Sra. Diana Antonette ta un figura hopi prominente y importante den mundo di baile na Aruba. Antonette ta un docente di ballet, aunke tambe el a studia diferente otro tipo di baile. Cu un carera largo den arte, musica y sobre todo, baile, Sra. Antonette ta un icono cultural di Aruba. Na caminda pa Dia di Mama, Bon Dia Aruba a combersa cu Diana Antonette tocante su carera ilustre y su bida como mama.

Antonette a conta Bon Dia Aruba cu for di un edad hopi jong, su destino tabata poni pa baile. “Eigenlijk, mi kier a bay bira abogado. Luga tres luna prome cu mi a caba scol, Sr. Jan Beaujon di Cas di Cultura a acerca mi tata anto puntr’e si mi ta interesa den un beca pa bay Hulanda.” E tabata e prome di Aruba pa haya un beca pa ballet pa bay studia. “Mi no a pensa dos biaha! Tabata un soño cu a bira realidad,” el a conta. Apenas e tabatin 16 aña di edad, pero asina mes, su mayornan a lag’e bay studia afo. Asina su carera den ballet a cuminsa.

“Baile ta manera un poesia, unda cada movecion ta un palabra. E ta un idioma internacional unda cu e curpa ta e instrumento pa expresa tur cos. Mester stimula baile en general, y specialmente nos cultura Arubano en particular”

Sra. Antonette a conta cu su bida ta marca pa coincidencianan cu a marca e direccion di su bida di un manera determinante. Por ehemplo, el a conta cu na su yegada na Hulanda, a asign’e na un famia pa biba cerca nan. Sinembargo, e no tabata mucho comodo cu e areglo ey. “Tur cos ta toevallig, no? Coriendo den bus mi ta tende Papiamento! Bira asina’ki, mi ta mira un amiga di mi cu tabata bisiña, y cu otro studiante. Anto mi a haya masha leuk pa top’e y conoce su amiga di Corsou.” Combersando, Antonette a conta cu e no ta mucho contento unda e ta biba, y e ora e dos hoben a hib’e na unda nan tabata biba, cerca un señora, pero cu nan propio espacio manera un cushina chikito, un sala, un camber. “Mi a haya masha leuk!” Eventualmente e señora a join e combersacion, y a mustra Antonette cu e tabatin un camber bashi, y a ofrece esaki mesora pa Antonette por biba cerca nan. “El a prepara e camber! E señora tabata un pan di Dios. El a bin Aruba dos biaha, conoce mi mayornan. Bo sa, un señora cu mi no ta lubida nunca mas.”

Como cu e tempo aya comunicacion internacional no tabata facil, barata y inmediato manera e ta awo, Antonette semper tabata mantene e deseo di bin back Aruba. “Mi mama tabata yama mi dos biaha pa aña. Dia mi haci aña, y entre Pasco cu Aña Nobo.” Y asina mes, yamadanan hopi cortico. “Yora so nos tabata yora,” el a recorda. Awendia, loke el a experiencia cu su yiu muhe cu a bay studia afo ta hacie hopi mas facil cu video yamada facil y largo.

Ora el a finalisa su estudio, el a haya un oferta pa join un grupo pa haci show, pero “mi di no! Mi kier bay Aruba back! Y ta lo miho cu mi por a haci pasobra e tabata mi deseo pa ora mi caba mi bin back Aruba,” el a bisa.

“Hopi orguyoso di mi yiunan”

Pa Sra. Antonette, famia ta un parti hopi importante di bida, y den e entrevista, a reflexiona riba e relacion entre mayor y yiu.

Por ehemplo, el a comparti su amor pa arte y baile cu su dos yiu muher. “Te na casi cu mi mester a duna luz, mi a sigui duna les,” el a conta, “mi ta kere p’esey nan tambe ta baila!”

“Alydia fe’i chikito! Fe’i chikito e ta move. Ora cu tin show e tabata sinta den e cortina, wak… Pierangely mescos.”

Antonette ta aclara cu “nunca mi a pusha nan,” pero siguiendo su ehempel, observando nan mama realisa den baile, nan mes a sigui e stapnan aki.

“Mi yiu muhe a bay studia na Merca, gran parti den e estilo moderno,” el a bisa di su yiu mayor, Alydia Wever. “Mi yiu muher Pierangely si a sigui anto el a bay studia na Tilburg, na e academia. Y e ta dunando les tambe.”

En realidad, baile y arte ta core den famia. “Mi mayornan tabata gusta baila tambe! Nan tabata bay Lago Heights Club pa siña diferente baile, bo sa Mericano, hopi leuk bisti tur na Cowboy!” el a conta den harimento.

Papiando di su mayornan, Antonette a conta cu recientemente el a haya sa informacion di su tata di cual nunca e tabata sa cu ta existi, un situacion cu a bolbe mustra e rol di ‘coincidencia’ den momentonan fundamental di su bida.

“Mi tata tabata leger aki na Aruba,” el a conta. Aña pasa, un prima di dje a bay Hulanda cu vakantie, y a bay un museo unda tin hopi informacion di e islanan di tempo di guera. “Anto el a wak un potret di mi tata. El a shock nos!”
Na e museo, tabatin un potret di su tata, cu nomber di Diana y su ruman muher. Alydia, su yiu muher, a manda pasashi pa e pasa Pasco cu su famia na Hulanda. “Tabata hopi leuk! Nos a core paranda, bay aki, bay aya… comemento. Nos a spreek af cu mi prima pa bay e museo, pasobra mi kier a wak,” el a conta.

Asina, cu otro miembronan di famia, a busca e potret en cuestion. “Lagrima a drenta nos, pasobra bo sa? Bo ta wak, nan a pone un cos cu nunca bo a pensa,” el a conta. “El a afecta mi hopi.”

Esaki pasobra su tata mes no t’ey mas pa sa e importancia di loke el a haci.

Y e potret a keda cu un misterio su tras, pasobra e famia, te awo, no sa ken a entrega e potret en cuestion na e museo, ni di unda e potret a bin. “Mi yiu muher a puntra cu ken nan a papia, pasobra niun di nos no tabata sa, e tabata un sorpresa.” Na e museo, Sra. Antonette a haya un buki den cual tin e potret di su tata, y el a comparti esaki cu lectornan di Bon Dia Aruba.

Sinembargo, famia no semper ta facil. Sra Antonette a divorcia tempo cu su yiunan tabata chikito, y mester a lanta nan su so. “Mi a keda mi so cu mi dos yiunan, mi a zorg pa nan caba scol, pa nan bay studia… nan tabata mi bida, y te ainda.” Pero manera e mes ta bisa, “awe tur cos ta bon!”

“Mi ta feliz con bida ta bay. Mi ta satisfecho. Mi sa mi a haci mi best pa mi yiunan. Mi ta feliz!” el a finalisa bisando. “Mi ta gradici Dios cu mi bida a bay asina.”