Maria Corina Machado ta afirma cu lo e ta candidato presidencial na Venezuela y a anuncia cu “pronto” e lo bolbe na e pais

(Infobae) – Lider di oposicion Venezolano y ganador di Premio Nobel di Paz, Maria Corina Machado a declara diasabra na Panama cu e lo postula como candidato presidencial den eleccion “limpi y liber” cu, segun su persona, lo ser celebra na Venezuela como parti di un plan di tres fase cu ya ta den marcha pa restaura “libertad” na e pais.

Machado a agrega cu lo e competi “cu tur hende, cu cualkiera cu kier ta candidato” si e proceso electoral ey ta convoca. “Mi lo ta candidato, pero por tin otronan tambe. Mi lo gusta competi cu tur hende, cu tur persona cu kier ta candidato (…) nos lo tin eleccion limpi y liber,” el a bisa ora a puntr’e si lo e postula como candidato presidencial.

E tambe a pone enfasis riba e impacto regional di e lucha democratico na Venezuela, declarando cu “libertad di Venezuela lo representa libertad di [continente Americano] pa semper.” Durante un reunion cu lidernan politico, miembro di Comando Con Venezuela y representante di Parlamento Panameño, e lider di oposicion a pone enfasis riba e dimension internacional di e movemento opositor y e rol di diaspora Venezolano como motor di cambio. Den e contexto ey, el a afirma cu Venezuela, Cuba y Nicaragua “lo ta liber.”

Machado tambe a referi na su posible regreso pa Venezuela den corto plaso: “Coordina cu gobierno di Merca, nos a papia tocante esaki. Nan ta nos principal aliadonan y ta cla cu mi regreso, manera esun di otro compañeronan, tin un proposito: acompaña y fortalece e plan cu Secretario di Estado [Mericano, Marco Rubio] a presenta den su tres fase y prepara nos pa e di cuatro fase. Esaki ta nos fase, e reconstruccion di nos pais.” Y el a agrega: “Respuesta ta si, y lo ta pronto.”

“Mi sa cu hopi hende ta bisa: ‘Pero kico ta pronto? Kico ta pronto?’ Tur cos tin su momento. Nos mester sigura cu tur cos ta bon hinca den otro, e trabaonan cu nos ta haci pafo y e trabaonan cu ta ser haci paden di e pais. Parti di e trabao y discusionnan di e dianan aki ta precisamente preparacion pa e momento grandi di regreso di miles di Venezolano.”

E lider opositor a yega Panama pa sostene un serie di reunion cu aliadonan regional. For di comienso di su bishita, Machado a enfatisa e necesidad di multiplica e mensahe di unidad y determinacion: “Laga nos tur transmiti. Na tur Venezolano, na tur Panameño y ciudadano di otro paisnan cu ta acompaña nos causa y na tur nos aliadonan. Nos tin un mandato, nos tin un ruta, nos tin un strategia y awe nos no tin solamente un liderato politico fuerte, sino tambe un sociedad cohesivo, uni, determina y organisa manera ningun otro,” el a bisa esnan presente.

E reunion na Ciudad de Panama a reuni figura politico local y ciudadano Venezolano residente na e pais, cu a participa den actividadnan di Comando Con Venezuela. Bishita di Machado ta forma parti di un gira internacional cu meta di fortalece aliansa y haci e crisis Venezolano mas visible den ambiente diplomatico Latino Americano.

Den su discurso, Machado a compara e mobilisacion di diaspora Venezolano cu otro fenomenonan migratorio global: “Cua otro diaspora na mundo tin e nivel aki di entusiasmo y organisacion? Cua otro causa ta pone hende subi caya simultaneamente den 400 ciudad riba e planeta? Cua otro red of comunidad di un pais por vibra simultaneamente manera awe?” E lider a enfatisa e caracter transversal di e movemento, cu ta transcende frontera y ta reuni simpatisante di diferente nacionalidad. “Mi a bisa: ‘Un Venezolano a bin.’ No, e tabata Panameño, pero e tabata sinti cu esaki tabata su causa tambe y p’esey mi ta gradici bosonan hopi pa boso presencia aki.”

Durante e reunion, e lider di oposicion Venezolano a balora diversidad interno di e movemento: “Nos tin diferencia? Naturalmente, un pais unda tur hende ta di acuerdo lo ta hopi laaf. Pero loke nos ta firme riba dje ta cu tin un obhetivo aki y esey ta libera nos pais. Un proposito: transicion pa democracia mediante eleccion presidencial liber y husto, unda tur Venezolano paden y pafo di e pais por vota.”

Den e sentido ey, el a enfatisa e urgencia di e nombramento di un Conseho Nacional Electoral (CNE) nobo cu ta cumpli cu criterionan establece den Constitucion, como un paso fundamental pa progreso den direccion di un transicion real pa democracia na Venezuela.

Machado tambe a adverti tocante intentonan di division y desinformacion: “Nan lo busca dividi nos, nan lo purba confundi, nan lo purba desvia nos. Ya nos tin bastante experiencia y nos sa con pa enfrenta esaki. Cu mas unidad, cu mas conviccion, pero sobre todo cu berdad.” El a enfatisa cu e exito di e strategia opositor ta basa riba transparencia y prioridad di ciudadano. “Aki centro y motibo di tur cos ta nos pueblo. Y mi kier pa mundo henter sa awe for di Panama cu prioridad di tur loke nos a discuti ta angustia di loke Venezolanonan ta biba awe,” el a subraya.

E evento tambe a sirbi como espacio pa reconoce solidaridad internacional, specialmente di miembro di Parlamento Panameño cu ta sostene e causa Venezolano. Presencia di lidernan politico y representante institucional local a ser interpreta como un gesto di apoyo pa e proceso di transicion democratico na Venezuela.

Machado a reitera cu e ruta delinea pa oposicion Venezolano tin como meta realisacion di eleccionnan presidencial competitivo, cu garantianan pa tur votador, tanto paden como pafo di pais. E tambe a considera cu comunidad internacional y e region mester acompaña e proceso aki y sigura respet pa derechonan civil y politico di poblacion Venezolano.