Cada biaha cu tin atencion pa e tereno di refineria na San Nicolas esey ta bay mas tanto na kico mester haci cu e tereno. Si no tin refineria mas, loke pa nos ta un cuenta cera caba, kico lo por inicia na actividad economico viable y sostenible? Pakico no fiha atencion riba e posibilidadnan portuario amplio cu San Nicolas tin?

Den pasado recien atencion tabata bay na varios propuesta pa e tereno di refineria, cu den ningun caso a resulta realizable, en todo caso no den e condicionnan actual. Sin embargo, si explora un poco mas nos mester por detecta cu no ta e tereno (so) ta valioso, talvez e posibilidadnan portuario ta e parti mas interesante. Pa bay mas den detaye: San Nicolas tin e puerto natural di profundidad mas prometedor den nos region. ‘Natural’ ta significa cu e no ta yena cu santo, manera ta e problema na Barcadera, cu ademas no por ricibi barco di mayor tamaño. Motibo pa cual no por descarta Oranjestad pa cierto barco di transporte. No ta trata solamente di e actual facilidadnan di atraco, sino tambe di e posible construccion di facilidad pa transbordo di container.

Pa analiza esaki mas extensamente mester contempla tambe e desaroyo comercial mundial y specialmente transporte maritimo. Un promer punto di atencion ta e transporte entre Asia, continente Americano y Europa. Sigur ultimo lunanan, cu obstaculo grandi pa e transporte di Asia pa Europa, cu e clausura di Estrecho di Hormuz y menaza di bloqueo tambe di acceso na Lama Cora y Canal di Suez, transporte internacional ta buscando otro opcion, si por tambe solucion permanente. Den e busqueda aki tin otro alternativa ta aparece pa e canal di Panama, cu pa mas cu un siglo ta e lugar casi obligatorio pa pasa pa e otro banda di continente Americano, y sigui pa Europa. Ta trata di dos opcion. Uno ta e transporte cu trein via e asina yama ‘Corredor Interoceánico del Istmo de Tehuantepec (CIIT), cu ta conecta algun puerto na banda Pacifico cu esun Atlantico unda e istmo ta na un distancia minimo. E rival pa Panama no ta un canal sino un conexion di trein, cu ta haci necesario transbordo di tur container, pa na e otro banda bay riba un otro barco. Cuatro haf, Coatzacoalcos, Salina Cruz, Dos Bocas y Puerto Chiapas lo ricibi e barconan. E proyecto mester ta cla dentro di algun luna y ta un alternativa pa Panama. Na e ultimo pais aki tin dos problema creciente. Uno ta e congestion di trafico maritimo riba su mes, ademas di e complicacion creciente di disponibilidad di awa pa maneha e sistema di sluis. E otro complicacion ta e politica di gobierno Mericano cu ta contra e creciente influencia comercial di China den e zona. Y si tin algo cu ta molestia comercio mundial ta disturbio politico cu por resulta den obstaculo pa trafico.E otro alternativa ta via e ruta rond di Alaska y Canada, cu ta principalmente interesante pa transporte pa Europa y costa Atlantico di Canada y Merca.E ruta aki a bira di interes pa via di influencia di cambio climatico, cu a kita e problema di ijs, cu tabata haci e pasada dificil y peligroso. Loke ta hunga un papel importante aki ta e ultimo desaroyonan geopolitico y economico. E aliadonan di Merca ta busca alternativa di cooperacion economicom y militar, cu den menos di un aña y mey di gobierno di Trump a mira caba un alianza surgiendo entre paisnan Europeo, incluyendo Union Europeo, Canada y paisnan na Asia (Hapon, China, Sur Corea) y Australia.Esaki no ta significa cu lazo economico cu Merca no lo t’ey mas pero si cu e alianzanan nobo ta lagando Merca un banda como posible participante. Y tanten cu tin un gobierno Mericano cu ken cada documento firma ta parce di tin como fecha di caducacion e siguiente dia, esaki lo ta e panorama pa e proximo tempo.Ambos alternativa nobo ta haya importancia geopolitico tambe. Nan ta importante como forma di evita toca teritorio Mericano y ta fortifica e colaboracion economico Mexicano/Canades, cu por bira mas fuerte, cu y sin un acuerdo di liber comercio cu Merca.

E deliberacion entre gobierno di Aruba y di Hulanda tocante e tereno di refineria no ta encera rescate di e industria mes. Lo por contempla reactiva e almacenahe di petroleo. E perspectiva pa esaki no ta asina prometedor, mirando e competencia existente den nos region riba e tereno aki. Ademas, no tin speranza cu produccion di crudo na Venezuela, bao di e acuerdo cu gobierno Mericano, lo aumenta drasticamente dentro di un tempo cortico. Yega atrobe na un produccion di entre 2 pa 3 miyon bari pa dia por dura un decada, cu un inversion di cerca di 100 biyon dollar. Ademas, Venezuela tin caba e infrastructura pa almacena y exporta petroleo na e volumen menciona.

Kico Aruba por ofrece?

Aruba por ofrece un facilidad excelente pa transbordo di container, cerca di Panama, for di zona di horcan y aleha di e disturbio politico, entre hegemonismo Mericano, expansionismo Chines y soberania di Panama. Reino Hulandes ta parti di e alianza mundial cu ta enfatiza colaboracion a base di respet pa ley internacional y cumplimento cu acuerdo; Aruba por garantiza e seguridad legal aki. Ademas, trafico creciente entre Suramerica (e.o. Mercosur), Canada y Europa por percura pa mas transporte maritimo entre Norte y Sur, cu posible necesidad di transbordo. Tin hopi aspecto pa investiga ainda y talvez no tur lo ta faborable, pero no mester descarta nada di antemano.