Recientemente, Edwin Willems, yiu di Josely Paulina Vasquez Gonzalez kende a ser mata den un hit and run januari ultimo, a reacciona contra e narativa presenta den un programa di opinion local, criticando e manera con ta purba di caracterisa e incidente pa defende e acusado.

Ta trata di e hit and run fatal cu a sucede dia 4 di januari 2026, y a cobra bida di e pareha Josely Paulina Vasquez Gonzalez di 65 aña y Carlos David Vialez Valerio di 54 aña, ambos naci na Republica Dominicana. E chauffeur den e accidente, Chania Fernandes, ta deteni mientras e caso ta andando den corte.

E reaccion di Willems a bin pa motibo di comentarionan den un programa di entretenimento, den cual e presentador local a haci un apelacion na defensa di e chauffeur den e accidente. Den su comentarionan, el a duna un version alternativo di e sucesonan, describiendo e suceso como uno den cual e pareha cu a perde nan bida a “calcula malo e crusamento,” agregando cu nan lo ta na bida ainda “si nan lo a keda para.”

E presentador a pone enfasis riba e hecho cu Fernandes tabata “coriendo den su banda”. Tocante e velocidad na cual e chauffeur tabata core, el a describi e velocidad di 101 kilometer pa ora como “no ta un velocidad, mi kiermen, demasiado. E ta un velocidad mas duro cu normal, pero no exagera.”

Ademas, el a bisa cu “e chauffeur no sa kico el a dal,” agregando cu e chauffeur a core bay cas, yama famia y bisa nan cu “el a dal algo.”

E presentador a sigui bisa cu e chauffeur “tabata bebi” pero “e no tabata burachi. E tabatin dos drinks aden. El a supla hopi abao,” caracterisando e nivel di alcohol di e chauffeur como “300 y algo” y “casi nada.”

Ademas, el a keda pone responsabilidad di e sucedido riba e victimanan mes, y a bisa cu door cu e noticia tabatin impacto den comunidad, “Ministerio Publico, cu no kier perde cara, a dicidi e ora ey cu e persona aki ta keda cera.”

Na defensa di Chania Fernandes, el a bisa cu den comunidad hopi a ataca e chauffeur, “pero loke mi kier splica ta cu e chauffeur tabata coriendo su auto – un tiki mas duro cu normal – pero riba su banda.”

Y a busca di responsabilisa e victimanan, bisando: “Na e brug di Renaissance… bo mester paga tin con bo ta crusa. E ta consehabel pa bo crusa pabao aya, unda cu e zebrapad ta, y no djis crusa unda cu ta. Pasobra esey tambe a hunga un rol.”

El a bisa ademas cu “tin imagennan ta mustra cu e a tabata coriendo riba su banda. Y e hendenan a wak e auto ta bin anto nan a core bin net ora cu e auto a bin. Kiermen si nan lo a djis keda para, nada lo a pasa,” mientras e tabata mustra video impactante di e suceso.

“Esnan cu ta bisa cu el a dal hende bay, si, el a dal hende, el a bay, por ta e mester a para. Pero e no tabata fout. Esey ta loke ta bay wordo splica. Esey ta loke mi kier splica awe.”
El a finalisa bisando cu tin video y mas material cu ta bay ser mustra den corte den defensa di e chauffeur.

E reaccion den comunidad tabata hopi fuerte den rechaso pa e comentarionan aki di e presentador, cu mayoria den su propio audiencia bisando e presentador pa “no praat e goed” y pa “stop di cambia e storia.”

Reaccion di famia

Den un video riba rednan social, yiu Vasquez Gonzalez, Edwin Willems hunto cu Max Ng, studiante di ley y activista; y Thomas Ruiz di asociacion di rijschool, a duna un reaccion na e comentarionan di e presentador di programa.

“Nos a dicidi di traha e video aki pasobra tin hopi cos ta bayendo rond media cu ami como yiu no ta di acuerdo cune,” Willems a splica. “Hopi biaha media ta purba troce e berdad, anto e hendenan no t’ey pa defende nan mes,” el a agrega.

Willems a critica e abogado di defensa durante e tratamento pro forma di e caso den corte. “Mi a mira un abogado cu argumentonan fofo, cu mi ta haya hopi zielig na Aruba cu nos por tin abogadonan asina,” el a bisa. “Nos t’ey pa defende hende, pero ban defende hende realistico, no un forma asina inhumano, no asina baho.”

