(AFP) – Presidente Donald Trump diadomingo a adverti Iran cu “no ta bay resta nada di nan” si Teheran no cera rapidamente un acuerdo di paz cu Merca.
Washington, den conflicto cu Teheran desde cu forsanan Mericano y Israeli a lansa atakenan mayor contra e republica Islamico cuminsando dia 28 di januari, a haya problema pa kibra un impasse y haci progreso den direccion di caba cu un guera cu a sacudi Medio Oriente y a aumenta prijs di energia.
“Pa Iran, holoshi ta bati, y miho nan cuminsa move lihe, of no ta bay resta nada di nan,” Trump a skirbi riba su plataforma Truth Social. “Tempo ta esencial!”
E guera a conduci na un blokeo efectivo di e Estrecho di Hormuz, un via critico door di cual alrededor di 20 porciento di exportacion di petroleo global ta pasa den temponan di paz, y a hinca bisiñanan Israel y Libanon den un conflicto mortal na banda.
Estado clerical di Iran, patronchi di Hezbollah, a exigi un stop duradero den e combate na Libanon prome cu cualkier acuerdo mas amplio di paz cu Trump, kende ta frustra pa e rechaso di Teheran di un acuerdo cu su terminonan.
Un oficial militar Israeli a bisa diadomingo cu Hezbollah a lansa como 200 proyectil contra Israel y su trupanan durante weekend, a pesar cu Israel y Libanon a bay di acuerdo pa extende un acuerdo pa stop combate.
Washington y Teheran a bay di acuerdo cu un tregua dia 8 di april, pero negociacion di paz a keda para, y atakenan sporadico a continua.
Diadomingo, medionan Irani a bisa cu Merca no a haci ningun concesion concreto den su respuesta mas recien na e agenda proponi pa Iran pa negociacion pa caba e guera.
Agencia noticiero Fars a bisa cu Washington a presenta un lista di cinco punto cu ta inclui un exigencia pa Iran keda cu apenas un sitio nuclear den operacion y transferi su suministro di uranio altamente enrikeci pa Merca.
