E acusacionnan anonimo rond di e organisacion di bishita di Su Mahestad Rey Willem-Alexander maart ultimo na Aruba a escala, despues cu partido di oposicion MEP a comparti e carta completo cu e acusacionnan entrega na parlamento, y a exigi un reunion publico urgente cu prome minister Mike Eman (AVP).

Segun e carta anonimo di cuatro pagina, manda bao di e nomber “Mi Dushi Aruba” y dirigi na fraccion MEP den parlamento, a lanta preocupacionnan serio tocante supuesto conflicto di interes, enrikecimento propio y abuso di autoridad conecta cu e organisacion di evento rond di e celebracion di Dia 18 di Maart na Aruba y e bishita real e aña aki.

E asunto a bin dilanti prome siman pasa, tempo cu MEP a solicita un sesion parlamentario urgente pa discuti loke a describi como acusacionnan preocupante relaciona cu e preparacionnan pa e bishita real. E tempo aya, solamente detaye limita a bira conoci publicamente. Awo, cu e publicacion di e henter e carta di acusacion, detayenan mas specifico di e acusacionnan a bin dilanti – maske ningun di e acusacionnan a keda verifica independientemente.

Den e documento recien publica, e autornan anonimo ta bisa cu inicialmente, un comision nombra pa gobierno a acerca musico profesional y director di orkestra Carlos Bislip pa organisa y lidera un orkestra pa e celebracion di e di 50 aniversario di Himno y Bandera di Aruba, como tambe actividadnan conecta cu e bishita real na maart 2026.

Segun e carta, supuestamente Bislip a hinca den otro un propuesta pa orkesta profesional y a entrega un presupuesto oficial na e comision organisador. E keho ta declara cu e propuesta aki a keda rechasa despues pasobra a considera e costo demasiado halto.

E acusacionnan ta bira mas serio despues.

Conflicto di interes

E carta anonimo ta bisa cu despues cu a rechasa propuesta di Bislip, un miembro di e comision a entrega otro propuesta, aparentemente den nomber di su casa, ofreciendo un alternativa na un prijs mas abao, cu eventualmente a keda aproba. E documento ta argumenta cu esaki por representa un conflicto serio di interes pasobra e miembro di e comision lo tabatin acceso na e propuesta original di Bislip prome cu entrega e oferta di competencia.

E keho varios biaha ta haci referencia na un persona identifica como Zuleika Wever, describi como miembro di e comision organisador y empleado y persona di confiansa di prome minister Mike Eman. Segun e carta, e persona aki lo a tuma contacto directo cu musiconan despues cu a rechasa e propuesta di Bislip, y a invita nan pa participa den otro orkesta bao liderazgo di su casa, Rodney vd Biezen.

E autornan ademas ta alega cu e propuesta alternativo intencionalmente tabatin un prijs tiki mas abao cu e presupuesto original di Bislip y cu e areglo a beneficia e miembro di comision y su casa financieramente.

E documento ta bay asina leu di acusa esnan involucra di manipula e proceso di destaho y usa inapropiadamente e informacion privilegia obteni mediante participacion den e comision.

E keho anonimo tambe ta cuestiona e cualificacion di Rodney vd Biezen pa lidera e orkestra, bisando cu e tabata falta e credencial y experiencia profesional originalmente solicita pa e rol. E carta ta describi cu e orkesta tabata consisti en parti di “musico di caya y di banda” reuni di manera informal.

Inaccion di prome minister

Mas aleu cu e acusacion di conflicto di interes, e documento ta dirigi critica significante riba prome minister Mike Eman mes.

Segun e carta, Bislip lo a informa e prome minister por escrito tocante su preocupacion despues di haya sa di e propuesta competidor. E keho ta bisa cu varios oficial – incluyendo secretario di e prome minister y presidente di e comision – tambe a ser poni na haltura di e situacion. E autornan ta argumenta cu a pesar di supuestamente keda informa di e preocupacion, e prome minister no a duna ordo pa un investigacion independiente ni a interveni apropiadamente.

E documento ta alega cu na lugar di atende e preocupacion pa integridad directamente, a haci esfuerso pa tene e asunto bao mesa y evita un escalacion publico. E autornan anonimo a caracterisa esaki como un “conducta serio castigable” y ta argumenta cu e supuesto inaccion por, riba su mes, constitui un violacion di standard cu ta goberna integridad ministerial y bon gobernacion.

Adicionalmente, e keho ta sugeri cu e asunto potencialmente por tin implicacion administrativo, politico y hasta criminal si na final cualkier acusacion keda proba. E autornan ta haci un yamado pa un investigacion independiente y completo tocante e maneho di fondo publico y e proceso di toma di decision rond di e celebracionnan di 18 di Maart y e bishita real.

E carta a ser manda na fraccion di MEP den parlamento, y ta parce di a keda ricibi oficialmente pa parlamento dia 30 di april, segun un seyo visible riba e envelop inclui cu e documentonan publica.

Contesta di Carlos Bislip

Como contesta na e acusacionnan, Carlos Bislip publicamente a distancia su mes for di e keho y a nenga di tin cualkier participacion den ningun accion politico.

Papiando cu medionan local, Bislip a bisa cu ta usando su nomber den un asunto cu no tin relacion cune personalmente. “Mi ta refuta cualkier idea cu mi lo ta envolvi den esaki,” el a declara, agregando cu e no kier bira “ningun hende su speelbal politico.”

Urgencia den parlamento

Mientras tanto, MEP a intensifica presion politico riba gobierno.
Den un carta formal fecha 12 di mei y dirigi na presidente di parlamento, Marlon Sneek (AVP), lider di fraccion MEP, Evelyn Wever-Croes hunto cu parlamentarionan Edgard Vrolijk y Shailiny Tromp-Lee a solicita un reunion publico urgente cu prome minister Eman pa discuti e acusacionnan.

E partido mas grandi di oposicion ta argumenta cu e acusacion ta toca directamente riba e “principionan fundamental di bon gobernacion, transparencia y integridad den administracion publico.” Segun e solicitud pa e reunion, e seriedad di e acusacionnan y e preocupacion publico creciente ta rekeri pa gobierno duna clarificacion publico dilanti Parlamento y comunidad di Aruba.

E solicitud di MEP tambe ta resalta e importancia di mantene confiansa publico den institucionnan democratico. E parlamentarionan a adverti cu confiansa den gobierno por sufri si cuestionamento rond di e organisacion di e bishita real no ta haya atencion transparente y rapido.

Na e momento aki, no a anuncia ningun investigacion independiente ainda, y gobierno no a duna un respuesta oficial detaya pa henter e contenido di e carta anonimo. E acusacionnan no ta proba.

No tin hallazgo oficial, conclusion hudicial of determinacion formal di mala conducta cu a keda publica te awo. E acusacionnan actualmente ta existi den forma di un keho anonimo cu awo a bira parti di un debate politico cada bes mas fuerte.

Asina mes, e publicacion di e carta completo a escala significantemente e controversia rond di loke originalmente a keda celebra como un evento nacional mayor marcando e aniversario constitucional di Aruba y e bishita real di Rey Willem-Alexander.

Loke a cuminsa como un keho politico awo a bira un confrontacion politico mas amplio tocante transparencia, practica di destaho y responsabilidad ministerial.

Si parlamento bay door cu e reunion publico solicita – y si un investigacion formal cuminsa – lo por determina con largo e asunto ta bay keda den centro di agenda politico di Aruba den proximo simannan.