Gabinete di Reino ta hopi consciente di e situacion vulnerabel di e tres islanan autonomo den Reino y islanan BES. Asina a bisa den un carta pa Comision Permanente di Reino den Parlamento Hulandes como reaccion riba e conclusionnan di IPKO di Februari ultimo. Manera ta conoci, e Interparlementair Koninkrijksoverleg a acepta un serie di mocion y tambe a manda preguntanan pa Gabinete di Reino riba un serie di preocupacionnan y recientemente Secretario di Estado pa Asunto di Reino Eric van der Burg a manda e contestanan.

Segun Van der Burg, den su carta di maneho pa Relacionnan di Reino, e gabinete a dicidi pa fortifica e colaboracion entre tur e paisnan pa loke ta defensa, relacion exterior y seguridad, conforme e responsabilidad segun Statuut. Asina ta trahando hopi cerca cu Corsou, St. Maarten y Aruba pa crea resiliencia contra crisis, unda a enfoca riba e vulnerabilidadnan mas grandi.

Seguridad di cuminda ta un di esnan mas importante. E cambio di maneho comercial di Merca y e guera na Iran a hisa e gasto di transporte y a enfatisa e posicion vulnerabel di e islanan.

Pa tal motibo mes a lanta un grupo di trabou conhunto entre e seis islanan den Caribe y e Ministerionan relevante na Hulanda pa sigui e desaroyonan di cerca. Ademas ta trahando na busca posibilidad di diversificacion comercial, reforsa conexion regional y hisa e resiliencia economico y logistico di e islanan. E obhetivo ta pa baha e dependencia di conexionnan internacional cu ta keda influencia pa crisisnan y sigura continuidad di e fluho di productonan esencial.

Pa loke ta HOFA, Rijswet houdbare overheidsfinanciën Aruba, ainda ta wardando e conseho di Raad van State cu despues mester bay den un revision di e proposicion. Cu Corsou y St. Maarten mester tin deliberacionnan riba palabracionnan con ta bay paga e prestamonan cu ta data di 2010.

Futuro di aviacion y conexion entre islanan

E lista di palabracion di e ultimo IPKO a enfatisa e importancia di bon conexion aereo y maritimo entre e seis islanan di Reino den Caribe, cu ta esencial pa desaroyo economico di tur. Gabinete di Reino ta mustra cu ademas un bon conexion ta duna acceso na servicionan manera enseñansa y cuido, y sosten di relacionnan familiar.

Sinembargo, reglanan nacional y internacional, cu ta regula entre otro subsidionan estatal ta trece reserva pa brinda sosten financiero pa inverti den e conexionnan. Gabinete di Reino como tal ta considera importante e discusionnan pa un posibilidad di un ferry entre St. Maarten, St. Eustatius y Saba, y alabes ta compronde e preocupacionnan di e gasto halto di conexion entre e islanan ABC. Realidad ta keda cu e escala chikito di mercado ta keda hunga un factor grandi. Sinembargo, Gobierno di Reino ta comprometi pa Ministerionan relevante na Hulanda keda brinda asistencia y experticio pa mira di ki forma por yega na miho conectividad, cumpliendo cu tratadonan y tur regla di seguridad.

Seguridad cibernetico

Delegacionnan di IPKO a ricibi presentacion di Sr. Juri Nicolaas di Servicio di Seguridad di Aruba riba seguridad cibernetico, y tambe a papia di e strategia di seguridad pa Reino. E deseo ta pa mas cooperacion y un cuadro huridico comun riba proteccion di data pa Reino Hulandes.

Segun Gabinete Hulandes ya ta trahando bon cu otro riba procesamento, reparti y comparti informacion y data, unda e enfasis ta e harmonisacion di proteccion di datonan personal. E trayecto pa yega na un harmonisacion na nivel di Reino pa proteccion di informacion personal ta un tema cu regularmente ta discuti durante e asina yama Vierpartijenoverleg, cu ta e encuentro regular entre representantenan di e paisnan den Reino.

Embehecemento

Gabinete di Reino ta constata cu embehecemento y cantidad di hende cu ta yega edad di pensioen por tin consecuencia serio pa e sostenibilidad di seguridad social y cuido den e parti Caribense di Reino. E desaroyo demografico tin efecto pa organisacion di enseñansa, disponibilidad di suficiente trahado y finalmente finanzas publico. Escala chikito di e islanan ta haci cu e cambionan aki ta mas bisto ainda y ta haci e vulnerabilidad di e servicionan publico y sectornan economico mas grandi ainda.

E comision estatal Desaroyo Demografico Caribe Hulandes 2050 a duna conseho riba e tema aki, y gabinete di Reino ta considera di gran balor cu e analisis, experiencia y potencial programa di maneho cu keda desaroya riba islanan BES por keda comparti cu e islanan ABC y vice versa. Con cu bay bin, e desaroyo demografico lo keda influencia tur, entre otro pa motibo di fluho di migracion, conexion economico y mobilidad laboral regional. Na mesun momento, e seis islanan den futuro lo keda depende di otro pa por mantene servicionan, provisionnan y desaroyo economico. Ya caba tin colaboracion riba diverso tereno entre e islanan y paisnan den Reino. Enseñansa ta un parti importante ora ta trata di intercambio di studiante, disponibilidad di facilidadnan di enseñansa y colaboracion entre institutonan educativo. Gabinete di Reino ta mira reforsamento di e colaboracion aki y intercambio di conocemento como balor agrega den ya cu asina por traha hunto pa solucionnan sostenibel pa contraresta efectonan di embehecemento pa henter Reino.

Adaptacion y cambio di clima

Segun e palabracionnan riba e tema di adaptacion y cambio di clima, unda entre otro a tene na cuenta e decision di Corte na Den Haag di Januari 2025, cu Greenpeace Hulanda a lanta contra Estado Hulandes riba cambionan climatico na Boneiro. Na April caba, Minister encarga cu Clima entre otro, hunto cu Secretario di Estado van der Burg a informa e comision cu a yega na e conclusion cu tin motibonan legal pisa pa ehecuta e decision di corte. Parlamento Hulandes lo haya mas informacion mas tarda durante Prinsjesdag 2026 con leu Hulanda ta cu ehecucion di e sentencia di hues.