(NLTimes) – Lo evacua 3 pasahero contagia for di e cruise ship Hondius, actualmente na e costa di Cabo Verde y a hiba nan Hulanda pa ricibi cuido medico.

Un di nan ta Hulandes, segun ministerio di Extterior, ken a bisa cu e evacuacion ta aregla lo mas pronto posible. E barco a reporta varios caso di Hantavirus entre pasaheronan y tripulacion.

E ministerio ta bisa cu te ainda no ta cla con y ki dia e evacuacion lo tuma luga. E ta trahando cu e compania di e barco, den coordinacion cu autoridadnan di Cabo Verde, e Instituto Nacional pa Salud Publico y Medio Ambiente (RIVM), proveedornan di cuido di salud y paisnan for di cual e pasaheronan riba Hondius ta origina. “E bienestar di esnan involucra, ta claramente, e prioridad top,” e ministerio a bisa den un declaracion.

E pareha Hulandes a fayece despues di ta abordo di e barco na Argentina, unda ta kere cu nan a keda infecta. Un miembro di tripulacion Aleman tambe a fayece, mientras cu un pasahero Britanico ta actualmente ricibiendo tratamento na hospital di Sur Africa.

Empleadonan di alivio ta evacuando dos pashent seriamente herida for di e barco pa tratamento na Hulanda, segun World Health Organization ta reporta. Experto den malesanan contagioso Maria van Kerkhove a confirma cu e pashentnan actualmente ta stabil.

“Dos pashent ta keda abordo di e barco y ta den preparacion pa evacuacion medico cu rumbo pa Hulanda pa ricibi tratamento,” Van Kerkhove a declara. El a agrega cu un tercer individuo, ken anteriormente tabatin un keintura leve, awo ta den bon condicion y no ta exhibi cualkier sintoma di malesa.

WHO ta bisa cu tin posibilidad cu e contagio di Hantavirus a sucede entre personanan abordo di e cruise ship. Un experto di WHO a sugeri cu esaki tambe por splica e morto di e pareha Hulandes, aunke esaki te ainda no ta confirma y ta trata como un suposicion. E barco actualmente ta den ruta pa Islanan Canaria, segun e organisacion.

E prome infeccion probablemente a sucede pafo di e barco, cu e virus treci abordo segun Maria van Kerkhove di WHO. “Pero nos ta kere cu tin un contagio di ser humano pa ser humano entre esnan cu contacto hopi cercano, entre un muhe y un homber, personanan cu ta comparti cabina, etc,” el a bisa. Esaki ta dicon esnan cuidando di e pashentnan mester proteha nan mes adecuadamente, Van Kerkhove a agrega.

Segun Van Kerkhove e gobierno Spaño a acepta cu e barco por dirigi su mes na Islanan Canaria pa un “investigacion di epidemia completo, desinfeccion completo di e barco y claramente evaluacion di e riesgonan pa e pasaheronan cu ta abordo.”

Autoridadnan aya a bisa e noticiero RTVE cu te ainda mester yega un decision.

Pasaheronan a ricibi instruccion pa keda den nan cabina, cu cuminda y awa aparentemente den cantidadnan suficiente abordo. Trabao tambe ta andando pa desinfecta e barco.

E evacuacion di e dos pashentnan mas critico ta den coordinacion cu colaboracion di autoridadnan di ambos pais, ademas di Oceanwide Expeditions, e compania tras e barco, segun WHO.