Diamars atardi a ser confirma e fayecimento di conocido comerciante Ruben Mansur na edad di 93 aña. Cu su fayecimento, Aruba ta perde un empresario respeta y un miembro importante di un famia cu a hunga un papel grandi den desaroyo comercial di e isla durante hopi decada.
Ruben Mansur tabata ampliamente reconoci pa su dedicacion den mundo di comercio y su participacion den diferente negoshi tanto local como internacional. Desde hoben el a cuminsa traha hunto cu su tata den importacion y exportacion, desaroyando experiencia den comercio y maneho di empresa. Mas despues den bida, el a sigui amplia su actividad comercial y a funda su propio empresa.
Hunto cu su trabao den negoshi, Ruben Mansur tambe tabata conoci como un persona comprometi cu comunidad. El a participa activamente den varios asociacion social y actividadnan caritativo, semper dispuesto pa brinda apoyo unda tabata necesario.
Famia, amigo y henter comunidad ta lamenta profundamente su perdida, mientras cu su legado empresarial y social lo continua biba den memoria di hopi hende.
Bon Dia Aruba ta expresa su mas sincero palabranan di condolencia na famia Mansur y sernan stima den e momento dificil aki.
