Dr. Norma Alvarez ta un profesional cu tin mas di 40 aña trahando den servicio di salud di Aruba. Na caminda pa Dia di Mama, Bon Dia Aruba a tene un combersacion inspirador cu Dr. Alvarez tocante salud, maternidad, spiritualidad y optimismo den bida.

A pesar di ta conoci na Aruba como un di e miho dokternan, cu hopi di su pashentnan ta aprecia, Dr. Alvarez a cuminsa conta e no a cuminsa studia medicina na universidad. “Mi no a cuminsa cu salud, mi a cuminsa cu finanzas,” pasobra den su ambiente familiar tin hopi hende den ramo di finanzas. “Mi ta gusta finanzas tambe, pero despues mi a dicidi di cambia.”

El a conta cu tempo cu e tabata studiante, e prome aña di universidad tabata estudio general, cu oportunidad pa cambia despues. Asina e tabatin algun amigo cu ta studiando medicina. Un dia a sucede un lamentable accidente di barco, cu morto y herido, y el a haya su mes den un posicion di por duna ayudo. “Tabata falta man, nos tabat’ey, tur hende a yuda cu algo. Y di eynan mi a bisa si, mi ta bay bira dokter.”

“Mi ta hopi agradecido cu pueblo di Aruba”

Na Santo Domingo, Dr. Alvarez a conoce y casa cu un Arubiano-Dominicano. Despues di 23 aña di biba na Santo Domingo, e casa kier a bin back Aruba. Pa Dr. Alvarez, bin Aruba “tabata un decision dificil.”

“Mi tabata haciendo posgrado. Mi casa kier a bini [Aruba], dus el a bin prome.” Dr. Alvarez kier a sigui studia, pero finalmente, a duna prioridad na su matrimonio y a join su casa na Aruba, un decision cu a marca su destino di un manera positivo.

“Esaki tabata berdad un bon experiencia. Mi ta hopi agradecido cu pueblo di Aruba, cu su gobernante. Pasobra ora mi a bin Aruba mi a haya tur porta habri. Asina fantastico,” e ta recorda cu aprecio.

Tempo cu Dr. Alvarez a bin Aruba tabata prome cu Status Aparte, dus pa bin biba na Aruba tabata bay via Antias, y e mester a manda su aplicacion pa Corsou. Sinembargo, e proceso tabata tarda, y Dr. Alvarez tabatin mester di claridad. “Si ta si of no, mi kier sa lihe, pa mi no perde mi estudio na Santo Domingo, cu tabata andando.” E ora el a bay Corsou y a entrega su documentonan cerca departamento di Salud. “Despues mi a bisa mi kier papia cu e minister, pa via cu si e bisa mi cu no tin posibilidad, mi ta bay di biaha pa mi no perde tempo,” e ta recorda.

Sinembargo, a inform’e cu pa papia cu e minister e mester un cita. “Mi a bis’e, yama e minister, yama… Dos minuut so mi kier puntra.” Pa su suerte, e minister a scuch’e for di paden y a puntra ta ken ta papia. E ora e minister a bis’e bay top’e na un restaurant.”Nan tabatin un reunion eynan. Mi a come cu tur e ministernan di Corsou e dia ey. Y despues, hasta nan a hiba mi aeropuerto!”

Y net un siman despues di e reunion, su permiso di trabao a yega.

“Nos no tin di envidia ni bay niun caminda pasobra aki nos tin suficiente”

Dr. Alvarez a expresa su aprecio enorme pa sistema di salud di Aruba, principalmente desde cu e mes ta un sobreviviente di cancer. “Na aña 2024, na juli, mi a haya cancer di mama. A pesar cu mi a haci mi mamogram na tempo, pero mi a hay’e.” El a conta cu e tabata un forma di cancer agresivo, cu si e no lo a haci su mamogram, talbes lo tabatin un resultado menos positivo.

E experiencia aki tabata marca fuertemente pa un aspecto spiritual. “Mi a sinti un tiki dolor, mi a pensa por ta ta un quiste, algo chikito. Pero den mi oracion – algo cu si mi ta bay bisa, pasobra e ta un testimonio. Den mi oracion mi a bisa, ‘ay Dios, mi no kier operacion. Si tin algo, kit’e.’ Y mi a sinti un voz cu a bisa mi, ‘e ta pa lihe’. Esey so. Dus mi a bisa, ok, mi tin cu hacie lihe.”

El a bay haci e test mesora, y tabata cancer. “Ta dificil pa bo tende algo sin cu tin un hende cu a bis’e,” el a bisa di su experiencia. “Pero Dios semper ta cerca nos. Y esaki ta un testimonio cu si mi kier bisa, pasobra ta algo special pa hendenan sa, nos ta wanta na nos espiritu… Cada dia nos tin cu pidi Dios keda un paso dilanti di nos. E experiencia a hiba mi mas den lo espiritual.” E ta conta con impactante tabata cu e voz cu el a scucha den oracion, a scapa su bida.