El a menciona explicitamente e narativa cu “mi mama no a para, anto cu ora e auto tabata biniendo nan a core,” bisando cu den su opinion, “practicamente locual nan kier bisa, locual m’a compronde ta, manera nan a tira nan curpa riba e auto.” Willems a bisa cu ta imposible pa imagina ki miedo of sensacion e pareha victima por a sinti cu nan mester a “core pa nan bida.”

Willems ademas a haci un critica directo contra medionan di comunicacion, sin specifica e programa en cuestion pero referiendo na e comentarionan di e presentador. “Ta full for di comienso nan tin un mal campaña,” el a bisa, recordando cu for di dia di e suceso, e medio en cuestion a bisa cu famia di e acusado a ofrece pa paga gastonan di entiero di e victimanan, locual no tabata berdad.

“B’a bin cu abogado na bo plataformanan pa bo papia delaster un disparate, bo mes ta saca bo conclusionnan, bo mes a bira hues, bo mes a bira polis, bo mes a bira abogado, bo mes a bira tur cos.” Willems a boga pa medionan na Aruba keda neutral y djis duna informacion. “Esey pa mi ta profesionalismo,” el a bisa.

Referiendo specificamente na e comentario cu C. Fernandes no tabata coriendo na un velocidad “exagera”, Willems a bisa: “Bo ta kere si e auto no tabata bin dje duro ey, mi mama lo tabata tanto meter tira gespart, y su pia a bay cay… imagina bo, fo’i banda di brug el a bay crusa, y su pia a bay cay te na e kiosk di informacion cu tin ey bandanan… Si e auto no tabata bin asina duro, e lo a tira mi mama su casa casi 50 meter leu?” El a bisa ademas cu e ta kere cu e video, mustra den e programa, “a wordo manipula,” pasobra den su opinion tin diferencia entre e video cu a circula inmediatamente despues di e suceso, y e video cu ta circulando awo. “E prome video bo por wak letterlijk un biento. Y den esaki bo ta wak tur cos riba un chill.”

Di su banda, Max Ng a bisa cu a pesar cu nunca a yega di persigui un hit and run como intento di homicidio, den e caso aki esaki tabata necesario pasobra “por poco e chauffeur a mata cuatro hende en bes di dos. E hecho cu nan a scapa no ta haci e [hecho castigable] menos grave. E hecho cu nan a scapa ta door di nan mes, no door di e chauffeur.” El a bisa cu e intento di homicidio ta forma parti integral di e caso.

Tambe a pone luz riba e argumento cu e grupo no a crusa riba e zebrapad, bisando cu “esey no ta un hustificacion pa kita bida di dos hende – por poco cuatro.” Segun Ng, hasta si nan lo a crusa riba e zebrapad, chance ta grandi cu e auto lo a dal nan toch. “E hende tabata coriendo riba 150km/h, e tabata riba e limite di alcohol legal, y e tabata coriendo asina den un bebouwde kom caminda e velocidad maximo ta 50km/h. Dus e hecho cu nan ta purbando di cambia e narativa pa manipula hende su mentenan, mi ta haya deshonesto, mi no ta hayele husto, y mi ta hay’e simplemente falta di humanidad di nan banda.”

Ruiz, un experto di trafico, a bisa cu “nos intencion ta aki pa corigi mal informacion cu ta circula riba social media” tocante e incidente. El a bisa cu e zona den cual e accidente a tuma lugar ta un bebouwde kom, cu ta nifica cu mag di core na un velocidad maximo di 50km/h. Tambe el a desmenti declaracion di e presentador cu e chauffeur tabata core “na su banda,” pasobra Ruiz a bisa cu den e video, “e dos linea cera cu ta pinta memey caminda ta mustra duidelijk cu ta riba e linea ey, casi memey di e dos lineanan ey, e ta core,” agregando cu “ley ta bisa cu bo no mag pasa cu parti di bo vehiculo riba e lineanan ey.”

Tambe Ruiz a desmenti e ponencia cu supla 300 ugl, “kiermen e ‘no tabata dje burachi ey.’ Helaas, ley no ta papia di buracheria, ley ta papia asina cu bo surpasa 220 ugl, bo no ta apto mas pa maneha ningun vehiculo. Punt.” Finalmente, el a contraresta e argumento cu e victimanan tabata responsable pasobra nan no a crusa riba e zebrapad. “Shonnan, tur hende cu sa un tiki ley di trafico sa cu no tin niun ley cu ta obliga bo pa usa zebrapad,” Ruiz a bisa.

E caso ta programa pa ser trata den corte na juli, y durante e tratamento, fiscal y abogado di defensa lo presenta tur evidencia pa argumenta nan posicion.