a colecta datonan oceanografico usando barconan autonomo y buya, haci observacionnan directo di con calentamento global ta altera corientenan di Oceano di Sur.

E cambio aki ta permiti cu e asina yama “Awa Profundo Circumpolar”, un masa oceanico cayente, ta expande y acerca e region Antartico, debilitando e proteccion natural di plataformanan di ijs.

Joshua Lanham, autor principal di e estudio, a enfatisa cu e masa di awa cayente “por infiltra bao di e plataformanan di ijs Antartico, smelt nan for di abao y destabilisa nan.”

E investigador a indica cu, aunke modelonan climatico ya tabata anticipa e fenomeno aki, “awo e ta ser observa cu dato real.”

Plataformanan di ijs ta funciona manera freno natural cu ta contene glaciar nan y capanan di ijs di continente.

Segun calculacionnan di Cambridge, un colapso masivo di e structuranan aki por libera suficiente awa dushi pa causa un subida di nivel di lama te cu 58 meter.

Plataformanan di ijs, cu prome tabata proteha pa awa friu, awo ta exponi na temperatura mas halto bao di nan superficie. Sarah Purkey, profesora na Scripps Institution of Oceanography, a compara e situacion cu “habri e grifto di awa cayente” bao di e plataformanan aki.

E grupo cientifico a splica cu perdida di proteccion ta aumenta e riesgo di colapso di e plataformanan, afectando tambe glaciar nan y capanan interior. Esaki por activa impacto riba dinamica Antartico y subida global di nivel di lama.

E estudio a combina registronan historico di barco cu datonan reciente di red di buynan Argo y a aplica machine learning pa construi un registro mensual di cuarenta aña. E metodologia aki a haci posibel pa identifica entrada di calor den areanan di Oceano di Sur cu prome tabata considera aisla.

Mas cu 90% di e calor adicional produci pa calentamento global ta almacena den oceanonan, y ta calcula cu Oceano di Sur ta un di e principal recipiente.

Expertonan a observa un disminucion den formacion di awa extremadamente friu y denso, un fenomeno cu prome tabata yuda mantene awanan cayente leu, y cu awo ta reduci pa e subida global di temperaturanan.

 

Panel Intergubernamental riba Cambio Climatico (IPCC) ya tabata predici cu subida di temperaturanan y suministro di awa dushi for di deretimento di ijs lo reduci formacion di awanan denso tanto den Atlantico Noord como na Antartica.

Manera Infobae a publica, debilitamento di corientenan grandi, manera circulacion meridional di regreso di Atlantico (miho conoci como AMOC), ya ta observable den tur dos hemisferio.

“No ta solamente un posibilidad teorico; e datonan ta mustra cu e fenomeno aki ta ocuriendo, cu consecuencia nan pa e ciclo global di carbon, nutriente y calor,” Lanham a bisa den un comunicado di universidad.

Profesor Ali Mashayek, un di e autor principalnan di e estudio for di Departamento di Ciencia di Tera di Cambridge, a destaca e significancia global di e modificacionnan aki: “Oceano di Sur ta hunga un papel critico den regula calor global y warda carbon, asina cu cambionan den distribucion di calor den e region aki tin implicacionnan mas amplio pa e sistema climatico global.”