Bon Dia Aruba a tin e placer di por sinta un rato y combersa cu Maryann Rodriguez. Un nomber y figura conoci den medio pa su gran talento y presencia riba escenario, ken via su bos ta impulsa un conexion cu musica y alegria cu ta penetra nos curazon y alma.

Ademas di ta un artista cu ta inspira generacionnan pa tambe desaroya nan talento y kere den nan mes, Maryann ta un mama dedica y luchador cu tin 3 yiu y esaki ta pone agrega un faceta mas na Maryann como persona. No solamente e ta un artista cu tin un balor inmenso pa loke ta trata cultura y talento di nos isla, sino tambe e ta un mama ehemplar cu ta un inspiracion pa tur esnan cu conoce y mir’e.

E tabata un honor di por siña un poco mas di un persona cu un trayectoria asina exitoso, cu a contribui na celebracionnan importante cu ta comparti e cultura di nos isla na un nivel asina halto y awe nos kier comparti esaki cu comunidad.

Pa cuminsa, el a conta nos un poco mas di ken e ta y e trayecto cu a trece e Maryann di awe, contando cu “pa mi ta semper algo hopi special ora mi por comparti un tiki di mi bida, mi trayecto y tambe e cosnan cu a forma mi como persona y artista,” el a comparti, agregando cu e “ta un persona bastante familiar, humilde y hopi apasiona pa musica. For di chikito mi tabata gusta canta y expresa mi mes door di musica. Tur paso cu mi a tuma den bida a yuda mi bira e Maryann di awe, un muhe cu ta sigui lucha pa su soñonan mientras tambe ta pone Dios y famia na prome lugar.”

“Mi ta mira mi trayecto como un caminda yen di aprendisahenan, sacrificio y hopi bendicion. Mi a crece cu amor pa musica y poco poco mi a descubri cu escenario tabata e lugar unda mi por ta mi mes completamente.” E caminda aki no tabata uno facil, y Maryann ta conta cu “a tin hopi reto, pero cada experiencia a forma mi caracter y a duna mi mas forsa. Awe mi ta sinti mi mes mas madura, mas sigur di ken mi ta y mas agradecido pa tur oportunidad cu mi a ricibi.”

Maryann tin varios aña caba formando parti di un di e gruponan mas exitoso cu nos conoce localmente. Esaki ta un fuente di inspiracion pa tur esnan cu tin soñonan similar o simplemente ta fanatico di su gran talento. El a conta cu “musica a haya mi den un momento den bida unda mi tabata busca un manera di expresa mi sentimento y conecta cu hende. Mas aleu di escenario, musica ta terapia pa mi. E ta un forma di comunica emocionnan, di inspira otro hende y di uni comunidadnan. Ora mi ta canta, no ta solamente entretenimento, e ta un pida di mi curason cu mi ta comparti cu pueblo.”

Bira un mama ta un experiencia transformativo pa tur muhe cu ta den e proceso, pero haci esaki mientras tambe ta un figura publico y cantante ta agrega un capa mas. E experiencia di embaraso tabata un proceso di cambio pa Maryann, yen di felicidad pero tambe realisacion cu bida realmente lo cambia. “Definitivamente, embaraso despues di 16 aña a cambia mi completamente. E momento cu mi a tende e curasonchi di mi baby pa prome biaha, ey mi a realisa cu nada lo ta mescos mas. Mi prioridadnan a cambia instantaneamente. Mi a cuminsa mira bida cu otro wowo, mas calma y mas amor. Naturalmente tin hopi emocion y inseguridad tambe, pero e experiencia a haci mi sinti mas fuerte como muhe.”

Actualmente Maryann tin un baby di 2 luna y esaki ta un tempo sumamente bunita pero tambe por ta agotador, conhuntamente cu sentimentonan profundo di felicidad tambe por trece complicacion pa algun den con pa crea un balans entre ta mama y ta un artista na mesun tempo. Maryann a comparti con e ta mantene e balans aki, comentando cu e ta “un mama orguyoso di tres yiu (19, 16 y un baby recien di 2 luna), y definitivamente maternidad a cambia mi bida completamente. Actualmente mi no ta cantando ni subi escenario paso mi a tuma un break pa realmente disfruta di e etapa aki cu mi baby. Cu su debido tempo mi lo ta back sigur.”

“Pa mi, e tempo aki ta hopi valioso. Mi kier ta presente den cada momento, cada sonrisa y cada paso di mi baby. Naturalmente musica semper ta den mi curason, pero aworaki mi enfoke principal ta mi famia y disfruta di e bendicion di ta mama.”

Frecuentemente ora artistanan ta bira un mayor, nan sa bisa cu bira un mayor a cambia e manera cu nan ta mira y sinti nan musica y esaki no ta diferente pa Maryann. Maternidad a tin un impacto profundo riba su identidad y bida como un artista; “mi ta sinti musica hopi mas profundo. Mi ta conecta diferente cu cierto letra y emocionnan. Inclusivo ora mi ta subi escenario, mi tin otro energia. Mi ta sinti cu mi tin un motibo mas grandi pa sigui lucha y pa laga un bon ehempel pa mi yiunan. E experiencia di maternidad definitivamente a habri otro parti di mi creatividad y sensibilidad.”

E poder di un mama ta uno grandioso, combina cu e dedicacion, perseverancia y disciplina di un artista, esaki ta forma un ehempel cu ta merece admiracion, pero tambe ta provee inspiracion pa otronan cu tin soño y deseonan cu posiblemente ainda nan no a cumpli, pero cu ehempel aki por haya e forsa pa por sigui lucha pa cumpli nan. Di cierto forma, nos ta mira Maryann ta carga un baby den un brasa y cu un microfon den otro man.

Nos a puntra Maryann ki mensahe e lo manda na e muhenan riba e isla cu tambe ta purbando di carga nan baby of yiu(nan) den un brasa pero tambe wanta nan soñonan den e otro, y el a comparti un mensahe sumamente inspirador; “Mi lo bisa nan cu no laga niun hende haci bo kere cu bo mester scoge entre ta un bon mama of sigui bo soñonan. E dos cos por bay hunto. Si, lo tin sacrificio y momento dificil, pero bo no mester perde bo mes den e proceso.”

“Sigui kere den bo mes, busca apoyo, y no tin miedo di bay tras di loke ta haci bo feliz. Bo yiu ta bay beneficia ora nan mira un mama fuerte, feliz y determina.”