El a conta ademas cu su experiencia a mustr’e cu e team di Oncologia na Aruba ta “tremendo.”

“Un tremendo ekipo. Nos no tin di envidia ni bay niun caminda pasobra aki nos tin suficiente.”

Dr. Alvarez a manda palabra di gradicimento na tur dokter cu a yud’e durante su tratamento pa cancer, cu na Aruba ta hopi avansa y excelente. “Mi no a bay afo busca nan. Nos tin un bon cos na Aruba. Ami ta dokter y mi tin experiencia di ultimo 10 pa 15 aña, Aruba a bay hopi ariba cu cancer. Pasobra e supervivencia ta enorme,” el a conta.

“Bira mama ta algo asina maraviyoso”

Dr. Alvarez ta conta cu semper tabata su deseo pa bira un mama. “Pasobra bira mama ta algo asina maraviyoso. Yiu ta e prolongacion di bo, y ta un motibo pa sigui.”

Sinembargo, tabatin un momento cu Dr. Alvarez no tabata sigur cu e soño aki lo bira un realidad, ya cu su casa tabatin problema pa haya yiu. “Y nos tabata pensa, kisas si, kisas no,” e ta recorda.

“Despues mi a nota cu mi menstruacion no a bin, pero ni sikiera mi tabata pensa, pasobra nos tabatin como ocho aña sin nada.” Su casa ta esun cu a bis’e cu probablemente e tabata na estado, y en berdad a resulta asina, e tabata na estado cu morocho.

Lamentablemente, un di e morochonan a fayece den e bariga, pero e otro si a logra sobrevivi, algo cu tabata realmente un milagro.

Sinembargo, como un dokter, cu ta un profesion asina exigente, no ta facil pa ta un mama na mes momento. “Esaki ta un tiki dificil, ora bo ta un profesional y bo tin yiu, pero nos tin cu haya tempo pa tur cos. Pasobra un ta bo meta, bo realisacion como muher, y e otro tambe ta bo realisacion como famia, como mama. E ta dos rol cu mester biba y haya tempo cada un.”

Pero e balansa aki no ta imposible. Dr. Alvarez ta bisa cu por haya e balansa door di duna tempo na e yiunan. “Mi tabatin un praktijk masha pisa, pero asina mes mi ta haya tempo pa mi yiu.” Por ehemplo, e ta conta con diasabra cu diadomingo tabata dia di famia. “E ora e sa cu e tin su espacio. Atardi semper un rato mi ta cu mi yiu… pa nos keda cerca di nan. Mi casa cu mi a duna basta tempo na nos yiu.” E ta conta cu a pesar di esey, su yiu mas chikito tabata haci joke di yam’e y pidie pa un cita pasobra e tabata kier a pasa mas tempo cune. Awo tur yiu di Dr. Alvarez ta grandi caba, y su prome nieto ta na caminda.

“Mi mama ta e persona mas special cu mi a yega di conoce”

Tocante kico a dun’e forsa y inspiracion pa un carera y un bida asina exitoso y completo, Dr. Alvarez a bisa cu “di chikito semper mi tabata social,” y semper tabata involucra por ehempel den fundacion y yuda otro. El a bisa cu e idea di bira dokter tambe tabata basa riba su deseo semper pa yuda comunidad. Y hopi di esaki ta bin pa motibo di su mama. “Mi mama ta e persona mas especial cu mi a yega di conoce,” el a bisa cu hopi cariño. “E tabata un señora hopi spiritual. Mi ta admir’e hopi, asina hopi cu mi kier ta manera e.”

Dr. Alvarez ta conta cu su mama tabata yuda tur hende. “E tabata bisa mi, ‘Norma, no tira ningun paña afo. Paña cu bo tin bon, trec’e.’ Pasobra e tabata regala pa un hende.” Asina semper e tabata pendiente di esnan rond di dje. Su lasonan cu su comunidad tabata asina fuerte, cu hopi hende tabata stim’e. Y esaki tabata e influencia mas grandi den forma personalidad y balornan di Dr. Alvarez. Y asina tambe el a transmiti e balornan aki pa su propio yiunan, contando cu un di nan, Dr. Carter – kende ta traha na e mesun praktijk – “ta comparti mi mesun sensibilidad.”

Pa finalisa, Dr. Alvarez a bisa: “Pa tur e yiunan eyfo, corda cu mama t’ey. Dun’e aunke sea un sunchi, pero presente. Feliz dia di mama!”