Diabierna merdia rond mas o menos 12:35, informe a drenta den Central di Polis cu un UTV a accidenta na altura di Blackstone Beach. Mesora a despacha patruya di Santa Cruz y tambe ambulance y brandweer na e sitio.
Na yegada di patruya, nan a encontra cu un hende muher turista cu no tabata duna señal di bida. A haya e UTV entre e barancanan di loke ta parce un boca chikito na canto. E UTV a kentel na banda, cual ta señala cu e vehiculo lo a bolter mientras e victima tabata coriendo e.
Ora a mira e situacion a constata di biaha cu e situacion tabata uno serio unda, segun a reporta, e victima tabata hinca den un buraco sin señal di bida.
Den un trabao coordina, polis, brandweer y ambulance a logra saca e victima y personal di ambulance a cuminsa cu reanimacion mesora. Pero na final no por a haci nada mas pa e victima. Specialista di trafico y polis a presenta un rato despues pa cuminsa nan investigacion. Tambe presenta tabata departamento di slachtofferhulp pa atende cu e famia di e victima.
Dr. Wemeijer a presenta y a constata morto di e turista V.M.L di 39 aña cu nacionalidad Mericano.
Bon Dia Aruba ta manda palabra di condolencia na famia di e fayecido.
