Dia 20 di mei a firma oficialmente e acuerdo pa habri e prome Zona di Desperdicio na Barcadera. Cu e firma di e acuerdo aki, e partnernan a confirma nan compromiso pa crea un sistema cu ta mas organisa, accesible y sostenible, caminda residentenan por hiba nan desperdicio di un manera cu ta responsable y na mesun momento contribui activamente na un Aruba mas limpi.
Aruba Limpi: di conscientisacion pa accion real
Como parti di e campaña Aruba Limpi, A.T.A. no ta solamente crea conscientisacion pa mantene Aruba Limpi, pero ta enfoca tambe riba cambio di comportacion. E campaña aki lo core paralelo cu e introduccion di Zona di Desperdicio, creando conscientisacion, pero tambe dunando informacion na nos comunidad riba e uzo corecto di e facilidad, pero tambe riba e importancia di separacion corecto di desperdicio y formacion di habitonan responsabel den maneho di desperdicio.
Cu e introduccion di Zona di Desperdicio na Barcadera, residentenan lo tin acceso directo y practico pa deposita desperdicio di un manera responsabel. E iniciativa aki ta contribui na reduccion di dump ilegal y acumulacion di desperdicio, mientras cu ta fortalece sentido di responsabilidad comparti den comunidadnan. Pa A.T.A., un medio ambiente limpi no ta solamente crucial pa nos imagen como destinacion, pero e ta un inversion directo den sostenibilidad di nos producto turistico y bienestar di nos comunidad. Cu esaki, Aruba ta drenta un siguiente paso concreto pa sigura un futuro duradero pa nos isla.
